ქალაქ ოზურგეთში, დემოკრატიული ჩართულობის ცენტრებთან არსებული ქალთა კლუბების ინიციატივით, გაიმართა აქცია ქალთა მიმართ ძალადობის წინააღმდეგ სლოგანით: არა ძალადობას! არა ფემიციდს!
აქციაში მონაწილეობა ადგილობრივი არასამთავრობო ორგანიზაციის, მედიის და სამთავრობო სტრუქტურის წარმომადგენლებმა მიიღეს.
"ეს აქცია საქართველოს ცხრა ქალაქში ტარდება. თითოეული ჩვენგანის ვალია, რომ მსგავსი აქციების დროს ერთმანეთის დავუდგეთ გვერდით. შეძრული ვართ იმ ქმდებებით, რაც ბოლო პერიოდში ხდება ჩვენს ქვეყანაში და ვგმობთ ყველანაირ ძალადობას", – თქვა ჩვენთან საუბრის დროს ოზურგეთის ქალთა კლუბის წევრმა, ნინო ნიკოლაიშვილმა.
აქციის მიზანი იყო, საზოგადოების ფართო მასების ცნობიერების ამაღლება ძალადობის შესახებ, მათი ყურადღების მიპყრობა ისეთი მნიშვნელოვანი საკითხისადმი, როგორიცაა ქალთა მიმართ გახშირებული ძალადობა და ქვეყანაში გაზრდილი ფემიციდის რაოდენობა, აგრეთვე მსჯელობა მათ გამომწვევ მიზეზებზე და პრევენციის გზებზე.
ბოლო ათწლეულის განმავლობაში ქვეყანაში უამრავი ინიციატივა და მასშტაბური პროგრამა განხორციელდა, რომელიც მიმართული იყო ქალთა უფლებების დაცვასა და გენდერული თანასწორობის გაძლიერებაზე. ამის მიუხედავად, ქალთა მიმართ ძალადობა, ქვეყნის მასშტაბით, საშიშ ზღვარს აღწევს და საჭიროებს დროულ რეაგირებას, როგორც სამართალდამცავი ორგანოების ასევე, საგანმანათლებლო – საზოგადოებრივი ინსტიტუტების მხრიდან.
მსოფლიო ბანკის 2012 წლის გენდერული კვლევის მიხედვით საქართველოს გენდერული არათასწორობის ინდექსი არის 0.438 რაც მას 148 ქვეყანას შორის 81 ადგილზე აყენებს. ეს უტყუარი დასტურია იმისა, რომ საზოგადოებას ესაჭიროება მეტი განათლება იმის შესახებ, თუ რა არის გენდერული უთანასწორობა და ძალადობა, ხოლო საზოგადოებრივმა და საგანმანათლებლო ინსტიტუტებმა მეტი უნდა იმუშაონ საზოგადოებისათვის გენდერული უთანასწორობის ინდექსის შემადგენელი კომპონენტების განმარტებაზე, სახელმწიფო პოლიტიკა გახდეს უფრო ეფექტური და მოქნილი ქალთა ეკონომიკური უფლების, საკუთრების უფლების დაცვისა და პოლიტიკური მონაწილეობის ხელშეწყობის თვალსაზრისით.
აქციის დასრულების შემდეგ, ქალაქ ოზურგეთის მუნიციპალიტეტის საჯარო ბიბლიოთეკის სააქტო დარბაზში ღონისძიება გაიმართა.
"ჩვენ ვგმობთ ქალთა მიმართა ძალადობას და საერთოდ ძალადობას", _ გვითხრა საჯარო ბიბლიოთეკის დირექტორმა, ლიკა ბაქანიძემ.
არასამთავრობო ორგანიზაციის "ქალები რეგიონის განვითარებისთვის" თავმჯდომარემ ქეთევან ხიდაშელმა, იურისტთან და ფსიქოლოგთან ერთად ისაუბრა ოჯახში ძალადობის ფაქტებზე. დისკუსიამდე კი ნაჩვენები იყო ჩეხური ფილმი "მხოლოდ სიყვარულისთვის".
