ოზურგეთის მუნიციპალიტეტის თანამდებობის პირების შემდეგ, ხელფასების გაზრდას ქალაქ ოზურგეთის მერიისა და საკრებულოს ჩინოვნიკები ითხოვენ.
ახალი თანამდებობრივი სარგოები ასე გამოიყურება: ქალაქ ოზურგეთის მერი და საკრებულოს თავმჯდომარე _ 2 7 50 ლარი; ქალაქ ოზურგეთის საკრებულოს თავმჯდომარის მოადგილე _ 2 250 ლარი; კომისიის თავმჯდომარე _ 1 650 ლარი; ფრაქციის თავმჯდომარე _ 1 650 ლარი; აპარატის უფროსი _ 1500 ლარი; საკრებულოს თავმჯდომარის თანაშემწე _ 1100 ლარი; იგივე ხელფასი სურს მერის თანაშემწესაც. მთავარი სპეციალისტის ხელფასი ქალაქ ოზურგეთში 800 ლარი უნდა გახდეს; უფროსი სპეციალისტის_ 650 ლარი;
ამ საკითხზე ქალაქ ოზურგეთის საკრებულომ უკვე დაიწყო ადმინისტრაციული წარმოება.
გასულ კვირას, ქალაქ ოზურგეთის საკრებულოს სხდომაზე ერთ-ერთი აქტუალური საკითხი კოსტავას ქუჩაზე მდებარე, წმინდა გაბრიელ ეპისკოპოსის სახელობის სამრევლო სკოლასთან ცოტა ხნის წინ აღებული ხელოვნური ბარიერი იყო. ამ საკითხის განხილვას ოზურგეთის მერს ბეგლარ სიორიძეს და საკრებულოს დეპუტატ ლევან მგელაძეს შორის დებატები მოჰყვა.
გასულ კვირას ერთ-ერთი აქტუალური თემა ტენდერები გახლდათ. უფრო კონკრეტულად კი ჩოხატაურის მუნიციპალიტეტის კულტურის სახლის შეჩერებული მშენებლობა, რომლის მიზეზიც ტენდერში გამარჯვებული კომპანიის მიერ შეუსრულებელი ვალდებულებია. ადგილობრივმა ხელისუფლებამ კომპანიას ხელშეკრულება შეუწყვიტა და როგორც ცნობილი იყო, ახალ კომპანიასთან ხელშეკრულება ერთ პირთან მოლაპარაკების წესით უნდა გაფორმებულიყო. თუმცა, გურიის გუბერნატორი გიორგი ჩხაიძე ამბობს, რომ გამოყოფილ თანხაში სამუშაოების შესრულებაზე სერიოზული კომპანიები უარს ამბობენ.
ამ ყველაფერის ფონზე დაისვა საკითხი, რომ არსებული პროექტი შეიცვალოს. ამის მომხრე ჩოხატაურის მაჟორიტარი დეპუტატი თემურ ჭკუასელიცაა, რომლის თქმით, ტენდერებთან მიმართებაში კანონმდებლობა გადასახედია.
"კვირის თემა" შეეცადა, ამ საკითხზე ჩოხატაურის მუნიციპალიტეტის ხელმძღვანელებთან ერთად ემსჯელა, თუმცა გამგებელმა ირაკლი კუჭავამ გვითხრა, რომ თემაზე მას შემდეგ ისაუბრებს, როცა დეტალებში გაერკვევა.
ანალოგიური პრობლემაა ლანჩხუთშიც, სადაც კომპანია "ჯიაიდის" ხელშეკრულება შეუსრულებელი ვალდებულებების გამო შეუწყვიტეს. კომპანიას რამდენიმე ქუჩის რეაბილიტაციის სამუშაოები უნდა შეესრულებინა, თუმცა, ხელშეკრულებით გათვალისწინებული თანხის 80 პროცენტი აუთვისებელია, ლანჩხუთის რამდენიმე ქუჩა კი _ გადათხრილი. ლანჩხუთის ხელისუფლებას, ამ ეტაპზე, არ აქვს პასუხი, რა ფორმით მოხდება ახალი კომპანიის შერჩევა. მდგომარეობით შეწუხებული მოსახლეობა კი გადაწყვეტილების მოლოდინშია.
რაც შეეხება სპორტულ სიახლეებს _ ოზურგეთის ცენტრალურ სტადიონზე "მერცხალი2"-მა "ბახმაროს" უმასპინძლა. თამაში საკმაოდ დაძაბულად მიმდინარეობდა _ მასპინძლებმა პირველ ტაიმში სტუმრებს 3 გოლი გაუტანეს, თუმცა ჩოხატაურელებმა მეორე ტაიმში ძალები არ დაზოგეს და საბოლოოდ ანგარიში გაათანაბრეს. 3:3 _ ამ შედეგით დასრულდა "მერცხალი 2"-სა და "ბახმაროს" შერკინება, რამაც გუნდებს თითო ქულა მოუტანა.
მინიმალური ანგარიშით მოიგო საკუთარ მოედანზე ლანჩხუთის "გურიამ" _ გურულებმა ბათუმის დინამოს 39-ე წუთზე გიორგი მიქაბერიძის მიერ გატანილი გოლით აჯობეს.
ამ გამარჯვებით უმაღლეს ლიგაში მოასპარეზე "გურიამ" სატურნირო ცხრილში მეექვსე ადგილზე გადაინაცვლა.
გადაცემის მეორე ბლოკის სტუმრები "ნაციონალური მოძრაობის" წევრები ოთარ რევიშვილი და მამუკა ბარამიძე იყვნენ.
"ნაციონალურმა მოძრაობამ" ფართომაშტაბიანი აქციები უკვე დააანონსა. ისინი იმედოვნებენ, რომ მათ სხვა პარტიებიც შეურთდებიან. თუმცა, როგორც გადაცემის სტუმრებმა აღნიშნეს, არიან პარტიები, რომლებთან თანამშრომლობაზეც "ნაციონალური მოძრაობა" თავად ამბობს უარს.
გადაცემაში საუბარი მერიაში მიმდინარე საკადრო ცვლილებებსაც შეეხო. მათ შორის მედიით გავრცელებულ ინფორმაციას, რომლის თანახმადაც, ქალაქ ოზურგეთის მერმა დასუფთავების საკითხებში მრჩეველად ზაურ ქობულაძე დანიშნა. გადაცემა დასრულებული იყო, როცა მერიამ განცხადებაა გაავრცელა, სადაც აღნიშნულია: "ქალაქ ოზურგეთის მერის მრჩევლად დასუფთავების საკითხებში არავინ დანიშნულა, გავრცელებული ინფორმაცია არასწორია _ ზაურ ქობულაძე დაინიშნა კონსულტანტად მერიის დაქვემდებარებაში მყოფ "ა(ა) იპ "დასუფთავების სამსახურში".
"კვირის თემის" ნახვა შეგიძლიათ აქ.
მომავალი გადაცემის სტუმარი ქალაქ ოზურგეთის მერი, ბეგლარ სიორიძე იქნება, რომელიც ჩვენს გადაცემაში დასმულ ყველა შეკითხვას უპასუხებს.
შეკითხვების მოწოდება შეგიძლიათ "გურია ნიუსის" ოფისებში, ფეისბუქის ოფიციალურ გვერდზე და ელექტრონული ფოსტის მეშვეობით.
