ეზრდებათ თუ არა გუბერნატორებს ფუნქციები და მზადდება თუ არა რაიმე დამატებითი პროექტი მათი უფლებამოსილების გასაფართოებლად?
ამ საკითხით მას შემდეგ დავინტერესდით, რაც გურიის გუბერნატორმა გიორგი ჩხაიძემ "გურია ნიუსისთვის" მიცემულ ინტერვიუში განაცხადა, რომ "იგეგმება გუბერნატორის ფუნქციების გაზრდა. იხ. ლინკი: "იგეგმება გუბერნატორის ფუნქციების გაზრდა"
"საკმაოდ ფართოა ის უფლებამოსილებები, რაც დღესდღეობით გუბერნატორს აქვს. კერძოდ, დღეს მოქმედი კანონმდებლობის მიხედვით ("საქართველოს მთავრობის უფლებამოსილების, სტრუქტურისა და საქმიანობის წესის შესახებ" საქართველოს კანონის მ. 271) , გუბერნატორის ფუნქციებია, მთავრობის დავალების შემთხვევაში, საქართველოს სამინისტროების ტერიტორიული ორგანოების საქმიანობის კოორდინაცია, მთავრობის დავალებით ადგილობრივი თვითმმართველობის რეფორმის ცალკეული ღონისძიებების განხორციელების კოორდინაცია და საქართველოს კანონმდებლობით გათვალისწინებული სხვა უფლებამოსილებები. გუბერნატორი უფლებამოსილია მონაწილეობა მიიღოს მთავრობის სხდომებში სათათბირო ხმის უფლებით, ასევე უფლებამოსილების ფარგლებში გამოსცეს ინდივიდუალური ადმინისტრაციულ–სამართლებრივი აქტი. ეს თემა რომ ამოვწუროთ, გეტყვით იმასაც, რომ იგეგმება გუბერნატორის უფლებამოსილებათა კიდევ უფრო გაფართოება." _ განაცხადა გიორგი ჩხაიძემ.
რა იგეგმება კონკრეტულად და რა მიმართულებით გაეზრდებათ გუბერნატორებს უფლებამოსილება? ამ კითხვებით "გურია ნიუსმა" რეგიონული განვითარებისა და ინფრასტრუქტურის სამინისტროს და საქართველოს მთავრობის კანცელარიას მიმართა.
რეგიონული განვითარებისა და ინფრასტრუქტურის მინისტრის მრჩეველმა მაია გვენეტაძემ "გურია ნიუსთან" განაცხადა : "ჩვენთან, აღნიშნულ თემატიკასთან დაკავშირებით, ანუ რაც შეეხება გუბერნატორის უფლებამოსილების გაზრდას, არანაირი ცვლილება ან დამატება, ან რაიმე რეფორმის განხორციელება არ მიმდინარეობს".
ანალოგიური პასუხი გაგვცეს საქართველოს მთავრობის კანცელარიაშიც: "აღნიშნულ საკითხზე მთავრობის მხრიდან არანაირი ცვლილებები არ მიმდინარეობს და არც კი განიხილება რაიმე თემა ამასთან დაკავშირებით" _ განაცხადეს ჩვენთან საუბრისას.
