ტელეკომპანია "მაესტრო“ ჟურნალისტებმა დატოვეს. მათ შორის, გადაცემა "სუბიექტური აზრის“ წამყვანებმა_ დიანა ტრაპაიძემ და თეონა გეგელიამ, და ჟურნალისტმა მაკა ცინცაძემ.
დიანა ტრაპაიძე ტელეკომპანიიდან წასვლის მიზეზებზე არ საუბრობს. დეტალებზე საუბარი არც თეონა გეგელიას სურს, რომელიც სოციალურ ქსელში მცირე კომენტარით შემოიფარგლა:
"ჟურნალისტებს სჭირდებათ დაცვა არა მხოლოდ პოლიტიკოსებისგან, არამედ უნიჭო, უცოდინარი და არაკომპეტენტური მმართველებისგანაც. ჩვენ გვინდოდა "მაესტროში" მუშაობა. ძალიან ვწუხვარ, ძალიან”.
ამ თემაზე სიტყვა უხვი არც მაკა ცინცაძეა, რომელიც "გურია ნიუსთან“ საუბრისას ამბობს, რომ მისთვის ტელეკომპანიის მართვის ფორმა მიუღებელი იყო:
_ მართვის ფორმა არ იყო ჩემთვის მისაღები. ნებისმიერს აქვს უფლება, შეხედულებისამებრ მართოს საკუთარი კომპანია. ასევე, დასაქმებულსაც აქვს არჩევნი სუფლება. ეს არ არის ერთი და ორი დღის თემა. ერთი უკმაყოფილების გამო სამსახურს და მით უფრო, "მაესტროს" არავინ დატოვებს.
_ რა იყო თქვენი წამოსვლის კონკრეტული მიზეზი ანუ "ბოლო წვეთი"?
_ გასულ კვირას უკვე გადაწყვეტილი მქონდა ტელევიზიის დატოვება და ხუთშაბათს დავტოვე. ბევრი ნიუანსიიყო. თუმცა, ამ ეტაპზე დაკონკრეტებისგან თავს შევიკავებ.
_ გავრცელებული ინფორმაციით, ხელმძღვანელობა სარედაქციო საქმიანობაში ერეოდა
_ არა, ტყუილია.
_ ჩვენი ინფორმაციით, "მაესტროდან" ჟურნალისტების წამოსვლის მიზეზი დავით კეზერაშვილი გახდა. უფრო სწორად, მის მიერ ტელეკომპანიაში ფინანსების ჩადება..
_ ალბათ, სარეკლამო დროის შესაძლო გაყიდვას გულისხმობთ. არ ვიცი. განმარტებისთვის კოტე გოგელიას დაუკავშირდით, _ გვითხრა ცინცაძემ.
"გურია ნიუსმა“ კოტე გოგელიასთან დაკავშირება ვერ მოახერხა _ ტელეკომპანიის ერთ-ერთი მფლობელი მიუწვდომელია. სატელეფონო ზარებს არც "მაესტროს“ გენერალური დირექტორი ბაია გაბადაძე პასუხობს.
