გასული კვირა გურიაში საკმაოდ დატვირთული იყო _ "გურია ნიუსის" საგაზეთო პუბლიკაციასა და საგამოძიებო ფილმს _ "როგორ გაარემონტეს არსებული და არარსებული ბაღები" დიდი გამოხმაურება მოჰყვა.
გასული კვირის ერთ-ერთი აქტუალური თემა გუბერნიის ახალი შენობის მაკეტიც იყო, რომლის ფოტოები "გურია ნიუსმა" ექსკლუზიურად გამოაქვეყნა.
ამ ინფორმაციას ოზურგეთელების პროტესტი მოჰყვა _ ჩვენს მიერ გამოკითხული მოსახლეობა ამბობს, რომ პარკი გუბერნიის შენობაზე მნიშნელოვანია. რიგითი ოზურგეთელების მსგავსად, პარკის ტერიტორიაზე შენობის დადგმას უარყოფითად აფასებენ არქიტექტორებიც, რომელთა განმარტებით, ტერიტორიის სიმცირის გამო, აღნიშნულ ადგილზე შენობის დადგმა გამართლებული არ იქნება.
ამ თემაზე დისკუსია ოზურგეთის "დემოკრატიული ჩართულობის ცენტრშიც" გაიმართა.
"არ მგონია, რომელიმე სამინისტროს გაუჩნდეს ისეთი აზრი, რომ გადაწყვიტოს ქალაქ ოზურგეთში რაიმე სახის სახელმწიფო ინტერესებიდან გამომდინარე, შენობის აშენება ისე, რომ არ დაეკითხოს ადგილობრივ ხელისუფლებას", _ განაცხადა "დემოკრატიული ჩართულობის ცენტრში" ოზურგეთის მერმა ბეგლარ სიორიძემ.
აღსანიშნავია, რომ შეთანხმების თანახმად, გადაცემაში _ "კვირის თემა", ამ და სხვა მნიშვნელოვან საკითხებზე ოზურგეთის მერს ბეგლარ სიორიძეს უნდა ესაუბრა. შეთანხმება ზუსტად ერთი კვირით ადრე მოხდა, მას შემდეგ, რაც წინა გადაცემის სტუმრებმა ბეგლარ სიორიძეს რამდენიმე სერიოზული ბრალდება წაუყენეს და ნეპოტიზმშიც დაადანაშაულეს. ბეგლარ სიორიძეს გადაცემის დაწყების ზუსტი დრო სმს-ით ორჯერ _ შაბათს და კვირას შევატყობინეთ. ორშაბათს კი დავურეკეთ და კიდევ ერთხელ შევახსენეთ, რომ ველოდებოდით. მერის პასუხი საკმაოდ უცნაური აღმოჩნდა: _ სმს-ი ვერ წავიკითხე, ვერ ვხედავ და იმიტომ(?!).
ასე თქვა უარი ბეგლარ სიორიძემ გადაცემაში მოსვლაზე, მაშინ, როცა ერთი კვირის განმავლობაში, როგორც "გურია ნიუსის" ვებგვერდზე, ასევე გაზეთში და ფეისბუქში შესაბამისი ანონსი მიდიოდა. ოზურგეთელები მათთვის საინტერესო თემებზე ბევრს გვწერდნენ და დასმულ კითხვებზე პასუხი მიღებას გადაცემიდან ელოდნენ. კითხვები საკმაოდ ბევრი იყო.
ჩვენ იმის გარკვევა გვინდოდა, როგორ უდგას თანაქალაქელებს გვერდით მერი, რომელ დაპირებებს ასრულებს და რომელი შეასრულა.
ასევე საინტერესო იყო მისი მოსაზრება ოზურგეთის რაიონული სასამართლოს გადაწყვეტილებაზე, რომელმაც სტადიონის ყოფილი დირექტორი, მერის მიერ თოჯინების თეატრის წესდების საფუძველზე მოხსნილი მურთაზ აბაშიძე თანამდებობაზე აღადგინა. ერთი სიტყვით, მერი გადაცემაში ვერ მოვიდა საკმაოდ "ობიექტური" მიზეზით _ ვერ ხედავს, სმს ვერ წაიკითხა და სხვა უფრო მნიშნელოვანი შეხვედრა ჰქონდა. იმედია, მომავალში ეს პრობლემა მოგვარდება, მერი სათვალეს შეიძენს და სმს-ების წაკითხვას შეძლებს მინიმუმ იმისთვის, შემდგომში უხერხულ მდგომარეობაში არ აღმოჩნდეს და მიცემული სიტყვის შეუსრულებლობაში არ დაადანაშაულონ.
გურიის გუბერნატორმა გიორგი ჩხაიძემ, რომელიც ჩვენი გადაცემის მეორე სტუმარი იყო, "გურია ნიუსის" მკითხველების მიერ ფეისბუქსა და ელფოსტაზე გამოგზავნილ შეკითხვებს უპასუხა.
მხარის პირველმა პირმა მერის განცხადებას ჩვენი გადაცემიდან უპასუხა და აღნიშნა, რომ შეფასების გაკეთება ძალიან რთულია:
_ ვერ ვხდები, რატომ დაიწყო ამ თემაზე მსგავსი პრობლემების შექმნა, მსგავსი პოლიტიზირება. ჩვენ არაერთხელ დავაფიქსირეთ, რომ თუნდაც ის ფოტოვერსია, რომელიც თქვენ მოგაწოდეთ, არის ერთ-ერთი ვერსია იმ შენობის, რომელიც უნდა აშენდეს. არასდროს გვითქვამს, რომ ეს არის გადაწყვეტილი. სამწუხაროდ, ჩემთვის არაფერი უკითხავთ და ვფიქრობ, რომ როცა ასეთი აჟიოტაჟია, როგორც მინიმუმ, კითხვა მაინც უნდა დაისვას _ არის თუ არა ახალი შენობის აშენება გადაწყვეტილი. ჩვენ ისიც მოვისმინეთ, რომ შეთანხმებული არ არისო. ვერ იქნებოდა ვერანაირად, რადგან ეს არ არის გადაწყვეტილი. სანამ არ გადავწყვეტთ, გუბერნია მუნიციპალიტეტს, მერიას ვერ შეუთანხმებს იმ ვერსიას და გადაწყვეტილებებს, თუ რაზე მუშაობს და რას განიხილავს. მერია და გუბერნია დამოუკიდებელი ინსტიტუტებია. რომც არ გვდომოდა შეთანხმება, ფიზიკურად ვერ დავიწყებდით მშენებლობას და ვერ ავარიდებდით თავს მერიიდან მშენებლობის ნებართვის მიღებას.
ჩხაიძის თქმით, ახალ შენობასთან დაკავშრებით რამდენიმე ვერსიაზე მიმდინარეობს მუშაობა:
_ ახალი შენობისთვის ერთ-ერთ ადგილად განიხილება ანასეული, რაც მე პირადად ძალიან მომწონს და მივესალმები. ძალიან ლამაზი, ისტორიული ადგილია, გურიისთვის მნიშვნელოვანია და იმ შემთხვევაში, თუ იქ განთავსდება სამხარეო ადმინისტრაცია, ანასეული ისევ გაცოცხლდება. ეს პირადად ჩემი მოსაზრებაა, მაგრამ კიდევ ერთხელო ვამბობ, რომ ადმინისტრაციული შენობა არ არის პირადად ჩემი შენობა, ეს არის სახელმწიფოს შენობა. ამიტომ, პროცედურები გაცილებით ბევრ ეტაპს გადის, ვიდრე ქალაქის მერს წარმოუდგენია.
ანასეულის გარდა, კიდევ არის ერთი ადგილი მუნიციპალიტეტის ტერიტორიაზე, სადაც თეორიულად შეიძლება განთავსდეს შენობა. თუმცა, ჯერ შევიკავებ ამაზე საუბრისგანაც თავს, რადგან მერე შეიძლება ბრალი დაგვდონ, რომ არ ვათანხმებ იმ მოსაზრებებს და იდეებს, რაზეც ჩვენ ვმუშაობთ.
_ ბატონო გიორგი, იმ ფონზე, რაც ახლა, ამ წუთებში ხდება გურიაში, როცა სტიქიაა და უამრავი ადამიანი თქვენი დახმარების მოლოდინშია სახელმწიფოს აქვს იმის საშუალება რომ გუბერნიას ახალი შენობა აუშენოს? მით უმეტეს, რომ ოზურგეთში ალტერნატიული ფართებიც არსებობს _ მაგალითად, გურიის სამხარეო პოლიციის ყოფილი შენობა, რომელსაც მხოლოდ კოსმეტიკური რემონტი სჭირდება.
_ ადმინისტრაცია სამხარეო პოლიციის ყოფილი შენობის გამოყენების ვერსიასაც განიხილავს. პირადად ვიყავი და ვნახე შენობა. ვერ დაგეთანხმებით, რომ მხოლოდ და მხოლოდ კოსმეტიკური რემონტი სჭირდება. თანხებთან არის ესეც დაკავშირებული.
_ არა იმდენთან, რაც აშენებას დასჭირდება…
_ შენობის გადაკეთება ერთმნიშვნელოვნად გაცილებით იაფი არ დაჯდება. მით უმეტეს, იქ არსებული ფართი მაზე ბევრად დიდია, ვიდრე ეს ესაჭიროება გუბერნიის ადმინისტრაციას. ფართობიდან გამომდინარე, მისი ხარჯები, როგორც სარემონტო, ისე მოვლა-პატრონობის, გაცილებით მეტი იქნება.
ამ ეტაპზე რთულია, გითხრათ, რემონტი ჯობია თუ ახლის აშენება. ამაზე მაშინ შემეძლება საუბარი, როცა საბოლოო გადაწყვეტილება იქნება მიღებული.
_ ბატონო გიორგი, რა დაჯდა შენობის ფოტომაკეტი და რატომ ხარჯავთ ამაში ფულს, როცა, ისევ გავიმეორებ, რომ ბევრი პრობლემაა _ ადამიანები ჯერ კიდევ ზარალის ანაზღაურების მოლოდინში არიან…
_ გუბერნიის ადმინისტრაციას ამაში ერთი თეთრიც არ დაუხარჯავს. ეს არის მოსამზადებელი სამუშაოები და საბოლოოდ მაშინ გადაწყდება, როცა ჩვენთვის მისაღები იქნება კონკრეტული შენობა კონკრეტულ ადგილზე. მანამდე არც ერთ თეთრს არ დავხარჯავთ. რაც შეხება საჭიროების საკითხს _ არავინ კამათობს, რომ ის ფართი, რომელშიც გუბერნია, ოზურგეთის მუნიციპალიტეტის გამგეობა და საკრებულო, ასევე მერია და საკრებულოა განთავსებული, საკმარისი არ არის. მაგალითად, ერთ ოთახში 14 ადამიანი მუშაობს. თუ ვსაუბრობთ იმაზე, რომ მუნიციპალიტეტებმა უნდა იმუშაონ ადეკვატურად და შესაბამისი რეაგირებები მოახდინონ ნებისმიერი სახის პრობლემაზე, თუნდაც სტიქიაზე, ამისთვის მათ უნდა ჰქონდეთ ადამიანური, ნორმალური სამუშაო გარემო. რაც შეეხება სტიქიას, წინა სტიქიის გამო მიყენებული ზარალის აღმოსაფხვრელად გურიას 12 მილიონი გამოუყვეს.
_ თუმცა, ეს თანხა გათვალისწინებულია მხოლოდ ინფრასტრუქტურაზე და კონკრეტულ ოჯახებზე, რომლებიც სტიქიის გამო მოსავლის გარეშე დარჩნენ…
_ სოფლის მეურნეობის კუთხით მიყენებულ ზარალზე რომ ვისაუბროთ ამას ცალკე გადაცემა დასჭირდება, რადგან ძალიან დიდი თემაა. ეს არაა მარტო გურიის პრობლემა. მთელ საქართველოში იყო სტიქია და ძალიან ბევრი ადამიანია დაზარალებული. სწორედ ამიტომ მიიღო სახელმწიფომ გადაწყვეტილება, რომ სოფლის მეურნეობის პროდუქცია დააზღვიონ. ეს ნიშნავს იმას, რომ მომავალში მსგავს პრობლემებს თავიდან ავიცილებთ…
_ ბატონო გიორგი, როგორც მერმა განაცხადა, პარკში შენობის აშენება დანაშაულია. საინტერესოა, თქვენი მოსაზრება, რა მიგაჩნიათ დანაშაულად _ ის, რომ შენობის პარკში აშენების იდეა მოგივიდათ, ის, რომ ოზურგეთის მუნიციპალიტეტისა და ქალაქის ჩინოვნიკებს ხელფასების გაზრდა უნდათ თუ ის, რომ გურიაში უამრავ ადამიანს პურის ფული არ აქვს და საარჩევნო დაპირებების შესრულების მოლოდინში ელოდებიან სამუშაო ადგილებს და ამ ყველაფრის ფონზე ორი სახელმწიფო სტრუქტურა მედიის საშუალებით კამათობს შენობის აშენება-არაშენების საკითხზე…
_ დანაშაული სხვანაირად მესმის და აქედან გამომდინარე, დღეს არც ერთ ქმედებას არ მივცემ ამ კვალიფიკაციას. ხელფასებზე მე უკვე გავაკეთე შეფასება და როგორ მოქალაქეს, ზედმეტად მეჩვენება ასე მატება, თუმცა, ეს ჩემი პოზიციაა.
_ და ის სწორად მიგაჩნიათ, რომ თქვენ თანხების დახარჯვას ახალი შენობის ასაშენებლად აპირებთ?
_ არ მინდა, ამაზე დამატებითი შეფასებები გავაკეთო. როგორც გითხარით, ყველაფერი ჯერ იდეის დონეზეა. მე ვთქვი, რომ ხელფასები არ უნდა მოიმატონ ასე. აქვე ვიტყვი, რომ არც ერთი მუნიციპალიტეტის გადასაწყვეტი არ არის, ააშენებს თუ არა გუბერნია ახალ შენობას.
ჩხაიძის თქმით, ეს საკითხი პრემიერთანაც არ არის შეთანხმებული:
_ სავარაუდო მოსაზრებებს სამხარეო ადმინისტრაცია არ ათანხმებს პრემიერ მინისტრთან, ის ათანხმებს უკვე გადაწყვეტილ პროექტს. ისიც კი დაიწერა, თანხები არ არის გამოყოფილიო. რასაკვირველია არ გამოიყოფა, სანამ არ იქნება საბოლოო პროექტი და ცენტრალური ხელისუფლების თანხმობა. შეთანხმებებს დავიწყებ მას შემდეგ, როცა მეცოდინება ადგილი და კონკრეტული ბიუჯეტი. იმ ადამიანებმა, რომლებიც სახელმწიფო სტრუქტურებში მუშაობენ, ეს, როგორც მინიმუმ, უნდა იცოდნენ.
ჩხაიძემ ბაღების სკანდალთან დაკავშირებითაც ისაუბრა. მისივე თქმით, ქონების მართვის სააგენტოს წერილზე, რომლის თანახმადაც, მუნიციპალიტეტი სოფელ ამაღლებაში არსებული შენობის ბალანსზე გადაცემას ითხოვდა შემდგომში ბაღის განთავსების მიზნით, დადებითი პასუხი გასცა:
_ თუ არის რაიმე სახის კანონდარღვევა, აუცილებლად იქნება რეაგირება და ამას მოახდენენ შესაბამისი სამსახურები. მე ჩემი კომპეტენციიდან გამომდინარე ვერ ვიტყვი, ეს არის თუ არა დანაშაული და დარღვევა. ის შემიძლია გითხრათ, რომ მუნიციპალიტეტს არ შეუძლია თავისი ასიგნებების ფარგლებში თანხა გამოყოს სხვისი ობიექტის სამუშაოს ჩასატარებლად.
_ ადგილობრივ ხელისუფლებაში აცხადებენ, რომ ეს ყველაფერი თქვენთან იყო სიტყვიერად შეთანხმებული…
_ ამას დაადასტურებს შესაბამისი უწყებები.
გუბერნატორი უარყოფს, რომ მას და გურიის მუნიციპალიტეტების ხელმძღვანელებს შორის დაპირისპირებაა.
ჩხაიძემ მკითხველის წერილებსაც უპასუხა. ერთ-ერთი შეკითხვა გუბერნიის შენობას ეხებოდა და ავტორს აინტერესებდა, ხომ არ განიხილავდა გუბერნატორი ადმინისტრაციული შენობის ჩოხატაურში ან ლანჩხუთში აშენებას: _ ამაზე ნამდვილად არ მიფიქრია. იმ პირობიდან და იმ პრინციპიდან გამომდინარე, რომ სამხრეო ადმინისტრაცია სამივე მუნიციპალიტეტისაა, შეიძლება ამაზე ფიქრი. თუმცა, დღეს გვაქვს ის რეალობა, რომ ოზურგეთი არის რეგიონული ცენტრი და მხოლოდ ამ კუთხით გვაქვს განხილვები, მაგრამ თეორიაში შესაძლებელია რომელიმე სხვა მუნიციპალიტეტში შენობის აშენების საკითხის განხილვაც.
გუბერნატორს ისიც ჰკითხეს რატომ არ აწესებს მიღების დღეებს მოსახლეობისთვის, თუნდაც კვირაში ერთხელ ლანჩხუთსა და ჩოხატაურში; ჩხაიძის თქმით, ეს საკმაოდ საინტერესო იდეაა და ამის გახორციელებისთვის მუშაობას დაიწყებს.
