20 ოქტომბერს, ოზურგეთის მუნიციპალიტეტის საკრებულოს ბიუროს სხდომაზე 9 საკითხი იყო გამოტანილი, მათ შორის ოზურგეთის მუნიციპალიტეტის ადგილობრივი თვითმმართველობის მოხელეთა დამატებითი საკვალიფიკაციო მოთხოვნების დამტკიცების შესახებ და ოზურგეთის მუნიციპალიტეტის გამგეობის, ოზურგეთის მუნიციპალიტეტის საკრებულოს თანამდებობის პირთა და საკრებულოს აპარატის მოხელეთა თანამდებობის პირთა და გამგეობის მოხელეთა თანამდებობრივი სარგოების ოდენობის განსაზღვრის შესახებ.
მიუხედავად იმისა, რომ ამ საკითხებზე ბიუროზე იმსჯელეს, საკრებულოს მორიგ სხდომაზე, რომელიც 22 ოქტომბერს გაიმართა, ისინი არ გამოიტანეს და მხოლოდ სამი საკითხი განიხილეს.
საკრებულოს თავმჯდომარის დავით დარჩიას თქმით, საჯარო მოხელეების ატესტაციის თარიღი გადაიწია და ის, სავარაუდოდ, 13-14 დეკემბერს ჩატარდება: _ ცნობილი გახდა ჩვენთვის, რომ ტესტირება ოზურგეთში 13-14 დეკემბერს ჩატარდება. ჩვენ ვვარაუდობდით, რომ ტესტირება ჩატარდებოდა 20-21 ნოემბერს, ამიტომ დაჩქარებული წესით უნდა ჩაგვეტარებინა საკრებულოს სხდომა და გადაგვეწყვიტა ეს საკითხი, მაგრამ ახლა გადაიდო თარიღი და აქედან გამომდინარე, მოგვიანებით მოხდება საკრებულოს სხდომაზე ამ საკითხის გატანა. მანამდე ნებისმიერ მოქალაქეს შეუძლია თავისი მოსაზრება დააფიქსიროს ამ თემაზე, _ გვითხრა დავით დარჩიამ.
ოზურგეთის მუნიციპალიტეტის საკრებულოს თავმჯდომარის მოადგილე დიმიტრი კვერღელიძე ამბობს, რომ ოზურგეთში 141 თანამდებობაზე გამოცხადდება კონკურსი და ამით ამომრჩევლის წინაშე მოხდება დანაპირებების შესრულება: _ ყველა ოზურგეთელს ერთხელ და სამუდამო მიეცემა შესაძლებლობა, მიიღოს კონკურსში მონაწილეობა და ღირსეულები დასაქმდნენ საჯარო სამსახურში. კონკურსი აუცილებელია _ ჩვენ უნდა გამოვრიცხოთ ნეპოტიზმი; უნდა გამოვრიცხოთ პოლიტიკური ნიშნით ადამიანის განთავისუფლება და დანიშვნა; ოზურგეთში უნდა აღდგეს სამართლიანობა. სამართლიანობის აღდგენა, პირველ რიგში არის ის, რომ ჩვენ მაქსიმალურად, რეალურად აგვყავს თანამშრომელთა ის რაოდენობა, რაც საქმეს სჭირდება, _ თქვა დიმიტრი კვერღელიძემ.
მისივე თქმით, პარლამენტმა კანონში შეიტანა ცვლილება, რომ საკრებულოებს და გამგეობებს მიეცემათ უფლება, გაზარდონ თანამშრომლების რაოდენობა: _ კონკურსის საშუალებით, ყველას ეძლევა თანაბარი შანსი, დაიწყოს მუშაობა. აქამდე ვერ ეღირსა ჩვენი მოსახლეობა დეიდაშვილების და ბიძაშვილების გარეშე დანიშნულიყვნენ თანამდებობებზე _ ნეპოტიზმი ერთხელ და სამუდამოდ უნდა დასრულდეს ჩვენს ქვეყანაში, _ აღნიშნა დიმიტრი კვერღელიძემ.
