მიმდინარე წლის 14 აგვისტოს "გურია ნიუსმა" ლანჩხუთის მუნიციპალიტეტის გამგეობიდან ოფიციალურად გამოითხოვა შემდეგი სახის ინფორმაციები:
_ რამდენი ადამიანი დასაქმდა მუნიციპალიტეტის გამგეობაში მიმდინარე წლის 1 იანვრიდან დღემდე. კონკრეტულად ვინ, სად, რა თანამდებობაზე დაინიშნა და რამდენია მათი სახელფასო ანაზღაურება. მოგვაწოდეთ დასაქმებული პირების მიერ დაწერილი განცხადებები სამსახურის დაწყების თხოვნის თაობაზე, დასაქმებული პირების cv-ები და დიპლომის დედანთან დამოწმებული ასლები;
_ რა რაოდენობის პრემია გაიცა ლანჩხუთის მუნიციპალიტეტის გამგეობაში 2014 წლის 1 იანვრიდან დღემდე. კონკრეტულად ვინ, როდის, რამდენი და რა დამსახურებისთვის მიიღო პრემია;
_ რა რაოდენობის საწვავი და სატელეფონო ბარათებია გამოყოფილი თვის განმავლობაში მუნიციპალიტეტის გამგებლისთვის, გამგებლის მოადგილისთვის, გამგებლის თანაშემწისთვის და გამგეობის სამსახურებისთვის. კონკრეტულად, რომელ სამსახურს რა რაოდენობის საწვავი და სატელეფონო ბარათი ეძლევა ყოველთვიურად.
ლანჩხუთის მუნიციპალიტეტის გამგეობიდან პასუხის მიღებას ზუსტად ორი თვე(?!) დასჭირდა _ ჩვენამდე ინფორმაციამ 13 ოქტომბერს მოაღწია, თუმცა იგი 26 აგვისტოთია დათარიღებული და როგორც ამავე წერილიდან ირკვევა, მხოლოდ "კანონით დასაშვებ საჯარო ინფორმაციას მოიცავს".
ლანჩხუთის მუნიციპალიტეტის გამგეობაში მიმდინარე წლის პირველი იანვრიდან, 26 აგვისტოს მონაცემებით სამი უფროსი სპეციალისტი და ერთიც მძღოლი დასაქმდა. თუმცა, კონკრეტულად, ვინ დაინიშნა აღნიშნულ თანამდებობებზე და რამდენია მათი სახელფასო ანაზღაურება, აღნიშნულ წერილში ამაზე არაფერი წერია. ასევე, გამგეობის მიერ არ არის მოწოდებული დასაქმებული პირების მიერ სამსახურის დაწყების თხოვნის განცხადებები, დასაქმებული პირების CV-ები და დიპლომის დედანთან დამოწმებული ასლები. გამგეობიდან მიღებული წერილის თანახმად, "აღნიშნული ინფორმაციები პერსონალურ მონაცემთა დაცვის შესახებ საქართველოს კანონის მე-2 მუხლის "ა" პუნქტისა და ზოგადი ადმინისტრაციული კოდექსის 27-ე და 44-ე მუხლების შესაბამისად", თურმე, არ წარმოადგენს საჯარო ინფორმაციას.
რაც შეეხება პრემიებს, გამგეობის თანამშრომლებზე იგი ორჯერ გაიცა და მთლიანობაში მისმა ჯამურმა მაჩვენებელმა 132 750 ლარი შეადგინა. პირველი პრემია გაიცა შობის დღესასწაულთან დაკავშირებით ლანჩხუთის მუნიციპალიტეტის რიგ თანამშრომლებზე ერთი თვის თანამდებობრივი სარგოს ოდენობით. მეორე კი სარვამარტოდ მუნიციპალიტეტის ქალ თანამშრომლებზე იყო განკუთვნილი, თითოეულზე 125 ლარის ოდენობით. ორივე პრემიის გაცემის საფუძველი მაშინდელი საკრებულოს თავმჯდომარის ბრძანებები იყო.
ლანჩხუთის მუნიციპალიტეტის გამგეობიდან მიღებულ ოფიციალურ წერილში მითითებულია, რომ მუნიციპალიტეტის გამგებელი, ზაზა ურუშაძე ყოველთვიურად 600 ლიტრ საწვავს მოიხმარს და მის განკარგულებაშია ავტომანქანა "მიცუბიში მონტერო". გამგებლის მოადგილეს ვაზ-2121 ნივა ემსახურება 450 ლიტრი საწვავის ოდენობით თვეში. რაც შეეხება სამსახურებს, მათი საწვავით სარგებლობის ყოველთვიური ლიმიტი ასე გამოიყურება: ინფრასტრუქტურისა და არქიტექტურის სამსახური _ "ჰონდა CRV", 400 ლიტრი საწვავი; სოციალური დაცვის სამსახური _ "ოპელ ომეგა", 160 ლიტრი; ადამიანური რესურსების მართვის სამსახური _ "მაზდა", 90 ლიტრი საწვავი; შიდა აუდიტის სამსახური _ ვაზ-2121 ნივა, 350 ლიტრი საწვავი; ქონების მართვის სამსახური _ "ოპელ ვექტრა", 120 ლიტრის; ტერიტორიულ ორგანოები _ ვაზ-2107, 200 ლიტრი საწვავი. სახანძრო-სამაშველო სამსახურს ოთხი ავტომობილი ემსახურება: მიცუბიში-L-200-დიზელი, მაგირუსი-DOICI-დიზელი, ზილ-130 და ზილ-131, მთლიანობაში კი ამ სამსახურზე 480 ლიტრ საწვავია თვეში განკუთვნილი.
როგორც ზემოთ აღვნიშნეთ, ოფიციალურ წერილში ზაზა ურუშაძის სამსახურებრივ მანქანად "მიცუბიში მონტეროა" მითითებული, თუმცა 2013 წლის ზაფხულიდან მოყოლებული, ეს ავტომობილი დღემდე მწყობრიდანაა გამოსული და გამგებელი პირად საკუთრებაში არსებული "ფოლკსვაგენ პასატით" მოძრაობს. არც ტერიტორიული ორგანოს დაქვემდებარებაში არსებული "ვაზ-2107"-ია მუშა მდგომარეობაში და რამდენიმე წელია ყოფილი პოლიციის ეზოში დგას. შესაბამისად, გაურკვეველია მასზე რიცხული 200 ლიტრი საწვავის "მისამართიც". რაც შეეხება ქონების მართვის ბალანსზე არსებულ "ოპელ ვექტრას", სინამდვილეში, აღნიშნული ავტომობილით სამხედრო აღრიცხვის, გაწვევისა და მობილიზაციის სამსახური სარგებლობს.
"დასაშვებ საჯარო ინფორმაციათა" ნუსხაში მოხვდა გამგეობის თანამშრომელთა სატელეფონო ხარჯების ლიმიტი, რომლის მიხედვით მუნიციპალიტეტის გამგებელს თვეში 80 ლარი ერიცხება, მოადგილეს _ 65 ლარი; სამსახურის უფროსებსა და გამგებლის მდივანს 30-30 ლარის ლიმიტი აქვთ, ხოლო თანაშემწეებსა და განყოფილების უფროსებს _ 20-20 ლარის.
რაც შეეხება მთავარ, წამყვან სპეციალისტებს, მძღოლებს და ტერიტორიული ორგანოს რწმუნებულებს, მათ კორპორატიულ ქსელში _ 10-10 ლარი ერიცხებათ თვეში.
