ოპერატიული ინფორმაცია, რომელზეც მუდმივად საუბარი გამოძიების ინტერესებს ლახავს თუ პრევენცია, რომელიც მინისტრისა და მინისტრის მოადგილის მხრიდან არასერიოზულია? რა ხდება რეალურად და რას გვიჩვენებს არსებული პოლიტიკური მოვლენების ვიზუალი – საპარლამენტო უმცირესობის მხრიდან მზადებას დესტაბილიზაციისთვის, თუ მთავრობის "ჭკუიდან გადაცდომას"?
შს სამინისტროს პირველებს, მთავრობისა და საპარლამენტო უმრავლესობის წევრებს, უკანასკნელი თვეების განმავლობაში, არაერთხელ გაუკეთებიათ განცხადება, რომ ყოფილი მმართველი გუნდი, სხვადსხვა არასამთავრობო ორგანიზაციებისა თუ მობილური ჯგუფების დახმარებით, ქვეყანაში დესტაბილიზაციას გეგმავს.
იყო საუბარი საბურავების მოგროვებასა და მეიდნის საქართველოში გადმოტანაზეც, უკრაინის მაგალითის გამოყენებით.
2014 წლის 7 აპრილი, შს მინისტრი ალექსანდრე ჭიკაიძე ამბობს, რომ ქვეყანაში არიან ჯგუფები, რომლებიც საკუთარი პოლიტიკური ინტერესების გასამყარებლად, აურზაურის გამოწვევას შეეცდებიან.
"მათ (ნაციონალური მოძრაობა) ჩამოიყვანეს უკრაინიდან ევრომაიდანის აქტივისტები, ატარებენ ტრენინგებს და მოსამზადებელ სამუშაოებს. აქტიურად მუშაობენ იმაზე, როგორ გამოიყვანონ ხალხი ქუჩაში, მოხდეს არეულობა."
ჭიკაიძის თქმით, "ნაციონალური მოძრაობა" ევრომაიდნის სცენარს ამუშავებს და არსებობს ინფორმაციები, რომ ამ მიზნით უკვე დაწყებულია საბურავების მომარაგება.
2014 წლის 10 სექტემბერი, შს მინისტრის, ალექსანდრე ჭიკაიძის თქმით, სააკაშვილმა, კიევსა და თურქეთში ჩატარებულ თათბირებზე, „ნაციონალური მოძრაობის“ წევრებსა და არასამთავრობო ორგანიზაციების ლიდერებს, კონკრეტული დავალებები მისცა, რომელიც მიზნად მობილური ჯგუფების შექმნასა და პროვოკაციების მოწყობას ისახავს, რათა ქვეყანაში ქაოსი შეიქმნას.
2014 წლის 14 ოქტომბერი, შს მინისტრის მოადგილე ლევან იზორია ამბობს, რომ "ნაციონალური მოძრაობის" მიერ ქვეყანაში მასშტაბური დესტაბილიზაციისთვის მზადების საკითხზე გამოძიება მიმდინარეობს.
"არსებობს ოპერატიული ინფორმაცია, რის შესახებაც ბატონმა მინისტრმა 10 სექტემბერს მიცემულ ინტერვიუში გააკეთა განცხადება. რა თქმა უნდა, გამოძიება მიმდინარეობს. საზოგადოებას, როგორც კი გამოძიების ფარგლებში შედეგები გვექნება, საჯაროდ მოვახსენებთ. გამოძიება 315-ე მუხლით მიმდინარეობს, რაც გულისხმობს ძალადობრივი შეთქმულებით ხელისუფლების შეცვლის მცდელობას", _ განაცხადა ლევან იზორიამ.
ცნობისთვის, სსკ-ს 315-ე მუხლი. შეთქმულება ან ამბოხება საქართველოს კონსტიტუციური წყობილების ძალადობით შესაცვლელად.
შეთქმულება საქართველოს კონსტიტუციური წყობილების ძალადობით შესაცვლელად, სახელმწიფო ხელისუფლების დასამხობად ან ხელში ჩასაგდებად ისჯება თავისუფლების აღკვეთით ვადით ხუთიდან რვა წლამდე.
2. ამბოხება საქართველოს კონსტიტუციური წყობილების ძალადობით შესაცვლელად, სახელმწიფო ხელისუფლების დასამხობად ან ხელში ჩასაგდებად, ისჯება თავისუფლების აღკვეთით ვადით შვიდიდან თხუთმეტ წლამდე.
3. ამ მუხლის მე-2 ნაწილით გათვალისწინებული ქმედება, რამაც გამოიწვია ადამიანის სიცოცხლის მოსპობა ან სხვა მძიმე შედეგი, ისჯება თავისუფლების აღკვეთით ვადით თხუთმეტიდან ოც წლამდე.
საპარლამენტო უმცირესობის წარმომადგენელი გიორგი გაბაშვილი, მინისტრისა და მინისტრის მოადგილის განცხადებებს დესტაბილიზაციასთან დაკავშირებით, აბსურდულს უწოდებს და დასძენს, რომ თუ ვინმე ქვეყანაში დესტაბილიზაციას ნერგავს, ეს თავად ხელისუფლებაა.
მისი თქმით, სწორედ ხელისუფლება ახდენს იმ ჯგუფების ორგანიზებას, რომლებიც ხმაურიან აქციებს აწყობენ, იგინებიან და კვერცხებსა და ბოთლებს ისვრიან.
"ხელისუფლება ბოლომდე გადაცდა ჭკუიდან. რომელ გადატრიალებაზე, რევოლუციაზე, ან დესტაბილიზაციაზე ლაპარაკობენ, როცა ოპოზიციის მხრიდან არცერთ აგრესიულ აქციას არ ჰქონია ადგილი?!"
რის საფუძველზე აკეთებენ დეპოლიტიზირებული უწყების პირველი პირები მსგავსი ტიპის განცხადებებს, იძლევა თუ არა ხილული პოლიტიკური მოვლენები საბაბს ვიფიქროთ, რომ "ერთიანი ნაციონალური მოძრაობა" ამბოხისთვის ემზადება, და რამდენად წინდახედულები არიან შსს-ს პირველები, როცა ოპერატიული ინფორმაციის არსებობასა და შესაბამის გამოძიებაზე ღიად საუბრობენ?
ექსპერტი გია ხუხაშვილი მიიჩნევს, რომ სისხლის სამართლის საქმის დაანონსება მინისტრისა და მისი მოადგილის მხრიდან, გამოძიების ინტერესებს აზარალებს.
"როდესაც შინაგან საქმეთა სამინისტრო ლაპარაკობს გამოძიებაზე, არ შეიძლება მე კატეგორიული ვიყო, რადგან არ ვფლობ საკმარისს ინფორმაციას.
თუმცა, ვიზუალურად, რამე ისეთს, რაც შეიძლება სისხლის სამართლის დანაშაულად ჩაითვალოს, ჯერჯერობით ვერ ვხედავ, მაგრამ ვერ ვიქნები კატეგორიული, რადგან არ ვიცი რა ინფორმაციას ფლობს უწყება და რის საფუძველზე აწარმოებს ამ საქმეს. ეს თემა დახურულია, თვითონაც არ იძლევიან დამატებით ინფორმაიცას.
თუმცა, როდესაც პოლიტიკურ ძალას, რომელზეც გაქვს საფუძვლიანი ეჭვი, რომ გადატრიალებას ამზადებს და შენ ამ თემას წინასწარ, მუდმივად აანონსებ, ეს გამოძიების ინტერესებში ვერ იქნება იმ მარტივი მიზეზის გამო, რომ ის გაფრთხილდება. ძალიან უცნაური და გაუგებარია ეს ყველაფერი. რა საჭიროა ამაზე მუდმივად ლაპარაკი, ეს არ მესმის", _ ამბობს "გურია ნიუსთან" საუბრისას ხუხაშვილი.
მისივე თქმით, არ შეიძლება მსგავსი ტიპის განცხადებები, თუნდაც პრევენციისთვის კეთდებოდეს, რადგან ეს შს მინისტრის ავტორიტეტს აყენებს ზიანს.
"პრევენცია შეიძლება გავაკეთო მე, თქვენ, მაგრამ მინისტრის მხრიდან პრევენცია, საბურავებზე და გადატრიალებაზე საუბარი, მის ავტორიტეტს აყენებს ზიანს. მინისტრის განცხადების წონა და ფასი იმდენად მაღალი უნდა იყოს, რომ მის განცხადებებს იმავე დღეს თუ არა, მეორე დღეს მაინც მოჰყვებოდეს კონკრეტული დაკავებები.
ჩვენ ვისმენთ განცხადებებს და რეალურად არაფერი არ ხდება, ანუ ქმედებაში არ გადადის. ეს არაჯანსაღ სიტუაციას ქმნის.
დეჟავიუს გრძნობა მიჩნდება – მახსოვს „ნაციონალური მოძრაობის“ სპიკერების მხრიდან 2007-2008 წელს იგივე რიტორიკა, რაც შემდგომში არაფრით არ დამთავრდა. ესე განცხადებები, რომელსაც ქმედებები არ მოჰყვება, მძიმე შთაბეჭდილებას ტოვებს", _ ამბობს ხუხაშვილი.
