2015 წლის ბიუჯეტის პროექტის ახალი ვერსიით, 8 სამინისტროს დაფინანსება იზრდება. მათ შორისაა განათლებისა და მეცნიერების სამინისტრო, რომლის ბიუჯეტიც კანონპროექტის თანახმად, 853 მლნ 900 ლარს შეადგენს.
ბიუჯეტის პირველი ვერსიით სამინისტროს დაფინანსება 828,9 მლნ ლარი იყო, ზრდამ 25 მლნ ლარი შეადგინა.
სამინისტროსთვის ბიუჯეტის გაზრდის პარალელურად, ხელფასები გაეზრდებათ პედაგოგებს. განათლებისა და მეცნიერების სამინისტროს ცნობით, 2015 წლის სექტემბრიდან, პედაგოგების საბაზისო ხელფასი, 17%-ით გაიზრდება და ეს ზრდის მხოლოდ პირველ ეტაპს შეადგენს.
2016 წლის აპრილიდან, ოფიციალური ინფორმაციის თანახმად, საბაზო ხელფასი ამჟამინდელ ხელფასთან მიმართებაში, 34%-ით გაიზრდება.
2016-2017 წლებში, ხელფასის ზრდა მასწავლებლის პროფესიაში შესვლისა და კარიერული წინსვლის ახალი სქემის მიხედვით განხორციელდება.
მაგალითად: მეორე კარიერულ საფეხურზე, სერტიფიცირებული მასწავლებლის ანაზღაურება 31-34%-ით გაიზრდება. საშუალო ანაზღაურება მესამე და მეოთხე კარიერულ საფეხურზე კი, 760 და 860 ლარით უნდა განისაზღვროს.
მეორე კარიერულ საფეხურზე, ამჟამინდელ ხელფასთან შედარებით, სრული განაკვეთის შემთხვევაში, ხელფასი საშუალოდ 47%-ით უნდა გაიზარდოს. საშუალო ანაზღაურება მესამე და მეოთხე კარიერულ საფეხურზე 875 და 1085 ლარი გახდება.
ხელფასების ზრდის მესამე ეტაპი 2017 წელს იქნება და მეორე კარიერულ საფეხურზე მყოფ მასწავლებელს, რომელიც სრული განაკვეთით იმუშავებს, ამჟამინდელთან შედარებით ხელფასი, 88%-ით გაეზრდება. საშუალო ანაზღაურება მესამე და მეოთხე კარიერულ საფეხურზე კი 1050 და 1250 ლარი უნდა გახდეს.
რაც შეეხება პროფესიული განვითარების საფეხურებს, იგი ჯამში 4 საფეხურისგან შედგება.
პირველი კატეგორია – თუ მასწავლებელი მხოლოდ თეორიულ ცოდნას ეყრდნობა იგი პრაქტიკოსი პედაგოგია.
მე-2 კატეგორია – უფროსი მასწავლებელი, მოქმედი სერტიფიცირებული პედაგოგი, რომელიც ახერხებს კლასში მოსწავლეები ინდივიდუალურ დონეზე ამუშაოს და მათ წარმატების მიღწევაში დაეხმაროს.
მე-3 კატეგორია – წამყვანი მასწავლებელი. იგი ეყრდნობა კვლევებს და მოდიფიცირებას უკეთებს სასწავლო პროგრამებს.
მე-4 უმაღლესი კატეგორია – მენტორი. ის ლიდერი პედაგოგია და სხვებისთვის მაგალითი. გავლენას ახდენს სკოლის კულტურაზე და მუშაობს დამწყებ პედაგოგებთან.
აღსანიშნავია, რომ მასწავლებლებს ერთი კატეგორიიდან მეორე კატეგორიაში გადასვლა შეეძლებათ.
