(კახეთის საინფორმაციო ცენტრი) _ 16 ოქტომბერს, საღამოს, სოციალურ ქსელ Facebook-ზე ლაგოდეხში ტუალეტის საზეიმოდ გახსნის კადრები გავრცელდა. ორმა ადგილობრივმა ტუალეტის წინ წითელი ლენტი გაჭრა და ლაგოდეხელებს კიდევ ერთი “ტურისტული“ ობიექტის გახსნა მიულოცა. ვიდეო რამდენიმე საათში წაიშალა. კახეთის საინფორმაციო ცენტრის ინფორმაციით, ავტორს ვიდეოს წაშლა ლაგოდეხის გამგეობიდან მოსთხოვეს.
წაშლამდე კახეთის საინფორმაციო ცენტრმა ვიდეოს გადმოწერა მოასწრო, რის შემდეგაც ის youtube-ზე ატვირთა.
“ეს აუცილებლად უნდა შევინახოთ… ბევრს გონია საქართველოში ჩვენს მტრებს, რომ დაიქცა ჩვენი ქვეყანა. სინამდვილეში ლაგოდეხის რაიონი იმდენად პერსპექტიული რაიონია ტურიზმის მხრივ, რომ მრავალი ასეთი ობიექტი იხსნება. თქვენ წარმოიდგინეთ რამხელა ინვესტიციაა ჩადებული ამაში? რამხელა ინვესტიცია.. ვერ წარმოიდგენთ…
– ბატონო ნოდარ, ეს საუკუნის პროექტი დიდი ხანია მზადდებოდა?
– სიმართლე გითხრათ, ეს დიდი ხნის ჩანაფიქრი იყო. უბრალოდ, ხარისხიანად რომ გაკეთდა, დიდი დრო დაჭირდა. ბევრს ეგონა, რომ დაეცემოდა ჩვენი ქვეყანა, მაგრამ ნურას უკაცრავად!
თქვენ შეგიძლიათ, ოპერატორებმა, გადაიღოთ ეს მთები. ყველაფერი ეს ხდება ლაგოდეხში. მრავალი ქვეყნიდან ჩამოდიან აქ ტურისტები, დამსვენებლები და რაც მაღალი იქნება მომსახურების ხარისხი, ჩვენ მივიზიდავთ ტურისტებს და ამით აღორძინდება ჩვენი ქვეყანა. უბრალოდ ტელევიზორს უყურეთ და მიხვდებით, ჩამოშლის პირზეა საფრანგეთი, იტალია, საბერძნეთი, ამერიკა, ჩინეთი, იაპონია. ჩვენი ქვეყანა ყვავის და წინ მიდის. აი, ფაქტი სახეზეა”, – აღნიშნავს მამაკაცი, რომელმაც ტუალეტის წინ წითელი ლენტი გაჭრა.
კახეთის საინფორმაციო ცენტრი დაინტერესდა, ვინ არიან ის ადამიანები, ვინც ტუალეტი საზეიმოდ გახსნეს, ვიდეო გადაიღეს, გაავრცელეს და შემდეგ წაშალეს.
ვიდეო Facebook-ზე მიშა სიყმაშვილმა განათავსა, რომელიც ქალაქ ლაგოდეხში ცხოვრობს და კომპანია “მაგთიკომის” ლაგოდეხის ოფისში მუშაობს. კახეთის საინფორმაციო ცენტრის ინფორმაციით, ვიდეოს წაშლა მიშა სიყმაშვილს ლაგოდეხის მუნიციპალიტეტის გამგეობიდან მოსთხოვეს. ამ საკითხზე გამგეობაში კომენტარს არ აკეთებენ.
ტუალეტი, რომელიც საზეიმოდ გახსნეს, მიშა სიყმაშვილის საცხოვრებელი სახლის ეზოშია აშენებული. სათვალეებიანი მამაკაცი, რომელიც ვიდეოში ტუალეტის გახსნას “საუკუნის პროექტს” უწოდებს, მიშა სიყმაშვილის მამა, გია სიყმაშვილია. იგი ლაგოდეხის საგზაო სამსახურის ბუღალტერია.
“მე და ჩემს ბიძაშვილს ერთი ეზო გვაქვს. ის აქაც ცხოვრობს და რუსთავშიც. 10 წელი არ ჰქონდა ტუალეტი ეზოში. ააშენა და ვიდეო გადაიღო. თავის ძმას გაუგზავნა, რომელიც საზღვარგარეთ არის”, – განუცხადა გია სიყმაშვილმა კახეთის საინფორმაციო ცენტრს.
– ზეწოლა ხომ არ განხორციელდა თქვენზე ან თქვენს შვილზე?
– არა, არავითარი ზეწოლა. ვიხუმრეთ კაცო, მეტი არაფერი. ნასვამები ვიყავით და ვიხუმრეთ”.
კახეთის საინფორმაციო ცენტრის გადამოწმებული ინფორმაციით, ვიდეოს გავრცელების გამო, სამსახურიდან გათავისუფლებით დაემუქრნენ როგორც გია და მიშა სიყმაშვილებს, ასევე მათ ახლობლებს, თუმცა ამ საკითხზე ისინი არ საუბრობენ. გია სიყმაშვილის და – ირმა სიყმაშვილი ლაგოდეხის სკოლამდელი სააღმზრდელო დაწესებულებების გაერთიანების უფროსია. ირმა სიყმაშვილის მეუღლე კახა წვერავა სამართალდამცავ ორგანოებში მუშაობს. კახა წვერავას ძმა – გია წვერავა ლაგოდეხის მუნიციპალიტეტის გამგებლის მოადგილეა. კახეთის საინფორმაციო ცენტრის ინფორმაციით, “ახლობლების ოპოზიციური განწყობის” გამო გია წვერავას უსაყვედურეს. კახეთის საინფორმაციო ცენტრი არაერთხელ შეეცადა გია წვერავასთან დაკავშირებას, თუმცა იგი სატელეფონო ზარებს არ პასუხობს.
ნინო კორაშვილი | კახეთის საინფორმაციო ცენტრი
