ანაკლიაში მცხოვრები, 2012 წლის 18 ივნისს უგზოუკვლოდ დაკარგული გოგიტა აბულაძის მშობლები, ცინარა და სერგო აბულაძეები, საქართველოს პრემიერ-მინისტრთან შეხვედრას ითხოვენ.
"ირაკლი ღარიბაშვილმა, როდესაც ის შინაგან საქმეთა მინისტრი იყო დამპირდა, რომ 20 დღეში ყველაფერს გაარკვევდა და რაც იქნებოდა, ჩემთვის შემზარავი ამბავი თუ კარგი, მეტყოდა. მჯეროდა და ველოდებოდი, როდის დამიკავშირდებოდნენ, მაგრამ არაფერი არ ისმის. ამ შეხვედრის შემდეგ, ის ხდება პრემიერ-მინისტრი და როდესაც ჩამოდის ანაკლიაში ან ზუგდიდში, ყოველთვის ცდილობენ, არ შევხვდე მას.
რატომ ხდება ასე და რატომ არავინ არაფერს მეუბნება რა დაემართა ჩემს შვილს?! წელს, ზუსტად რიცხვი არ ვიცი, ზუგდიდში პრემიერ-მინისტრი ხვდებოდა მოსახლეობას, ეს გავიგე და ვემზადებოდი შესახვედრად. შეხვედრამდე მოვიდნენ ჩემთან ადგილობრივი პოლიციის მაღალჩინოსნები და მითხრეს, რომ თბილისში ვიყავით შინაგან საქმეთა სამინისტროში დაბარებული. რა თქმა უნდა, ირაკლი ღარიბაშვილი ჩამოვიდა, მაგრამ ჩვენ არ შევხვედრილვართ ერთმანეთს, რადგან თბილისში წავედი.
გზაში სულ ურეკავდნენ მძღოლს, რომ მივდიოდი თუ არა თბილისში. ვისაც შევხვდით, ის საერთოდ არ იცნობდა ჩემი შვილის საქმეს და ვერც ვერაფერი გავიგე. ისევ ვითხოვ ირაკლი ღარიბაშვილთან შეხვედრას, შეიძლება ვინმეს დაავალა, რომ ეთქვა ჩემთვის სიმართლე და არ მეუბნებიან. გთხოვთ, რომ იქნებ თქვენ მაინც მიიტანოთ პრემიერ-მინისტრამდე ჩემი სათქმელი. რატომ არ მხვდება, იქნებ მიპასუხოს", _ ამბობს ცინარა აბულაძე.
"გურია ნიუსი" შინაგან საქმეთა სამინისტროს დაუკავშირდა. პრესსამსახურის ინფორმაციით, გოგიტა აბულაძის საქმე კვლავ ძიებაშია. რაც შეეხება პრემიერ-მინისტრს ირაკლი ღარიბაშვილს, ის ყაზახეთში იმყოფება და აქედან გამომდინარე მისი კომენტარის მოპოვება ამ ეტაპზე ვერ მოხერხდა.
