გასული კვირის ყველაზე მნიშვნელოვან მოვლენად ოზურგეთში, გურიის გუბერნატორის, გიორგი ჩხაიძის მიერ დაანონსებული თემა იქცა _ გუბერნიის ახალი შენობის კულტურისა და დასვენების პარკში ჩადგმის იდეა …
"გურიის გუბერნატორის, გიორგი ჩხაიძის ინფორმაციით, სამხარეო ადმინისტრაციისთვის ცალკე შენობა აშენდება:
_ მიმდინარეობს მსჯელობა, რომ გუბერნიისთვის აშენდეს ცალკე ადმინისტრაციული შენობა და იქ გადავიდეთ. ამ საკითხთან დაკავშირებით საბოლოო დეტალები ზუსტდება. აქვე გეტყვით იმასაც, რომ შენობა ოზურგეთში, კოსტავას ქუჩაზე მდებარე კულტურისა და დასვენების პარკის მიმდებარე ტერიტორიაზე განთავსდება, _ გვითხრა გუბერნატორმა.
უკვე ცნობილია შენობის დიზაინი, რომელიც "გურია ნიუსს" ექსკლუზიურად მიაწოდეს. გუბერნატორის ინფორმაციით მშენებლობა 2015 წლისთვის უნდა დასრულდეს." _ ეს ინფორმაცია პირველად სწორედ ჩვენი სააგენტოს საშუალებით გავრცელდა. მოგვიანებით, გუბერნატორის მიერ დაანონსებული შენობის ადგილი და მაკეტი სხვა ადგილობრივი მედიასაშუალებებითაც გავრცელდა.
თუმცა, გუბერნატორის იდეა, მასში ჩადებული "ბონუსის" მიუხედავად, რომ პარკს ამ პროექტის ფარგლებში სარეაბილიტაციო სამუშაოები ჩაუტარდებოდა, ოზურგეთის მოსახლეობის დიდი ნაწილისთვის არგუმენტი სულაც არ აღმოჩნდა. ისინი პარკის ტერიტორიის თუნდაც გარკვეული ნაწილის გამოყოფას ადმინისტრაციული შენობისთვის აბსოლუტურად გაუმართლებლად მიიჩნევენ.
"გურიის მხარეში სახელმწიფო რწმუნებულის-გუბერნატორის ადმინისტრაცია, ოზურგეთის მუნიციპალიტეტის საკრებულო, გამგეობა და ქალაქ ოზურგეთის საკრებულო და მერია ერთ ადმინისტრაციულ შენობაშია განთავსებული. ფართის სიმცირის გამო იგეგმება გურიის სამხარეო ადმინისტრაციისთვის ახალი შენობის აშენება. ოფიციალური ინფორმაციით, შენობა კულტურისა და დასვენების პარკში 1600მ2 ფართობზე უნდა განთავსდეს. ამჟამად კულტურისა და დასვენების პარკი ქალაქის ტერიტორიაზე არსებული ერთადერთი ბავშვთა გასართობი პარკია.
კულტურისა და დასვენების პარკი ქალაქის ერთ-ერთი უძველესი ბაღია, რომელიც 1930-იან წლებში გაშენდა და მასში მრავალწლიანი ნარგავებია დაცული. პარკის ტერიტორია შემცირდა 1957 წელს ლენინის ძეგლისა და მოედნის მოწყობის გამო." _ ამ შინაარსის განცხადება-ანონსით გამოეხმაურა რამდენიმე დღის წინ ოზურგეთის დემოკრატიული ჩართულობის ცენტრი გიორგი ჩხაიძის ინიციატივას. მაღალი საზოგადოებრივი ინტერესებიდან გამომდინარე, დღეს 13:00 საათზე სწორედ დემოკრატიული ჩართულობის ცენტრის ორგანიზებით იმართება საჯარო დისკუსია გუბერნიის ახალი შენობის შესახებ.
დისკუსიის მიზანია განიხილოს ახალი ადმინისტრაციული შენობის მშენებლობის საჭიროება, დაფინანსების წყაროები და პარკის ტერიტორიაზე მისი განთავსების მიზანშეწონილობა.
"გურია ნიუსი" ამ კითხვებით რამდენიმე ხნით ადრე დაინტერესდა. საკითხის გარკვევა ყველა იმ მხარესთან ვცადეთ, რომელიც ამ პროცესში წესითა და რიგით ჩართულები უნდა ყოფილიყვნენ.
ვინაიდან გუბერნიის ახალი შენობის აშენება კულტურისა და დასვენების პარკში დაანონსდა, პირველ რიგში კითხვებით მივმართეთ მერიას, მოხდა თუ არა აღნიშნული საკითხის განხილვა მათთან. მოგეხსენებათ, რომ აღნიშნული ტერიტორია წარმოადგენს ქ. ოზურგეთის მუნიციპალიტეტის საკუთრებას.
როგორც ოზურგეთის მუნიციპალიტეტის მერიის პასუხიდან ირკვევა, გუბერნიის მხრიდან მათთან არანაირ შეთანხმებას ადგილი არ ჰქონია.
ოზურგეთის მუნიციპალიტეტის მერია:
1.აღნიშნული საკითხის არამცთუ განხილულა, საქმის კურსშიც კი არ გახლდათ ქალაქის მერია.
2.არანაირი სახის კორესპოდენცია აღნიშნულ თემასთან დაკავშირებით, მერიასა და გუბერნიას შორის არ არსებობს.
3. ის რომ გუბერნიისთვის შენობა შენდება პარკის ტერიტორიაზე, ჩვენთვის ცნობილი გახდა გადაცემიდან "ექსკლუზივი", სადაც გუბერნატორი საუბრობდა ამ თემის შესახებ. აღსანიშნავია ის გარემოება, რომ აღნიშნული ტერიტორია წარმოადგენს ქალაქ ოზურგეთის მუნიციპალიტეტის საკუთრებას, სადაც განთავსებულია ა(ა)ი.პ "ქალაქ ოზურგეთის მუნიციპალიტეტის კულტურისა და დასვენების პარკი".
4. თუ რა თანხა იქნა გამოყოფილი და საიდან, ამის შესახებ მერია მითუმეტეს არ გახლავთ საქმის კურსში.
რადგან გარკვეულ პროექტებს რეგიონული განვითარებისა და ინფრასტრუქტურის სამინისტრო აფინანსებს, გადავწყვიტეთ, ინფორმაცია მათთანაც გადაგვემოწმებინა.
რეგიონული განვითარებისა და ინფრასტრუქტურის სამინისტრო:
მინისტრის მრჩევლის მაია გვენეტაძის განცხადებით, აღნიშნული შენობა არავითარ შეხებაში არ არის რეგიონული განვითრებისა და ინფრასტრუქტურის სამინისტროსთან, მსგავსი სახის პროექტი მათთან არც შესულა და არც განხილულა. შესაბამისად, არც მაკეტის და არც დაფინანსების წყაროების შესახებ არაფერი იციან. "რადგან გუბერნატორის ინსტიტუტი უშუალოდ პრემიერის დაქვემდებარებაში შედის, სავარაუდოდ, მთავრობის კანცელარია უნდა იყოს საქმის კურსში" _ გაგვიცხადეს ინფრასტრუქტურის სამინისტროში.
მთავრობის კანცელარია
ინფორმაცია მთავრობის კანცელარიაშიც გადავამოწმეთ. კანცელარიის განმარტებით, აცხადებენ, რომ გუბერნიის შენობასთან დაკავშირებით ისინი საქმის კურსში არ არიან და შესაბამისად არც დაფინანსების წყაროების შესახებ იციან რამე.
სახელმწიფო რწმუნებულის -გუბერნატორის ადმინისტრაცია
"გურია ნიუსმა" კითხვებით გურიის გუბერნატორის ადმინისტრაციას მიმართა.
კითხვაზე, თუ ვის ბალანსზე იყო ტერიტორია, რომელზედაც გუბერნია თავისთვის ახალი შენობის აშენებას აპირებდა და მიღებული ჰქონდათ თუ არა მისი გამოყენების შესახებ თანხმობა, ასეთი პასუხი მივიღეთ.
სახელმწიფო რწმუნებულის -გუბერნატორის ადმინისტრაცია: "როგორც თქვენი შეკითხვიდან ირკვევა, პარკის მიმდებარე ტერიტორია დასახელდა გუბერნატორის ადმინისტრაციული შენობის განსათავსებლად ერთ-ერთ სავარაუდო ადგილად. საკითხი განხილვის პროცესშია, შესაბამისად, შეთანხმებას აღნიშნული ტერიტორიის გამოყენების შესახებ ადგილი არ ჰქონია. რაც შეეხება იმ საკითხს, თუ ვის ბალანსზეა პარკის ტერიტორია, აღნიშნული ინფორმაციის მისაღებად თქვენ შეგიძლიათ მიმართოთ საჯარო რეესტრს ან მოიძიოთ თქვენთვის სასურველი ინფორმაცია ოფიციალურ ვებგვერდზე www. napr. gov.ge"
(აღნიშნული ვებგვერდი გუბერნატორის ადმინისტრაციამ მიგვითითა, რისთვისაც მას მადლობას ვუხდით. ავტ)
რაც შეეხება ჩვენს მეორე კითხვას: _ რა თანხა იქნა გამოყოფილი მთლიანად აღნიშნული პროექტის განსახორციელებლად და ვინ გამოყო ეს თანხა?
გუბერნატორის ადმინისტრაცია: "რაც შეეხება თქვენს მეორე შეკითხვას, ვინაიდან საკითხი ჯერ განხილვის პროცესშია, პროექტი მზად არ არის, შესაბამისად თანხის გამოყოფასაც ადგილი არ ჰქონია."
მესამე კითხვა : ვისი ან რომელი სამსახურის მიერ დამზადდა თქვენს მიერ წარმოდგენილი მაკეტი და საიდან იქნა თანხა გამოყოფილი?
გუბერნატორის ადმინისტრაცია: შენობის მაკეტი არ არსებობს, მედიის საშუალებით გავრცელებული შენობის ზოგადი მონახაზი შეიქმნა ერთ-ერთი დიზაინერის მიერ და ჯერ არაა გადაწყვეტილი, თუ რა ფორმის იქნება საბოლოოდ დაპროექტებული შენობა.
როგორც თავად გუბერნატორის ადმინისტრაციის პასუხებიდან ირკვევა, რეალურად და ოფიციალურად არც მაკეტი არსებობს, არც თანხაა გამოყოფილი და არც შეთანხმება მომხდარა ვინმესთან ამასთან დაკავშირებით, თუმცა მანამდე, სანამ ჩვენ ამ წერილით მივმართავდით გუბერნატორის ადმინისტრაციას, მათი მხრიდან საკმაოდ კონკრეტული ინფორმაცია ვრცელდებოდა, მაგალითად შენობის ფართად, 1600 კვადრატული, დასრულების წლად 2015 წელი და ასე შემდეგ…
ვის ჭირდება რეალურად ახალი შენობა და რა მდგომარეობაა ამ მხრივ მუნიციპალიტეტის მერიასა და გამგეობაში ამის შესახებ სხვადასხვაგვარი მოსაზრება არსებობს, თუმცა უხეშად რომ ვთქვათ, გუბერნიასთან შედარებით ხუთჯერ მეტი თანამშრომელი გამგეობას ჰყავს და დაახლოებით სამჯერ მეტი მერიას.
უფრო დეტალურად ამ თემებზე "გურია ნიუსი" გადაცემა "კვირის თემაში ისაუბრებს, ასევე დემოკრატიული ჩართულობის ცენტრში დღევანდელი საჯარო დისკუსიის შემდეგ გახდება ცნობილი, სადაც ოზურგეთის მოსახლეობა მიწვეულ სტუმრებთან ერთად საკუთარ აზრს დააფიქსირებს.
