“გურია ნიუსის” ოზურგეთის განყოფილებაში ახალ სავაჭრო ცენტრში (ყოფილი აგრარული ბაზრის ტერიტორია) მოვაჭრე შოთა შაქარიშვილი დახმარებისთვის მოვიდა. მან ჯერ თავისი გასაჭირის შესახებ ისაუბრა, შემდეგ კი გვთხოვა, ოზურგეთის მუნიციპალიტეტის გამგეობის ზედამხედველობის სამსახურში გავყოლოდით.
_ ძალიან გთხოვთ, დააფიქსირეთ ჩვენი შეხვედრა. გვინდა, თქვენთან ერთად გაგვცენ პასუხი იმ კითხვებზე, რომლებიც ამ გაჭირვებულ ადამიანებს გვაწუხებს, _ გვითხრა მან.
ოზურგეთის მუნიციპალიტეტის გამგეობაში მისულებს ზედამხედველობის სამსახურის უფროსმა, შუქრი გაბრიჩიძემ ჟურნალისტებს გაკვირვებით შემოგვხედა: _ ჟურნალისტები რატომ მოვიდნენ? პრესკონფერენციაა თუ რა ხდება? ასე არ ხდება, მაშინ პრესსამსახურს უნდა მიმართოთ ოფიციალურად. ჩვენთან ასეთ შეხვედრებს ჟურნალისტები არ ესწრებიან.
შემდეგ საუბარი ზედმეტ უხამსობასა და ერთმანეთის მიმართ აგრესიაში გადაიზარდა და რამდენიმე წუთი გამგეობის ზედამხედველობის სამსახურის ოთახი იქცა “ბაზრად”.
შოთა შაქარიშვილი: _ 65 წლის კაცი ვარ. ჯერ ჩემთვის დედა არავის შეუგინებია. 300 ძირი კიტრი და 400 ძირი სოხვი მაქვს ჩემს საკარმიდამოში მოწეული. იმას ხომ სჭირდება შრომა და მოვლა-პატრონობა? გეკითხებით, სად წავიღო? ჩვენ წამოვიყვანეთ, ჩვენ შევაწუხეთ ჟურნალისტი. ვიცი, უნდა დავტოვო ოზურგეთი. თქვენ რომ გითხრან, აქ თქვენი ადგილი არ არის და წადით, გადით ოთახიდან და მე უნდა შევიდეო, კარგი იქნება? _ ჰკითხა მან გაბრიჩიძეს.
გაბრიჩიძე: _ გავიდე? რას ჰქვია, გავიდე?
_ მე იმიტომ მოვიყვანე ჟურნალისტი, რომ მოისმინოს და დაესწროს ჩვენს შეხვედრას, _ უთხრა შეწუხებულმა შაქარიშვილმა.
გაბრიჩიძე: _ მე ვაკეთებ ჩემს საქმეს და ვასრულებ მოვალეობას. მე, მაგალითად, სულ არ მიყვარს წამდაუწუმ “რემენის” გადაჭიმვა მანქანაში, მაგრამ კანონია და ვემორჩილები.
_ მაინტერესებს, რა ინტერესი გქონდათ ისეთი, 500 ლარით რომ დამაჯარიმეთ უკანონოდ? ვთხოვ ჟურნალისტს, დამიფიქსიროს ყველაფერი, _ ამბობდა ერთ-ერთი მოვაჭრე.
_ თქვენ იტყუებით, მატყუარები ხართ. რატომ ატეხეთ ასეთი ამბავი და რატომ შეძარით ქვეყანა?! _ საჯარო მოხელისთვის შეუფერებლად თავს იმართლებდა ზედამხედველობის სამსახურის უფროსი.
_ ძალიან კარგი, თუ მე შევძარი ყველაფერი. ყველაფერს გავაკეთებთ თავის დასაცავად. გვინდა, ჟურნალისტმა გააგებინონ ყველას! რა პასუხს გვაძლევთ _ სად წავიდეთ?! _ პასუხს სთხოვდნენ მოვაჭრეები გაბრიჩიძეს.
_ პროფესიით ინჟინერ-მექანიკოსი ვარ. ოცი წელია ბაზარში ვმუშაობ, ვყიდი საკუთარ ოჯახში მოწეულ ბოსტნეულს. ამ ხნის განმავლობაში ბევრი გაჭირვება ვნახე, პროდუქტიც გამიფუჭდა, მაგრამ არავინ შემიწუხებია. გააკეთეს ახალი ბაზარი. კი ბატონო, არ ვარ ვაპირებ, რომ კანონს გავექცე, მაგრამ ის პირობები, რასაც მთავაზობდნენ, ჩემთვის მიუღებელი იყო. საქმეში პოლიციაც ჩაერთო. მივედი ახალი ბაზრის დირექტორთან, სირაძესთან და ვუთხარი, გადმოვალ შენთან და კარგი ადგილი შემირჩიე,-მეთქი, მან კი უარით გამომისტუმრა. იმის მერე ისევ ძველ ადგილზე ვარ. ახლა მოდის გაბრიჩიძე და გვაფრთხილებს, წადით აქედანო. მე ვუთხარი, რომ ჩემი პროდუქტი დახურულში არ შეიტანება და გთხოვ, გაითვალისწინე,-მეთქი. მაშინ წაბრძანდი და ოჯახში დასაქმდიო, მითხრა. მე ესენი რას მასწავლიან, რა უნდა ვქნა? ჩემი ოჯახი მრავალსულიანია, მყავს პატარა შვილიშვილები. პური თუ არ მივიტანე, ისე როგორ მივიდე სახლში? გვეუბნებიან, სადაც გინდათ, იქ წადითო. მომთაბარეები ხომ არ ვართ?! ასეთი რამე შეიძლება?! _ ამბობს შაქარიშვილი.
_ შობის ღამეს რომ ნაგავი დაყარეს ბაზარში, ამას ქრისტიანი კაცი გააკეთებდა? იცით, მაშინ რა გავაკეთეთ? მოვაყარეთ იმ მიწას ქინძის და მაკიდოს თესლი, ლობიო და პომიდორი დავრგეთ, ყველაფერმა გაიხარა. მე არ შემიძლია ჩივილი და აქეთ-იქით სირბილი. მოდიან და მაფრთხილებენ, აქ არ მოხვიდეო. იცით, თქვენ რა დამიჯდა ამ ბოსტნეულის მოწევა? სად წავიღო ახლა? აქ თუ ვერაფერს მივაღწიეთ, წავალთ თბილისში და დავიქირავებთ ადვოკატებს. აქაური ადვოკატების არ გვჯერა, ესენი ყველა ერთი არიან, _ ამბობენ მოვაჭრეები.
ოზურგეთის მუნიციპალიტეტის გამგეობის ზედამხედველობის სამსახურის უფროსი შუქრი გაბრიჩიძე “გურია ნიუსთან” ასეთ კომენტარს აკეთებს: _ ჩვენ კანონის დაცვას ვითხოვთ, ვეუბნებით, რომ სანამ კანონს არ დაიცავენ, მანამ იქნება ასეთი ამბავი _ მიმართვა, გაფრთხილება, დაჯარიმება კანონის გათვალისწინებით. რა თქმა უნდა, თუ მოაწესრიგებენ და ნებართვას მოიპოვებენ, სადაც ვაჭრობენ, ამ შემთხვევაში, ჩვენ მათ მივცემთ ნებართვას. ჩვენ “დავდევთ” ისეთებს, ვისაც ნებართვა არ აქვთ, ანუ ვინც კანონს არღვევს. როცა მიუვათ სასამართლოდან დაჯარიმების უწყება, მიმართონ ისევ სასამართლოს. თუ მოიგებენ და დაამტკიცებენ თავიანთ სიმართლეს, ღმერთმა შეარგოთ. მაგათ არავინ არ შეაქებთ კანონის დარღვევისთვის და არც ჩვენ გვეტყვიან, კარგი ბიჭები ხართო. მოაწესრიგონ კანონით ყველაფერი, აიღონ არენდით, გააკეთონ მაღაზია.
_ მათ არ აქვთ მაღაზიის აშენების შესაძლებლობა…
_ მაშინ ჩვენ რა ვქნათ, კანონს არ დავემორჩილოთ? რა განსხვავებაა, აქ დაარღვევ კანონს თუ პოლიციაში? კანონი ყველასთვის ერთია.
_ როცა ადამიანს დიდი რაოდენობით პროდუქტი გაუფუჭდება, რა უნდა ქნას?
_ თუ ბოსტნეული გაუფუჭდება, ამიტომ უნდა იჯდეს გზაზე და ისე გაყიდოს? ეგ, რაც თავი მახსოვს, ასე უწესრიგოდ ყიდის. თქვენ მოგწონთ ქუჩაში გაყიდული თევზი და მწვანილი? კი, ბატონო, ცოდოები არიან, მაგრამ იმ ადამიანებმა რა დააშავეს, ვინც ახალ ბაზარში ზის და გადასახადს იხდის? კანონს დაემორჩილნენ ისინი, _ ამბობს გაბრიჩიძე, თუმცა, არ აკონკრეტებს, კონკრეტულად რომელ კანონს არღვევენ მოვაჭრეები.
_ დანგრეულ მაგიდასთან ზიხარ. იმის ფული ვერ გიშოვია, მაგიდა გააკეთო. ამიტომ აგერ არის სავაჭრო ცენტრი, რომელსაც ჰყავს დირექტორი, მიხვალ მასთან და ითხოვ დახმარებას. მერე გამგეობაში დაწერ განცხადებას ადგილის გამოყოფის თაობაზე, თუ აქვთ საშუალება, მოგცემენ, _ მიმართა გაბრიჩიძემ შაქარიშვილს.
_ არ მოგვცემენ. იქ ადგილები მხოლოდ ერთი პიროვნებისაა _ ავთო მკურნალიძის. ჩვენნაირს არ მიუშვებენ ამ ადგილზე, იქ მკურნალიძისაა ყველაფერი! იჯარა მინდაო, თუ ეტყვი, ვერ მოგცემენ, გეტყვიან _ მკურნალიძისააო, ვინ იყიდა? _ მკურნალიძემ, ვისი ობიექტი შენდება? _ მკურნალიძის, ასეა ეს! _ თქვეს მოვაჭრეებმა.
_ იბრძოლეთ და იქნებ მოგცენ, კაცო! _ ამ სიტყვებით დამთავრდა ზედამხედველობის სამსახურის უფროსისა და მოვაჭრეების შეხვედრა.
“გურია ნიუსი” შეეცადა, კომენტარი თავად ავთო მკურნალიძისგან მიეღო: _ ეს არის სახელმწიფო ქონება. მე მაქვს აღებული 172 კვადრატული მეტრი ფართი და მეტი არაფერი. არც ერთ მოვაჭრესთან შეხება და კავშირი არ მაქვს. ნუ აკეთებ ჩანაწერს, მე ვიცი, რასაც ვაკეთებ. ავიღე იჯარით ფართი, რომელიც დამწვარი იყო, სურათებსაც წარმოგიდგენთ, და აღვადგინე. მიწა სახელმწიფოსია და არაფერი კავშირი არ მაქვს არც ერთ მოვაჭრესთან. პატარა მაღაზიები ყველა იჯარით არის გაცემული. ვინც თქვენთან იყო მოსული, მათ რაღაც მიზანი ამოძრავებთ. თუ ვინმეს რაიმე აინტერესებს, მოვიდეს თქვენთან ერთად, ნახეთ ფაქტი ადგილზე და ისე დაწერეთ, თუ რაიმე დასაწერია, _ ჭკუა დაგვარიგა მკურნალიძემ.
ამასობაში გარემოვაჭრეები კვლავ უიმედო მდგომარეობაში რჩებიან და წინააღმდეგობის გასაწევად ემზადებიან.
