ოზურგეთის მუნიციპალიტეტის ადმინისტრაციული შენობის წინ, გუშინ, "ქართულ ოცნებაში" შემავალი "ეროვნული ფორუმის" ყოფილი წევრის, ადგილობრივი თვითმმართველობის არჩევნებში კი "პატრიოტთა ალიანსის" მხარდამჭერის, თენგო კაპანაძის დაკავებას, პარლამენტის დეპუტატი ზვიად კვაჭანტირაძე გამოეხმაურა.
"თენგიზ კაპანაძე ნამდვილად ჩვენი ერთ-ერთი ყველაზე აქტიური მხარდამჭერი იყო. ჯერ კიდევ საპარლამენტო არჩევნებამდე, პატრულმა უკანონოდ დააჯარიმა სოლიდური თანხით და დღემდე ვერ მოხერხდა ამ ჯარიმის მოხსნა.
ვერც ვერანაირ სამსახურს ეღირსა აქამდე, ისევე როგორც ძალიან ბევრი ჩვენი აქტივისტი.
ბუნებრივია, იგი განაწყენებულია და შეიძლება შეგვაგინოს კიდეც. მხოლოდ ამის გამო, მისი დაკავება დაუშვებლად მიმაჩნია, თუ უარესი რამე არა აქვს ჩადენილი, რაც გამიკვირდებოდა.
საერთოდ, უსამართლობაა, როდესაც ასე უყურადღებოდ მივატოვეთ ძალიან ბევრი და სულ ველოდებით რაღაც კონკურსებს და ატესტაციებს თვითმმართველობებში, სადაც ისევ წლის ბოლომდე გადაიწია ვადებმა, რომ ხალხს იქ დასაქმების შანსები მივცეთ. (მე ამ კანონს ხმა არ მივეცი, რადგანაც უსაფუძვლოდ მივიჩნევდი.) ველოდებით ეკონომიკის გააქტიურებას, სამუშაო ადგილების შექმნას.
ამისთვის მხოლოდ მთავრობის ინიციატივები არ იკმარებს, თუ ადგილებზე ხალხი მეტ ინიციატივას არ გამოიჩენს და არ დაიწყებს ინიციატივების და ინოვაციების ირგვლივ გაერთიანებას, მაგრამ არა ასე პასიურად, როგორც ჩვენთან ოზურგეთში, არამედ როგორც ვთქვათ კახეთში, სადაც ბევრი პროექტი დაფინანსდა მთავრობის შეღავათიანი კრედიტებით."
