“თავისუფალი დემოკრატების” ლიდერი, ირაკლი ალასანია ოზურგეთს ეწვია. როგორც თვითონ თქვა, ამჯერადაც სოფლებში მოსახლეობას შეხვდებოდა და პირადად მოისმენდა მათ გასაჭირს.
დილიდან, ადგილობრივი ორგანიზაციის თავმჯდომარესთან, თემურ სალუქვაძესთან და ჟურნალისტებთან ერთად, ურეკის საკრებულოს შემადგენლობაში მყოფ წვერმაღალას უბანს ეწვია. აქ მოსახლეობის თავდაპირველი რეაქცია ძალიან ხისტი იყო: _ როგორ მოხვდით აქ, ამ ღვთისგან და კაცისგან მიტოვებულ მხარეში? რაიმე ხომ არ ახლოვდება? _ ეკითხებოდნენ ისინი.
ალასანია მოსახლეობის უპირველესი პრობლემით დაინტერესდა: _ რა ვქნათ ამ ბინებში გამოკეტილმა ხალხმა, მოხუცებმა, ავადმყოფებმა, უმუშევრებმა, რომლებსაც თანმიმდევრულად გაგვიუქმეს დახმარება თუ პოლისი? შემოდიან სახლებში აგენტები და ამბობენ, ტელევიზორი, მაცივარი ან კედელზე შპალერი თუ გაქვს, მდიდარი ხარო. ესეც თუ არ გვაქვს, მაშინ ბოსელში უნდა ვიყოთ და პირუტყვი გვერქვას?! _ წუხდნენ წვერმაღალელები, _ სოფლის პროგრამით გათვალისწინებული 7 000 ლარით, ერთი წყალგამტარი გვირაბი გააკეთეს, წარმოუდგენელია ამდენი ფული ამ პატარა ხიდს დასჭირვებოდა, _ მიუთითეს იქვე ახლოს მდებარე ხიდ-ბოგირაზე ალასანიას, _ წყალი მუდმივი პრობლემაა, კანალიზაციის არხი იმდენი ხნის გაუწმენდავია, რაღაც უბედურება გაჩნდება _ საკუთარი ძალებით რომ არ ვწმენდდეთ, ამდენ ხანს დახოცილები ვიქნებოდით, _ ამბობდა მოსახლეობა, _ არჩევნების წინ ყველა მოდის, არჩევნებამდე ხალხი ვართ, არჩევნების შემდეგ _ არაფერი.
მთავარი, რასაც წვერმაღალელები ითხოვენ, არის კერძო საკუთრებაში მცირე (2 000კვ.მ) მიწის ფართობის მიზომვა თავის დროზე, რაც მათ თავის რჩენის საშუალებას ვერ აძლევს. იქვე 200 ჰექტარი ფართობი გავერანებულია და 300 კაცი უმუშევარია, ხელისუფლება ამბობს, რომ ყადაღა ადევსო. გინახავთ ასეთი სამართალი? _ ამბობს მოსახლეობა.
ირაკლი ალასანია შეჰპირდა წვერმაღალელებს, რომ კონკრეტულად ამ საკითხით მთავრობას მიმართავს.
წვერმაღალას შემდეგ, ალასანია სოფელ ლიხაურს ეწვია. სოფლის ცენტრში შეკრებილთა შორის (ისევე, როგორც ყველა სოფელში, თვალს ვერსად მოჰკრავდით პედაგოგებს, სოფლის რწმუნებულებსა თუ საჯარო სამსახურში დასაქმებულ პირებს _ ნაციონალების მიერ დაშინებულნი, შორიდან კითხულობდნენ ამბებს). ლიხაურელებმა უპირველეს პრობლემად შიდა გზების მოუწესრიგებლობა, ტექნიკის, საწვავის უქონლობა, სასუქის სიძვირე და უმუშევრობა დაასახელეს, სოფლის მეურნეობის აღორძინებისთვის თანადგომა ითხოვეს, რაზეც “თავისუფალი დემოკრატების” ლიდერმა დახმარება აღუთქვა.
ირაკლი ალასანიამ მოინახულა 9 აპრილს დაღუპული ნინო თოიძის საფლავი და ეწვია ექვთიმე თაყაიშვილის სახლ-მუზეუმს.
სოფელ ჭანიეთში შეხვედრისას, ანალოგიურ პრობლემებზე საუბრის ფონზე, აქაურებმა განსაკუთრებით ემოციურად ისაუბრეს ამერიკული პეპლის შემოსევის შესახებ: _პეპელამ ყველაფერი შეხრა, მხოხავი მატლებისგან ძლივს ვიცავდით სახლ-კარს. აჭარაში გავგზავნეთ შესაწამლი მანქანები, საკურორტო სეზონიაო, უცხოელი არ შეწუხდეს და შენს ხალხს მატლების ანაბარა რომ აგდებ, ნამუსია? _ ეკითხებოდნენ ისინი ირაკლი ალასანიას, თუმცა, ეს უკანასკნელი სულაც არ იყო ამ კითხვის ადრესატი. მიუხედავად ამისა, დახმარებას მაინც შეჰპირდა მოსახლეობას.
რაც შეეხება ნარუჯელებთან შეხვედრას, აქაურთა ყოფა დანარჩენი გაჭირვებული საქართველოს ფონზე, კიდევ უფრო შემაშფოთებლად გამოჩნდა.
_ როცა ჩაის მეურნეობა დაიშალა, ჩვენი ცხოვრებაც დამთავრდა, მიწის ნაკვეთები მხოლოდ 2 000 კვმ.-ის რაოდენობისა მოგვცეს, დანარჩენი კოკი ცეცხლაძემ იყიდაო, _ გვითხრეს, ჩვენი შვილები და შვილიშვილები კი თურქეთში არიან წასულები სამუშაოდ. რა გვეშველება, ჰაერი გამოგვკვებავს? სოციალურ დახმარებებს, დანიშვნის მაგიერ, გვიხსნიან, პირველკლასელები მეხუთე რაიონიდან 4-5 კილომეტრზე ფეხით დადიან. შარშან ტრანსპორტი იყო, წელს ესეც გაუქმდა, ამას ქვეყანა ჰქვია? _ ტიროდა ქალბატონი.
ნარუჯელთა განცხადებით აქ ერთ დროს, წელიწადში 6 000 ტონა ჩაი იკრიფებოდა და ცხოვრება დუღდა, ახლა ადამიანებისგან იცლება აქაურობა: _ მიწა მოგვეცით, რომ ვიმუშაოთ _ სისხლში გვაქვს შრომისადმი თავდაუზოგავი სიყვარული. რას გვიშვებით, ამაზე უარესი რა უნდა დაგვემართოს? _ ასეთი განცდით და საყვედურითა საუბრობდნენ ყოველდღიური ყოფით გატანჯული აქაურები და ირაკლი ალასანიას სათითაოდ, მობოდიშებით ეპატიჟებოდნენ, წამოდით და ნახეთ, სად ვცხოვრობთ _ არა წყალი, არა კარი, არა ფანჯარა, არა ლუკმა, ტელევიზორში რომ ყველაფერი კარგადაა, ნეტავ, ჩვენ თავს რა ამბავიაო?
“თავისუფალი დემოკრატების” ლიდერმა აღნიშნა, რომ ასე ცინიკურად ექცევა ეს მთავრობა თავის ხალხს, მთელ საქართველოს:
_ მე არ შეგპირდებით იმას, რისი გაკეთებაც არ შემიძლია. თქვენი ყოფა მართლაც აღმაშფოთებელია და რასაც ამ ეტაპზე გავაკეთებ, ესაა, მთავრობას მივმართავ, თქვენი პრობლემები მოაგვაროს.
ნარუჯიდან ირაკლი ალასანია ოზურგეთში დაბრუნდა და ოფისის წინ სამოქალაქო საზოგადოებასთან ბრიფინგი გამართა.
