პოლიტოლოგ სოსო ცისკარიშვილის თქმით, პრემიერ-მინისტრის მხრიდან თავდაცვის მინისტრის გადაყენებით, სამთავრობო კრიზისი იქმნება, რომლის დაძლევაც "ახალგაზრდა პრემიერს გაუჭირდება".
"პრემიერის ეს გადაწყვეტილება ისტერიული ხასიათის იყო და არა მხოლოდ საკუთარი, არამედ მისი რეალური მეპატრონის მხრიდანაც".
როგორც ცისკარიშვილი აღნიშნავს, ალასანიას პოსტიდან გათავისუფლებისა და სახელმწიფო მინისტრის ევროპულ და ევროატლანტიკურ სტრუქტურებში ალექსი პეტრიაშვილი მხრიდან სოლიდარობის შემდეგ, დატოვებენ თუ არა თანამდებობებს იუსტიციის მინისტრი თეა წულუკიანი და საგარეო საქმეთა მინისტრი მაია ფანჯიკიძე, ეს მათ მორალზეა დამოკიდებული.
"არამგონია რომ ფანჯიკიძე ალასანიას პარტიასთან ასოცირდებოდეს, ის უბრალოდ ოჯახის წევრად ითვლება. ისინი პოლიტიკური ტყუპები არასდროს ყოფილან.
რაც შეეხება წულუკიანს, ის პოლიტიკურ საქმიანობას ჩამოშორდა, როგორც კი იუსტიციის მინისტრი გახდა. ანუ, რაიმე ტიპის პარტიული ვალდებულები მათ არ გააჩნიათ. თუმცა, არსებობს მორალი, რა კუთხით წარმოაჩენენ ისინი თავიანთ დამოკიდებულებას ამ ფაქტის მიმართ.
არც ჩვენ ახალგაზრდა პრემიერს მოჰგვრის სიმშვიდეს, ამ ქალბატონების თანამდებობებზე დარჩენა", _ უთხრა "გურია ნიუსს" ცისკარიშვილმა.
პოლიტოლოგის თქმით, ალასანიას პოლიტიკური პერსპექტივა საკმაოდ საფუძვლიანია, თუმცა აბსოლუტურად უსაფუძვლოა "ერთიანი ნაციონალური მოძრაობის" ლიდერთა მხრიდან ალასანიათი ზედმეტად დაინტერესება, რადგან ყოფილი თავდაცვის მინისტრი თავის გუნდთან ერთად "ნაციონალების" გარეშე წარსდგება საპარლამენტო არჩევნებზე.
"საპარლამენტო არჩევნებში, ერთ-ერთი სერიოზული ძალა ალასანია და მისი პოლიტიკური გუნდი იქნება, რომელიც გაიზრდება. არსებობს მოლოდინი იმისა, რომ იგი არ იქნება კენტად დარჩენილი პოლიტიკური ძალა და დღევანდელი კოალიციიდანაც მისი პარტნიორები კვლავ მის გვერდით აღმოჩნდებიან", _ ამბობს ცისკარიშვილი და დასძენს, რომ კოალიციიდან „თავისუფალი დემოკრატების“ გასვლა ბუნებრივი ნაბიჯი იქნებოდა.
"კოალიცია იმართება იმ ადამიანების მიერ, რომელთათვისაც ალასანია სერიოზულ საფრთხეს წარმოადგენს, რადგან ინფორმაცია რაც მას გააჩნია, ვერაფერი სიამოვნების მომგვრელი ვერ იქნება მმართველთათვის. ახლა დაიწყება კიდევ უფრო გაშმაგებული მცდელობა ალასანიას დისკრედიტაციის."
