ოფიციალური დოკუმენტების მიხედვით, ოზურგეთის მუნიციპალიტეტის სოფელ ოზურგეთში, სოფლის მხარდამჭერი პროგრამის ფარგლებში, 35 965 ლარი გამოიყო, რაც სოფელ ოზურგეთის ცენტრში მდებარე კულტურის სახლის რემონტს დასჭირდა.
აღნიშნულ შენობაში, სადაც ადრე ყოფილი კოლმეურნეობა იყო განთავსებული, ამჯერად საექიმო ამბულატორია ფუნქციონირებს და განთავსებულია გამგებლის წარმომადგენლის ვალერი ჯინჭარაძის სამუშაო ოთახი.
"გურია ნიუსი" დაინტერესდა, როგორ და რაში იხარჯება ყოველწლიურად სოფლის მხარდამჭერი პროგრამით გამოყოფილი თანხები. ამჯერად, სოფელ ოზურგეთიდან დავიწყეთ. სოფელი ოზურგეთი ქალაქიდან 2 კილომეტრითაა დაშორებული. გამგებლის წარმომადგენლის თქმით, აქ 2 500 ადამიანი, 610 კომლი ცხოვრობს. სოფელში 13 უბანია, რომელთაც სხვა სოფლების მსგავსად, პრობლემები უხვად აქვთ. მათი ძირითადი პრობლემა გარე განათების უქონლობა, მოუწესრიგებელი შიდა გზები და უწყლობაა.
სოფელ ოზურგეთის ცენტრში მდებარე ყოფილი კოლმეურნეობის შენობა, მოსახლეობის თქმით, დღეს უფუნქციოა. იგი ნახევრად დანგრეული და ამორტიზებულია, შიგნით კიბე ჩანგრეულია, შელახულია კედლები. შენობის სავალალო მდგომარეობას სოფლის რწმუნებულიც ადასტურებს, რომლის სამუშაო ოთახიც ავარიულ მდგომარეობაშია _ ჩამონგრეული აქვს ჭერი.
აღნიშნულ შენობაში, სოფლის მხარდამჭერი პროგრამის ფარგლებში, 35 965 ლარის ღირებულების მეტალო-პლასტმასის ფანჯრები ჩასვეს. სამუშაოები ინდმეწარმე გოჩა ერქომაიშვილმა შეასრულა.
"გურია ნიუსი" ოზურგეთის მუნიციპალიტეტის გამგებლის წარმომადგენელს სოფელ ოზურგეთში ვალერი ჯინჭარაძეს ესაუბრა.
ვალერი ჯინჭარაძე: _ პრობლემები თითქმის ყველა უბანშია. კონკრეტულად, არ არის სანიაღვრე არხები, გარე განათება _ ღამის განათებები აუცილებლად გასაკეთებელია; მოსაწესრიგებელია შიდა გზები. ამ მხრივ, ნამდვილად ცუდი მდგომარეობაა.
_ ბატონო ვალერი, როგორც მოსახლეობა ამბობს, განსაკუთრებით კატასტროფულ მდგომარეობაშია სოფელ გურიანთასთან დამაკავშირებელი ცენტრალური გზა.
_ გეთანხმებით, ნამდვილად ასეა.
_ 2014 წელს, "სოფლის მხარდამჭერი პროგრამის" ფარგლებში, გადმოირიცხა 35 965 ლარი. რაში დაიხარჯა აღნიშნული თანხა?
_ ამ თანხით კულტურის ცენტრს ჩავუსვით მეტალო-პლასტმასის ფანჯრები.
_ ოფიციალური დოკუმენტების მიხედვით, აღნიშნული თანხით გაკეთდა კულტურის სახლის რემონტი. რა გარემონტდა?
_ არა, რემონტი ნამდვილად არ გაკეთებულა. მარტო მეტალო-პლასტმასის ფანჯრები ჩაისვა. მთლიანობაში, არ მახსოვს ზეპირად რამდენი ჩაისვა.
_ სოფელში ძალიან ბევრი რამ არის გასაკეთებელი, მოუწესრიგებელია შიდა გზები; არ არის გარე განათებები; სანიაღვრე არხები გასაწმენდია თითქმის ყველა უბანში; მოსახლეობას საყანე ფართობთან მისასვლელი გზა არ აქვს. ყოველივე ამის ფონზე, რამდენად მიზანშეწონილად მიგაჩნიათ, უფუნქციო და დანგრეული შენობისთვის მეტალო-პლასტმასის ფანჯრების ჩასმა, რომელიც 35 965 ლარი დაჯდა?
_ ახლა ნამდვილად უფუნქციოა ეს შენობა, მაგრამ ადრე ამ დარბაზში 400 კაცი ეტეოდა. ძალიან დიდი შენობა ახლა გაპარტახებული, დანგრეული და განიავებულია, საშინელი მდგომარეობაა, მაგრამ არ ვეთანხმები იმას, რომ არ უნდა ჩაგვესვა ფანჯრები. თუ ფუნქცია არ მივანიჭეთ, ფანჯარა არ ჩავსვით, მაშინ როგორ უნდა გარემონტდეს შენობა? ხომ უნდა დავიწყოთ? ვფიქრობ, რომ ეტაპობრივად უნდა გაკეთდეს. რაც გაკეთდა, ეს კარგია,.
_ ეტაპობრივად ამ უზარმაზარი შენობის რემონტს სოფლის მხარდამჭერი პროგრამით 10 წლის მანძილზე გამოყოფილი თანხებიც კი არ ეყოფა სრული რეაბილიტაციისთვის…
_ მინდა, რომ გაკეთდეს. აქ შეიძლება განთავსდეს ცეკვის წრე და ათასი რამ. თუ ცოტა რაღაც არ გაკეთდა თავიდან, ისე როგორ იქნება? სახურავის გაკეთებით დაიწყო თავიდან.
_ როგორც ვიცით, სახურავი სოფლის მხარდამჭერი პროგრამის ფარგლებში არ გაკეთებულა.
_ არა. სახურავი გაკეთდა შარშან, გამგეობამ გააკეთა სხვა ხარჯებით. რომ არ გაკეთებულიყო, მთლიანად ნადგურდებოდა ეს შენობა. გეთანხმებით, რომ უამრავი პრობლემა დგას სოფელში, მაგრამ მე ვფიქრობ, რომ ეს იყო ძალიან მნიშვნელოვანი. ის თანხა, რაც გამოყოფილი იყო, გზების დაგებას მაინც არ ეყოფოდა.
_ ჩაატარეთ თუ არა სოფლის კრება პრიორიტეტების გამოსავლენად?
_ კი, ნამდვილად.
_ შეგიძლიათ, გვაჩვენოთ მოსახლეობის მიერ დაფიქსირებული ხელმოწერები?
_ ინფრასტრუქტურის სამსახურს აქვს ჩაბარებული. ხალხი თანახმა იყო ამაზე. მე არ ჩავრეულვარ _ მოსახლეობის აზრი იყო, _ გვითხრა ვალერი ჯინჭარაძემ.
ოზურგეთის მუნიციპალიტეტის გამგებელი მერაბ ჭანუყვაძე მიიჩნევს, რომ შენობა, რომელსაც 35 969 ლარის მეტალო-პლასტმასის ფანჯრები ჩაუსვეს, ნამდვილად საჭიროა და მისი აღდგენა მოსახლეობისთვის პრიორიტეტულია.
_ ბატონო მერაბ, რამდენად მიზანშეწონილად მიგაჩნიათ, ფაქტობრივად უფუნქციო, დანგრეულ, ამორტიზირებულ შენობას სოფლის მხარდამჭერი პროგრამის ფარგლებში, თითქმის, 36 000 ლარის მეტალო-პლასტმასის ფანჯრები ჩაუსვეს?
_ მცდარია მოსაზრება იმის თაობაზე, რომ სოფელ ოზურგეთში არსებული ადმინისტრაციული შენობა დანგრეული, ამორტიზირებული და უფუნქციოა. პირიქით, ექსპერტებისა და შესაბამის სფეროში კომპეტენტური ადამიანების აზრს თუ გავითვალისწინებთ, აღნიშნული შენობა საკმაოდ მდგრადია და ის მუნიციპალიტეტმა სრულიად უპრობლემოდ შეიძლება გამოიყენოს თავისი უფლებამოსილების გახორციელების მიზნით, როგორც ძირითად (განუსხვისებელ) ქონებად.
რაც შეეხება იმას, რომ სოფლის მხარდაჭერის პროგრამის ფარგლებში, 36 000 ლარის დახარჯვა არამართებულად მიგაჩნიათ, განგიმარტავთ, საქართველოს მთავრობის "სოფლის მხარდაჭერის პროგრამის დამტკიცების შესახებ" 2014 წლის 20 თებერვლის #183 დადგენილებას თანდართული პროგრამის მე-6 მუხლის მე-5 პუნქტის თანახმად, რწმუნებული ორგანიზებას უწევდა სოფლის კრების გამართვას, აწყობდა საჯარო განხილვას და კრების მონაწილეთა უმრავლესობის გადაწყვეტილებით, სოფლისთვის გამოსაყოფი თანხის ოდენობის გათვალისწინებით, ადგენდა პროგრამით სოფლისთვის გამოსაყოფი თანხის გამოყენების მიზნობრიობას, რაც აისახებოდა სოფლის მოსახლეობის კრების ოქმში.
ამდენად, მხოლოდ სოფლის მოსახლეობის საერთო კრების შედეგად განისაზღვრებოდა პროგრამით სოფლისთვის გამოსაყოფი თანხის გამოყენების მიზნობრიობა, რაც, ჩვენს შემთხვევაში, კანონის სრული დაცვითაა გახორციელებული.
_ ჩვენი ინფორმაციით, სოფელ ოზურგეთის ძველი კოლმეურნეობის შენობა არ ირიცხება მუნიციპალიტეტის ბალანსზე. აქედან გამომდინარე, მუნიციპალიტეტს ჰქონდა თუ არა უფლება სოფლის პროექტის ფარგლებში გაერემონტებინა შენობა?
_ საქართველოს ეკონომიკური განვითარების მინისტრის "სახელმწიფო საკუთრებაში არსებული უძრავი ქონების ოზურგეთის მუნიციპალიტეტის საკუთრებაში ძირითადი ქონების სახით გადაცემის შესახებ" 2008 წლის 15 იანვრის N1-1/28 ბრძანებით, სოფელ ოზურგეთში არსებული ადმინისტრაციული შენობა გადმოცემული აქვს მუნიციპალიტეტს ძირითადი ქონების სახით.
როგორც მოგეხსენებათ, ჩვენი მუნიციპალიტეტი ახლად შექმნილია, ის წარმოადგენს დამოუკიდებელ საჯარო სამართლის იურიდიული პირს და ფუნქციონირება, ფაქტობრივად, მიმდინარე წლის 4 აგვისტოდან დავიწყეთ. შესაბამისად, მუნიციპალიტეტმა საქართველოს კანონმდებლობის შესაბამისად, უნდა მოახდინოს, როგორც ხსენებული ქონების, ასევე, სხვა ნებისმიერი ქონების საჯარო რეესტრში ხელახალი რეგისტრაცია.
_ იმ ფონზე, როდესაც სოფელ ოზურგეთში, ისევე, როგორც სხვა სოფლებში მძიმე სოციალური ფონია, არ არის შიდა გზები მოწესრიგებული, დგას განათების პრობლემა, მოსახლეობა ითხოვს საყანე ფართობების შეღობვას, როგორ ფიქრობთ, რამდენად პრიორიტეტულია მოსახლეობისთვის მეტალო-პლასტმასის ფანჯრების ჩასმა?
_ რაც შეეხება ოზურგეთის მუნიციპალიტეტის სოფელ ოზურგეთში და სხვა ადმინისტრაციულ ერთეულებში არსებულ მძიმე სოციალურ ფონს, ალბათ, მოგეხსენებათ, რომ ასეთი ფონი დღეს და გუშინ არ დამდგარა. ის სათავეს 90-იანი წლებიდან იღებს. გასათვალისწინებელია ისიც, რომ თვითმმართველობის რეფორმის შემდეგ, მოხდა უპრეცედენტო შემთხვევა _ გამგებელი არჩეული იქნა პირდაპირი არჩევნებით, საყოველთაო, თანასწორი საარჩევნო უფლების საფუძველზე.
ამრიგად, მე და ჩემი გუნდი პატიოსანი, დაუღალავი და 24-საათიანი შრომით აუცილებლად მნიშვნელოვან წვლილს შევიტანთ ჩვენი მოსახლეობის უკეთესი მომავლის საქმეში.
_ ვინ ჩაიბარა აღნიშნული პროექტის შესრულება?
_ აღნიშნული პროექტების მიღება-ჩაბარების აქტების გაფორმება უზრუნველყო ოზურგეთის მუნიციპალიტეტის გამგეობაში შექმნილმა ინსპექტირების ჯგუფმა, საქართველოს კანონმდებლობით დადგენილი წესის თანახმად, _ აღნიშნავს ჭანუყვაძე " გურია ნიუსთან" საუბარში.
რაც შეეხება ინდმეწარმე გოჩა ერქომაიშვილს, ის აღნიშნავს, რომ მან აღნიშნული სამუშაოები კანონის სრული დაცვით შეასრულა, რაც ჩაიბარა სამხარაულის სახელობის ექსპერტიზის ბიურომ.
