დღეს, ოზურგეთის მუნიციპალიტეტის საკრებულოს სხდომა, ნაცვლად დილის 11 საათისა, 12 საათზე დაიწყო. ამის მიზეზი ის გახდა, რომ გურიის გუბერნატორმა, გიორგი ჩხაიძემ, რატომღაც ამ დროისათვის მოისურვა ოზურგეთის მუნიციპალიტეტის საკრებულოს თავმჯდომარესთან, დავით დარჩიასთან, მის მოადგილესთან დიმიტრი კვერღელიძესთან და ოზურგეთის მუნიციპალიტეტის გამგებელ მერაბ ჭანუყვაძესთან შეხვერა.
ამ შეხვედრის დასრულების შემდეგ კი დავით დარჩია და დიმიტრი კვერღელიძე საკრებულოს დეპუტატების ერთ ნაწილს დახურულ კარს მიღმა შეხვდნენ.
დაგვიანებით დაწყებულ სხდომაზე საკრებულოს თავმჯდომარემ დღის წესრიგის გაცნობის დროს თქვა, რომ მეცხრე საკითხი ამოღებულია.
"მეცხრე საკითხი მინდა რომ ამოღებული იყოს დღის წესრიგიდან – ეს არის ოზურგეთის მუნიციპალიტეტის გამგებლისა და საკრებულოს თავმჯდომარის თანამდებობრივი სარგოების განსაზღვრის შესახებ. ოზურგეთის მუნიციპალიტეტის საკრებულოს დამტკიცების თაობაზე. თქვენ იცით, რომ ჯერჯერობით დადგენილი არ არის სარგოები და ჩავთვალოთ, რომ ეს ჩვენი მთავრობის და ხელისუფლების პრეროგატივაა", _ თქვა დარჩიამ.
მეცხრე საკითხის ამოღებას მხარი არ დაუჭირა დეპუტატების უმრავლესობამ. საკრებულოს სხდომათა დარბაზში ამ საკითხს უკვე მიეცა დეპუტატების მიერ შეფასებები.
"ეს ყველაფერი არასერიოზულად მიმაჩნია. თუ არ იყო ამ საკითხის განხილვა, რატომ განვიხილეთ საერთოდ? სანამდე უნდა გაგრძელდეს ამ ქვეყანაში და ამ რაიონში, რომ გუბერნატორს ედოს ჯიბეში საკრებულოები. ძალიან კარგად ვიცი რა პროცესი მიმდინარეობს და ამას უკვე პოლიტიკურად ვამბობ. გუბერნატორს რაღაც მოუნდება უნდა გაკეთდეს ისე, რაღაცა არ მოუნდება არ უნდა გაკეთდეს ისე. ჩვენ თუ ჩვენი თავის ფასი არ ვისწავლეთ და ჩვენ არ მივიღეთ გადაწყვეტილებები, როგორც საკრებულოს დეპუტატებმა ხვალ უარეს მდგომარეობაში ვიქნებით. თბილისში ყოფნის დროს რამდენიმე თანამდებობის პირთან მქონდა საუბარი, არანაირი პოლიტიკური დატვირთვა იმას, რომ ხელფასი მოიმატოს თუ არ მოიმატოს არ მოდის, ეს არის ტყუილი და უბრალოდ ჩვენ ამ ტყუილებში ნუ გავეხვევით. ეს არის ერთი ადამიანის ახირება, რომ ოზურგეთის მუნიციპალიტეტის საკრებულო და გამგეობა, ქალაქ ოზურგეთის მერია ჩაისვას ჯიბეში. მოვიდეს და ჩვენ გვესაუბროს", _ თქვა დეპუტატმა ლელა ნაცვალაძემ.
დეპუტატი მიხეილ გოგოტიშვილის აზრით, რთუ თანამდებობრივი სარგოს ზედა ზღვარი არ იყო დამტკიცებული, მაშინ ამ დრომდე აღნიშნული საკითხის განხილვა არ უნდა გაგრძელებულიყო.
"ეს საკითხი უნდა მივიყვანოთ ბოლომდე. მე არ ვიცი, რა თქვა გუბერნატორმა და მან რა მონაწილეობა მიიღო ამ პროცესებში. გუბერნატორმა უმჯობესია იმ დაპირებებს მიხედოს, რაც "ქართულმა ოცნებამ" მისცა ხალხს. მას აქვს უამრავი საქმე და საკრებულოს დაანებოს თავი. ჩვენ ნამდვილად არ ვიცოდით ზედა ზღვარი თუ არ იყო განსაზღვრული და მაშინ საერთოდ რატომ დავიწყეთ ამ საქმის ადმინისტრაციული წარმოება- თქვა მიხეილ გოგოტიშვილმა", _ განაცხადა მიხეილ გოგოტიშვილმა.
გიორგი ჩხაიძის თქმით, არის საკითხები, რაზეც გუბერნატორი, საკრებულოს თავმჯდომარე და გამგებელი ერთმანეთში საუბრობენ და ყველაფერი არ შეიძლება მასმედიასთან ვთქვა:
"ვიყავი ჩამოსული და რაღაც თემებზე გავდიოდით კონსულტაციებს. საიდუმლო შეხვედრა არ ყოფილა. არის საკითხები, რაზეც გუბერნატორი, საკრებულოს თავმჯდომარე და გამგებელი ერთმანეთში საუბრობენ და ყველაფერი არ შეიძლება მასმედიასთან ვთქვა."
_ ეს შეხვედრა მაშინ რატომ დაიწყო, როდესაც საკრებულოს სხდომა იწყებოდა და ამის გამო სხდომა 30 წუთით გადაიდო.
_ ეს შეხვედრა შეიძლება მოხდეს ყოველთვის _ დღეს ან ორი დღის შემდეგ. სამუშაო შეხვედრა იყო.
