რამდენიმე დღის წინ ოზურგეთში თავისუფალი დემოკრატების ლიდერი, ირაკლი ალასანია იმყოფებოდა, რომელსაც “გურია ნიუსმა” საზოგადოებისთვის საინტერესო კითხვებით მიმართა.
_ ბატონო ირაკლი, ახლახან, ცნობილმა ბიზნესმენმა, ბიძინა ივანიშვილმა გააკეთა განცხადება მომავალ საპარლამენტო არჩევნებში მონაწილეობის შესახებ. როგორია თქვენი აზრი ამ მოულოდნელი სვლის თაობაზე და შეიძლება თუ არა ირაკლი ალასანია ვიხილოთ ივანიშვილის გვერდით?
_ მე ვიცი, რომ ბიძინა ივანიშვილი პატრიოტი კაცია, ქველმოქმედი და მეცენატი, რომელმაც უამრავ ადამიანს აღმოუჩინა დახმარება, აღმშენებლობით საქმეებში მიიღო მონაწილეობა, დიდია მის მიერ გაკეთებული საქმეების ნუსხა. ამიტომ იგი საზოგადოებაშიც და ჩემშიც დიდი სიმპათიით სარგებლობს, თუმცა, რას იზამს იგი პოლიტიკაში, წარმოდგენა არ მაქვს. უახლოეს დღეებში აპირებს განცხადების გაკეთებას, ვნახოთ, რა იქნება.
_ შემდგარ-არშემდგარი “რვიან-ექვსიანის” დაშლის მიზეზად, ზოგი და, მათ შორის, “რესპუბლიკელები”, თქვენ გასახელებენ…
_ ეს სიცრუეა, ტყუილია. ოფისებიდან ვერ გამოვიყვანე ისინი. მათ მხოლოდ კონსულტაციებით სურთ, გაატარონ წინა საარჩევნო პერიოდი და იმიტომაც იღებენ იმ ხმებს, რასაც იღებენ. დაშლის მიზეზი იყო მათი მხრიდან უმოქმედობა. ამიტომ მე ვერ დაველოდები, ვერც რესპუბლიკელებს და ვერც ვერავის. უნდა გავიდე ხალხში და დავდივარ კიდეც. მე დარწმუნებული ვარ, რომ შედეგი ასე მიიღწევა. მჭირდება ყოველდღიური კონტაქტი მოსახლეობასთან და გურიაში ამიტომ ვარ დღეს.
_ გაქვთ საპარლამენტო არჩევნებში გამარჯვების იმედი?
_ იმედი რომ არ მქონდეს, არც ვიქნები პოლიტიკაში. გეტყვით, რომ ეს არის გადამწყვეტი არჩევნები. ამ არჩევნებში სააკაშვილი და ნაციონალური მოძრაობა უნდა “ჩაბეტონდეს” ქართულ პოლიტიკაში.
_ საპარლამენტო არჩევნებს გულისხმობთ?
_ რა თქმა უნდა. თუ არა და, ან ვეგუებით იმას, რომ ჩვენ მივდივართ სინგაპურიზაციისკენ, აბსოლუტურად სხვა მიმართულებით, ამას ასრულებს სააკაშვილი. ან ჩვენ ვამარცხებთ სააკაშვილს და მის გუნდს. რა თქმა უნდა, მთლიანად არ წაიშლებიან პოლიტიკური სივრციდან და რუკიდან, მაგრამ ჩემი მიზანი არის, გადავიყვანო უმცირესობაში ისინი და დავიწყოთ სახელმწიფოს და არა სინგაპურის მშენებლობა.
