საქართველოს იუსტიციის მინისტრის თეა წულუკიანის განცხადებით, ის რჩება თანამდებობაზე და საქართველოს სახელმწიფოსთვის მუშაობას აგრძელებს.
აუცილებელია, თავშივე მოგახსენოთ: ის, რაც მოხდა და ხდება, არის უკიდურესად სამწუხარო.
ამ უმძიმეს ფონზე მაქვს ვალდებულება, ვუთხრა საზოგადოებას, რომ ივანიშვილის და შემდეგ ღარიბაშვილის სხვადასხვა მთავრობის თითოეულმა წევრმა, ხაზს ვუსვამ − თითოეულმა წევრმა, ფასდაუდებელი წვლილი შეიტანა იმაში, რომ საქართველოს თავისი ევროპული არჩევანი გაემყარებინა, გაეხადა შეუქცევადი და ევლო წინ პროგრესის გზაზე. ამ გზაზე წარმატებით სიარულში იუსტიციის მინისტრმაც შეასრულა თავისი როლი იუსტიციის სამინისტროს თითოეულ თანამშრომელთან ერთად.
ბედმა გამიღიმა და 2010 წლიდან დღემდე მოვხვდი ისეთი ადამიანების გვერდით, რომლებთანაც მქონდა, მაქვს და მექნება ერთიანი ღირებულებები, დასავლური ღირებულებები. 2012 წლიდან სათავეში ვუდგავარ იმ სამინისტროს, რომლის თითოეული თანამშრომელი პროგრესისთვის მუშაობს, და ეს სამუშაო სულ რამდენიმე დღის წინ დაგვირგვინდა ევროკავშირთან ვიზალიბერალიზაციის პროცესის პირველი ფაზის წარმატებით დახურვით და ამ წარმატებას, ჩვენი მთავრობის კოლექტიურ წარმატებას, თავად ევროკავშირმა სულ რამდენიმე დღის წინ, 29 ოქტომბერს, „ერთი ნაბიჯით წინ ევროპისაკენ“ უწოდა.
ცუდია, რომ ქვეყნის შიგნით მიმდინარე სამწუხარო მოვლენებმა საქართველოს ეს დიდი საერთაშორისო წარმატება მთლიანად გადაფარა.
2012 წელს ხელისუფლების სათავეში მოსული პოლიტიკური ძალა იყო და არის დღესაც ევროპული კურსის ერთგული. ეს გზა არის, დიახ, რთული, მაგრამ ეს იყო და არის მთავრობის განუხრელი კურსი, რადგან არ არსებობს საქართველოს კეთილი მომავალი ევროპული კურსის გარეშე. ეს ასეა დღეს!
