ოზურგეთის მუნიციპალიტეტის საჯარო მოხელეთა მუდმივმოქმედი საკონკურსო – საატესტაციო კომისიის თავმჯდომარე, ოზურგეთის მუნიციპალიტეტის გამგებელი მერაბ ჭანუყვაძეა. კომისიის თავმჯდომარის მოადგილე, საკრებულოს თავმჯდომარე – დავით დარჩია.
წევრები არიან: არჩილ ყაზაიშვილი, გამგებლის მოადგილე; მაიზერ ცელაძე, განათლებისა და სოციალური სამსახურის უფროსი; სოფიო სალუქვაძე, გუბერნიის თანამშრომელი; იუსტიციის სახლის მენეჯერი ივანე მენაბდე; პროფკავშირების ორგანიზაციის თავმჯდომარე თეიმურაზ ქინქლაძე და არასამთავრობო ორგანიზაციის წარმომადგენელი, კახაბერ ლომაძე.
ქალაქ ოზურგეთის მერიასა და საკრებულოში, საჯარო მოხელეთა მუდმივმოქმედ საკონკურსო – საატესტაციო კომისიის თავმჯდომარე, ქალაქის მერი ბეგლარ სიორიძეა, მოადგილე ქალაქ ოზურგეთის საკრებულოს თავმჯდომარე გელა კობალაძე.
წევრები: მერის მოადგილე ალეკო ბურჭულაძე, საკრებულოს თავმჯდომარის მოადგილე ნინო გოგუაძე, არასამთავრობო ორგანიზაციის წარმომადგენელი მინდია სალუქვაძე და აპროფკავშირებიდან თეიმურაზ ქინქლაძე.
ოზურგეთის მუნიციპალიტეტში კონკურსი 7 ან 8 დეკემბერს ჩატარდება, ხოლო, ქალაქში, კომისიის თავმჯდომარის განცხადებით, კონკრეტული ციფრი გადაწყვეტილი არ არის.
რა პროცედურებია გასავლელი, იქნება თუ არა კონკურსი გამჭვირვალე და დაესწრებიან თუ არა მას მედიის წარმომადგენლები, ამაზე “ გურია ნიუსის“ შეკითხვებს ოზურგეთის მუნიციპალიტეტის გამგებელი, მერაბ ჭანუყვაძე და ქალაქ ოზურგეთის საკრებულოს თავმჯდომარე გელა კობალაძე პასუხობენ.
მერაბ ჭანუყვაძე: "პირველ ეტაპზე მოხდება აპლიკაციების შეფასება – გადარჩევა – რომლის შედეგების გამოცხადების შემდეგ, კონკურსში მონაწილეობას გააგრძელებენ და გასაუბრების ეტაპზე გადავლენ მხოლოდ ის კანდიდატები, რომლებიც განაცხადების გადარჩევის საფუძველზე დააკმაყოფილებენ დადგენილ საკვალიფიკაციო მოთხოვნებს. მეორე ეტაპი, არის ტესტირება, რომლის შედეგების გამოცხადების შემდეგ, კონკურსში მონაწილეობას გააგრძელებენ და გასაუბრების ეტაპზე გადავლენ მხოლოდ ის კანდიდატები, რომლებიც გადალახავენ ტესტირების ეტაპის მინიმალურ ზღვარს.
კონკურსში მონაწილეობის მისაღებად კანდიდატს უფლება აქვს განაცხადი წარადგინოს ერთდროულად არაუმეტეს 5 (ხუთ) ვაკანსიაზე, ელექტრონული ფორმით, საჯარო სამსახურის ბიუროს მიერ ადმინისტრირებულ ვებგვერდზე."
საკონკურსო-საატესტაციო კომისისი თავმჯდომარე მერაბ ჭანუყვაძის თქმით, კონკურსი უკვე გამოცხადებულია 123 ვაკანსიაზე.
"აპლიკაციების მიღება 19 ნოემბერს დასრულდება. ამის შემდეგ დაიწყება გადარჩევა, ზოგადად რამდენად სწორად მოხდა აპლიკანტის მიერ მონაცემების შეყვანა, შესაბამისად მოვამზადებთ იმ სიას, რომელიც უნდა წარსდგეს შემდეგ ელექტრონული ტესტირების გასასვლელად. ტესტირებას ჩაატარებს გამოცდების ეროვნული ცენტრი ჩვენგან დამოუკიდებლად, თავად უზრუნველყოფენ ამ ყველაფერს, გამოცდები ჩატარდება სკოლებში. იქცე ეცოდინება ნებისმიერ აპლიკანტს თავისი შედეგის შესახებ, აქედან გამომდინარე, ჩვენ რამდენიმე დღეში დავიწყებთ გასაუბრებას და შემდეგ მოხდება იმ ადამიანების შერჩევა, რომლებიც გააგრძელებენ მუშაობას საჯარო სამსახურში".
_ კონკურსის ჩატარების პროცესი იქნება თუ არა გამჭვირვალე?
_ ჩვენ მოვიწვიეთ სხვადასხვა უწყების თანამშრომლები კომისიის წევრებად, ესენი არიან – პროფკავშირების წარმომადგენელი თემურ ქინქლაძე, არასამთავრობო ორგანიზაციის წარმომადგენელი კახაბერ ლომაძე, იუსტიციის მენეჯერი ივანე მენაბდე, გუბერნიის თანამშრომელი სოფიო სალუქვაძე.
ისინი პირდაპირ არიან ამ პროცესებში ჩართულები, აქედან გამომდინარე, არამგონია, რომ საჭირო იყოს სხვა ტიპის გამჭირვალობა.
_ კონკურსის ჩატარების პროცესს დაესწრებიან თუ არა ჟურნალისტები?
_ არა, ჟურნალისტები არ დაესწრებიან.
_ ვისი ინიციატივა და გადაწყვეტილებაა ეს?
_ გეტყვით ახლავე, კონკურსის მეორე ეტაპი ტარდება აბსოლუტურად მუნიციპალიტეტისგან დამოუკიდებლად, ამაში არ არის არცერთი ჩემი თანამშრომელი ჩართული. შესაბამისად, ვინც გადალახავს ამ ბარიერს ექნება შანსი გააგრძელოს მუშაობა საჯარო სამსახურში.
აქედან გამომდინარე ვერ ვხედავ აქ ვერაფერს, საგანგაშოს. რომ ტარდებოდეს პირდაპირ გასაუბრებით, კი ბატონო, დაგეთანხმებოდით, რომ მედია უნდა დასწრებოდა, მაგრამ რადგან მეორე ბარიერს გადალახავს ადამიანი, თითოეული მათგანი ღირსია გააგრძელოს მუშაობა საჯარო სამსახურში.
_ როგორ მოხდება გასაჩივრება?
_ ჩვენ გვაქვს ფორმა # 1, სადაც ხდება ადამიანების აღნიშვნა თავისი შედეგებით. თუ მონაწილე ჩათვლის საჭიროდ გასაჩივრებას, შეუძლია ნებისმიერ ადამიანს ნებისმიერი სახით, ამის უფლება ყველას აქვს.
გელა კობალაძე, ქალაქ ოზურგეთის საკრებულოს თავმჯდომარე:
"ქალაქ ოზურგეთის მერიასა და საკრებულოში, ზუსტი თარიღი ჯერ არ არის გადაწყვეტილი, როდის შეიძლება ჩატარდეს კონკურსი. შესაძლებელია 7 დეკემბერს ჩატარდეს.
კონკურსი გამოცხადდება ორშაბათს და იქნება აბსოლუტურად გამჭვირვალე."
კობალაძის განმარტებით, კონკურსს ჟუნალისტები დაესწრებიან იმ შემთხვევაში, თუ ეს იქნება თავად კონკურსანტის მოთხოვნა.
"თუ რომელიმე კონკურსანტმა მოითხოვა ჟურნალისტების დასწრება, მისი სურვილისამებრ მოხდება ეს. კომისია არის გამჭვირვალე და არ იქნება არანაირი მიკერძოებული", _ აღნიშნავს კობალაძე.
