საქართველოს პრეზიდენტი გიორგი მარგველაშვილი რუსეთსა და ოკუპირებულ აფხაზეთს შორის სამხედრო თანამშრომლობის ხელშეკრულების დადებას გამოეხმაურა და საგანგებო განცხადება გააკეთა.
პრეზიდენტის განმარტებით, ასეთი შინაარსის ხელშეკრულების გაფორმება გააუარესებს ვითარებას შავი ზღვის აუზსა და კავკასიის რეგიონში.
"ხელშეკრულების გაფორმება ეწინააღმდეგება ჟენევის კონსულტაციების ფორმატს და სულისკვეთებას. ეს ხელშეკრულება საფრთხეს უქმნის ჩვენი ქვეყნის თავდაცვისუნარიანობას. ხელშეკრულების ამოქმედების შემთხვევაში გაუარესდება ჰუმანიტარული ვითარება და ადამიანის უფლებათა დაცვის საკითხები რეგიონში. რეალური საფრთთხის წინაშე დადგება აფხაზეთის, როგორც საქართველოს განუყოფელი ნაწილის თვითდამკვიდრება და იდენტობის მომავალი. გამომდინარე იქედან, რომ საქართველოს საგარეო და საშინაო პოლიტიკის განმსაზღვრელი საქართველოს პარლამენტის მივმართავ პარლამენტს უსწრაფეს პერიოდში განიხილოს არსებული ვითარება და შეიმუშაობს პოზიცია. ამ პოზიციაზე დაფუძნებით მოვიწვევთ უშიშროების საბჭოს და დავსახავთ გეგმას ვითარების დასტაბილურების მიმართულებით. მივმართავ საერთაშორისო თანამეგობრობას უსწრაფესად შეაფასონ ვითარება" _ აღნიშნა გიორგი მარგველაშვილმა და დასძინა, რომ თხოვნა პარლამენტში პრეზიდენტის ადმინისტრაციიდან უკვე გადაიგზავნა.
საქართველოს საგარეო საქმეთა სამინისტროს განცხადებით, კი აფხაზეთთან ე.წ. ხელშეკრულების ხელმოწერა საქართველო-რუსეთის ურთიერთობების ნორმალიზების პროცესს სერიოზულ საფრთხეს შეუქმნის.
ამის შესახებ ნათქვამია საქართველოს საგარეო საქმეთა სამინისტროს განცხადებაში აფხაზეთის ოკუპირებული რეჟიმის მიერ გავრცელებულ ინფორმაციაზე რუსეთის ფედერაციასთან მოკავშირეობისა და ინტეგრაციის შესახებ ხელშეკრულების გაფორმების შესახებ.
“2014 წლის 13 ოქტომბერს აფხაზეთისა და სხვა საინფორმაციო წყაროების საიტებზე განთავსდა “რუსეთის ფედერაციასა და აფხაზეთის რესპუბლიკას შორის მოკავშირეობისა და ინტეგრაციის შესახებ ხელშეკრულების” პროექტი. როგორც იუწყებიან, აღნიშნული დოკუმენტი მომზადდა რუსეთის მხარის მიერ და გადაეცა განსახილველად დე ფაქტო რეჟიმის ახალ ხელმძღვანელობას. სამწუხაროდ, ზემოაღნიშნული ინფორმაცია და ე.წ. შეთანხმების პროექტის ტექსტი მიუთითებს იმაზე, რომ რუსეთი კვლავ აგრძელებს საერთაშორისო სამართლის ფუძემდებლური პრინციპების უხეშ დარღვევასა და აღებული ვალდებულებების იგნორირებას. აღსანიშნავია, რომ მიუხედავად ურთულესი პრობლემებისა, რომელიც საქართველოს დეოკუპაციისა და ტერიტორიული მთლიანობის აღდგენის საკითხებს უკავშირდება, ორი წლის წინ საქართველოს მთავრობამ რუსეთს ნდობის აღდგენის მიზნით ახალი ორმხრივი დიალოგის ფორმატი შესთავაზა. ამ პოლიტიკის რეალიზაციამ პოზიტიური შედეგები მოიტანა სავაჭრო-ეკონომიკურ და ჰუმანიტარულ სფეროებში. ჩვენი აზრით, ეს პროცესი ასევე პოზიტიურ როლს თამაშობს რეგიონში სტაბილურობისა და უსაფრთხოების განმტკიცებაში. ხაზგასმით უნდა აღინიშნოს, რომ ე.წ. ხელშეკრულების ხელმოწერა და მისი რეალიზაცია სერიოზულ საფრთხეს შეუქმნის საქართველო-რუსეთის ურთიერთობების ნორმალიზების პროცესს, მნიშვნელოვნად დააზიანებს ჟენევის საერთაშორისო მოლაპარაკებებს, რომლებსაც განსაკუთრებული მნიშვნელობა ენიჭება. მიუღებელია ე.წ. ხელშეკრულების პროექტის პრეამბულაში ორი ქვეყნის ხალხის სახელით საუბარი, ვინაიდან საყოველთაოდ ცნობილია, რომ აფხაზეთის მოსახლეობის უმრავლესობა ძალისმიერი მეთოდებით, მათ შორის ეთნიკური წმენდის შედეგად, გამოდევნილია საკუთარი სახლებიდან. სამწუხაროდ, ამ ე.წ. ხელშეკრულების რეალიზაციის შემთხვევაში ადგილზე დარჩენილ აფხაზეთის მოსახლეობის თვითმყოფადობასაც სერიოზული საფრთხე დაემუქრება”, – ნათქვამია საგარეო საქმეთა სამინისტროს განცხადებაში.
უწყებაში იმედოვნებენ, რომ რუსეთის ხელისუფლება თავს შეიკავებს ე.წ. ახალი ხელშეკრულების გაფორმებისგან, წინააღმდეგ შემთხვევაში აღნიშნული ქმედება შეფასდება როგორც აფხაზეთის ანექსიისაკენ გადადგმული ნაბიჯი, შესაბამისი საერთაშორისო სამართლებრივი შედეგებით.
ამასთან, საგარეო საქმეთა სამინისტრო მიმართავს საერთაშორისო ორგანიზაციებსა და საერთაშორისო თანამეგობრობას, რათა განსაკუთრებული ყურადღებით მოეკიდონ ზემოაღნიშნულ საკითხს და რუსეთის განზრახვას, რომლის განხორციელება თვისებრივად შეცვლის ვითარებას რეგიონში და ზოგადად დამატებით პრობლემებს შეუქმნის ევროპულ უსაფრთხოებას.
