ბიზნესმენ ბიძინა ივანიშვილის 12 ოქტომბერს გავრცელებულმა მორიგმა ღია წერილმა საზოგადოებაში კვლავ განსხვავებული მოსაზრებები გააჩინა. ცნობილი ბიზნესმენი და მეცენატი წერილში ღიად საუბარს არ ერიდება და თამამად ასახელებს ფსევდო-ოპოზიციონერების, ანალიტიკოსებისა და ჟურნალისტების სახელებს.
ფსევდოოპოზიციონერები
ბიძინა ივანიშვილი: “ვერ ვითანამშრომლებ ფსევდოოპოზიციურ პარტიებთან, რომლებიც ხელისუფლებასთან ფარულ გარიგებასა და კავშირში არიან და მისი ინსტრუქციებით და მითითებებით მოქმედებენ. მე არ მოვერიდები მათ დასახელებას და ღიად ვაცხადებ: ვერ ვითანამშრომლებ “ქრისტიან-დემოკრატებთან”, “ლეიბორისტებთან”, “ახალ მემარჯვენეებთან”, “ედპ”-სთან, “ქართულ პარტიასთან”, თორთლაძის, დავითაიას პარტიებთან”.
ფსევდოოპოზიციურ პარტიათა რიგებში მოხვედრილმა ლეიბორისტმა გიორგი გუგავამ ბიძინა ივანიშვილი სოროსს შეადარა და განაცხადა: “ხედავენ რა ამერიკელები, რომ მათი პროექტის ე.წ “ვარდების რევოლუციის” სრული დისკრედიტაცია მოხდა, შეიმუშავეს ახალი პროექტი, რომლის შესაბამისადაც ბიძინა ივანიშვილს იგივე როლი ექნება, რაც 2003 წელს ჰქონდა “სოროსს”.
მისი ფულით მოხდება პროამერიკული ძალების გაერთიანება და შესაბამისად, ხელისუფლების მათთვის გადაცემა, რაც უზრუნველყოფს ჩვენი ქვეყნის კოლონიური მდგომარეობის შენარჩუნებას. მიშას კიდევ, როგორც ედოს, მისცემენ სახელისუფლებო გარანტიას და თავისი მილიონებით იგრიალებს”.
ფსევდოანალიტიკოსები
ივანიშვილმა ანალიტიკოსთა და ექსპერტთა დიდ ნაწილს ფსევდოობიექტურები უწოდა და ისინი საზოგადოებაზე ფსიქოლოგიურ ზეწოლაში დაადანაშაულა. ფსევდოობიექტურთა ნომინანტთა სამეული ასე გადანაწილდა: ია ანთაძე, სოსო ცინცაძე, რამაზ საყვარელიძე.
ია ანთაძე: “პირადად ჩემთან დაკავშირებით ახლა არ ვისაუბრებ, რადგან ბევრჯერ ვუპასუხე ამ შეკითხვას. რაც შეეხება ზოგადად შეკითხვას, ბატონმა ივანიშვილმა ისაუბრა სამ ადამიანზე და მათაც ჰქონდათ საშუალება, პასუხი გაეცათ ამ ბრალდებაზე. ზოგადად, ადამიანებთან ურთიერთობის აგრესიული სტილი არ მომწონს. მით უმეტეს, როცა საჯარო ფიგურა სხვა საჯარო ფიგურებზე საუბრობს. მიმაჩნია, რომ რაც უფრო მეტად არაჰუმანურია გარემო, და ჩვენი გარემო ზუსტად ასეთია, მით მეტი ფასი ედება ადამიანებს შორის კორექტულ და პატივისცემით გამსჭვალულ ურთიერთობებს. ვფიქრობ, ბატონი ბიძინა ივანიშვილი გადახედავს თავის “შოკური თერაპიის” მეთოდებს, რადგან მათში არის შოკი და თერაპიის ელემენტებს პირადად მე ვერ ვხედავ”.
ფსევდოჟურნალისტები
ბიძინა ივანიშვილის რისხვას ვერც მედია გადაურჩა _ როგორც პოლიტიკაში მოსული ბიზნესმენი წერს, “სიმართლე მწარეა, მაგრამ თუ ჩვენ არ მივეჩვიეთ მისთვის თვალის გასწორებას, ეს ქვეყანა განწირულია მუდმივ შიშსა და სიცრუეში არსებობისათვის. როდესაც ტელევიზიას მართავს ფსევდოოპოზიციონერი ეროსი კიწმარიშვილის კომპანია, ადამიანის, რომელმაც, სხვას რომ თავი დავანებოთ, მისივე აღიარებით, 2008 წელს დღევანდელ ხელისუფლებასთან ერთად დაასამარა ხალხის რეალური არჩევანი, შეიძლება თუ არა, ვიღაცას ჰქონდეს ილუზია, რომ ასეთი ტიპის ადამიანი გახდება თავისუფალი სიტყვის გარანტი”?
ჟურნალისტურ წრეებში, ყოველ შემთხვევაში ნაწილში მაინც, ივანიშვილის განცხადებამ უკმაყოფილება გამოიწვია.
საინფორმაციო სააგენტო “ექსპრესნიუსის” დამფუძნებელი, ირაკლი მანაგაძე: “ვფიქრობ, რომ ბატონი ბიძინას ეს განცხადება სამართლიანი არაა. ვინაიდან როგორც “მაესტრო” , ასევე “კავკასია” ცდილობენ, შეინარჩუნონ დამოუკიდებელი პოლიტიკა და დააბალანსონ საინფორმაციოში გასული სიუჟეტები. სხვა რეალობა გვაქვს ნაციონალურ არხებთან დაკავშირებით, რომლებიც პირდაპირ არაობიექტურები არიან და აშკარად იგრძნობა სახელისუფლებო განწყობა.
როგორც წესი, მედიასთან დაპირისპირება პოლიტიკოსებს თუ ბიზნესმენებს ძალიან ცუდ შედეგს აძლევს. მედიასთან კონფრონტაციაში ყოფნა ნამდვილად არ არის მომგებიანი და მით უმეტეს, შედეგის მომტანი. ჩვენც, ჟურნალისტებსაც გვაქვს კითხვები ბატონ ბიძინასთან _ რატომ დახურა მან უცერემონიოდ მე-9 არხი და რატომ გადასცა “რუსთავი 2”-ს ძალიან ძვირადღირებული აპარატურა? მედიასთან დაძაბული ყოფნა და დაპირისპირება ნამდვილად მარცხს მოუტანს ბატონ ივანიშვილს ყველა ასპექტის გათვალისწინებით.
არ შეიძლება ყველაფერი ჯიბეში ჩაისვა, მით უმეტეს მედია. ერთი წუთით წარმოვიდგინოთ მედიის ერთი ნაწილი, რომელსაც ხელისუფლება აკონტროლებს და მედიის მეორე ნაწილი, რომელსაც ივანიშვილი გააკონტროლებს. ეს იქნება კატასტროფა, _ამბობს მანაგაძე, _ მედიას დაეკარგება ძირითადი ფუნქცია _ უთხრას ხალხს სიმართლე და იყოს ინფორმაციის რეალური გამტარი. “მაესტროს” ყიდვას აღვიქვამ კატასტროფად. მე არ მჯერა, რომ პოლიტიკოსი, რომლის მფლობელობაშიც იქნება მედიასაშუალება, უზრუნველყოფს მის დამოუკიდებლობას, მით უმეტეს, ბატონ ივანიშვილს ქვეყნის პრემიერობა სურს”.
ტელეკომპანია “მაესტროს” ერთ-ერთი დამფუძნებელი, მამუკა ღლონტი საკმაოდ ლაკონურად გამოხატავს საკუთარ პოზიციას:
_ ბატონო მამუკა, ბიძინა ივანიშვილმა განაცხადა, რომ “მაესტრო” და “კავკასია” ორსახოვანი ტელევიზიებია. რამდენად სამართლიანია მისი ეს განცხადება?
_ არ არის სამართლიანი.
_ რამდენად მომგებიანია მომავალი პოლიტიკოსთვის პოლიტიკაში მოსვლა მედიის “გამოაშკარავებით”?
_ არ არის მომგებიანი.
_ რამდენადაა შესაძლებელი იმ პირობების შესრულება, რომელიც ივანიშვილმა “მაესტროს” თანამშრომლებს აღუთქვა?
_ ბიძინას ჰკითხეთ. არ მჯერა, რომ იგი მის მიერ დასახელებულ პირობებს შეასრულებს.
საქართველოში უკვე ტრადიციად იქცა პოლიტიკურად მკვდარი და პოლიტიკურად ცხელი სეზონების გამოცხადება. ამჯერადაც, 2011 წლის შემოდგომაზე ცხელ-ცხელი სიახლეები გამოჩნდა: ახალი სახეებით, ახალი დაპირებებითა და ახალი ბრალდებებით.
