საქართველოს პარლამენტის ტერიტორიული მთლიანობის აღდგენის საკითხთა დროებითი კომისიის მიერ 2012 წლის ნოემბრიდან 2014 წლის ნოემბრამდე პერიოდში გაწეული საქმიანობის ანგარიში წარმოადგინა კომისიის თავმჯდომარემ, გიორგი ვოლსკიმ.
მისი განცხადებით, კომისიამ საანგარიშო პერიოდში 26 სხდომა ჩაატარა, აქედან 22 სხდომა პარლამენტის ევროპასთან ინტეგრაციის კომიტეტთან, საგარეო საქმეთა, განათლების, მეცნიერებისა და კულტურის, ასევე დიასპორისა და კავკასიის საკითხთა კომიტეტებთან კოორდინირებულად ჩატარდა.
"საპარლამენტო კონტროლის ფარგლებში კომისია პრაქტიკული საქმიანობით ცდილობდა სახელმწიფო სტრუქტურების მხრიდან მოქნილი და კონსტრუქციული პოლიტიკის გატარების ხელშეწყობას, რომელიც მიზნად ისახავს აღიარების პოლიტიკის ფონზე აფხაზეთსა და ცხინვალის რეგიონში ჩართულობის პოლიტიკის გაძლიერებას, კონფლიქტის მშვიდობიანი გზით მოგვარებას".
ანგარიშში ასახულია კომისიის თანამშრომლობა ქვეყნის აღმასრულებელ სტრუქტურებთან, აფხაზეთის ავტონომიური რესპუბლიკის აღმასრულებელ და საკანონმდებლო ხელისუფლებასთან, კონფლიქტის მოწესრიგების საკითხებზე მომუშავე არასამთავრობო ორგანიზაციებთან.
საანგარიშო პერიოდში კომისიის წევრები აღმასრულებელი ხელისუფლებისა და ადგილობრივი თვითმმართველობის ორგანოების წარმომადგენლებთან ერთად იმყოფებოდნენ გამყოფი ხაზის გასწვრივ მდებარე სოფლებში საოკუპაციო რეჟიმის მიერ მავთულხლართებისა და სხვა ფიზიკური ბარიერების გავლების ადგილებში. მან დეტალურად ისაუბრა იმ პრაქტიკულ დახმარებაზე, რაც კომისიის საქმიანობის შედეგად მიიღო საოკუპაციო ხაზის გასწვრივ მცხოვრებმა მოსახლეობამ. კომისიის მიერ შემუშავდა "კონფლიქტით დაზარალებული რეგიონების სოციალურ- ეკონომიკური განვითარების სახელმწიფო სტრატეგია".
კომისიამ სხვა საპარლამენტო კომიტეტებთან ერთად არაერთხელ მოისმინა საქართველოს საგარეო საქმეთა მინისტრის მოადგილის, დავით ზალკალიანის და შერიგებისა და სამოქალაქო თანხმობის სახელმწიფო მინისტრის მოადგილის ქეთევან ციხელაშვილის ინფორმაციები ჟენევის დისკუსიების მიმდინარეობის შესახებ.
როგორც ანგარიშში აღინიშნა, კომისიის საქმიანობის ერთ-ერთი მნიშვნელოვანი მიმართულებაა საერთაშორისო ორგანიზაციებთან და მათ ფარგლებში არსებულ ინსტიტუტებთან აქტიური თანამშრომლობა, მათ შორის ქვეყნის შიგნით მიმდინარე რეფორმების წარმატებით უზრუნველყოფის, კონფლიქტის მშვიდობიანი გზით მოგვარების პროცესში საერთაშორისო ორგანიზაციათა როლის გაზრდის, ომით გაყოფილი საქართველოს მოსახლეობას შორის ნდობის აღდგენისა და ოკუპირებულ რეგიონებში უსაფრთხოებისა და ადამიანის უფლებათა დაცვის მექანიზმის შექმნის მიმართულებით. ამ მიზნით კომისიამ ევროპასთან ინტეგრაციისა და დიასპორისა და კავკასიის საკითხთა კომიტეტებთან ერთად დახურულ სხდომაზე ევროკავშირის სადამკვირვებლო მისიის ხლმძღვანელის, ტოივო კლაარის ინფორმაცია მოისმინა. ახლახან ასევე გაერთიანებულ სხდომაზე, სადაც აფხაზეთის ავტონომიური რესპუბლიკის მთავრობის წევრები და არასამთავრობო ორგანიზაციებიც მონაწილეობდნენ, ოკუპირებულ ტერიტორიებზე მდებარე კულტურული მემკვიდრეობის დაცვის საკითხებზე იმსჯელეს.
კომისია თავისი მომავალი საქმიანობის ერთ-ერთ უმნიშვნელოვანეს ამოცანად მიიჩნევს დაგროვილი მასალებისა და წინადადებების ანალიზის საფუძველზე კონფლიქტის მოწესრიგების ახალი "საგზაო რუკის" შემუშავებას და მის განსახილველად წარდგენას.
გიორგი ვოლსკის განცხადებით კომისიის და კონფლიქტების თემაზე მომუშავე ორგანიზაციების ამოცანაა დავანახოთ აფხაზებს და ცხინვალის რეგიონის მისახლეობას, რომ საქართველოსთან ერთად მათ უკეთესი ცხოვრების პოტენციალი აქვთ. გიორგი ვოლსკიმ ანგარიშის დასრულების შემდეგ პარლამენტის წევრთა მრავალრიცხოვან შეკითხვებს უპასუხა.
ქვეყნის ტერიტორიული მთლიანობის თემის აქტუალობიდან გამომდინარე გიორგი ვოლსკის ანგარიშთან დაკავშირებით ხანგრძლივი დებატები გაიმართა. დებატების დასრულების შემდეგ გიორგი ვოლსკიმ ტერიტორიული მთლიანობის აღდგენის დროებითი კომისიის საქმიანობის გაგრძელების შესახებ პარლამენტის დადგენილების პროექტი წარმოადგინა.
დღევანდელ პლენარულ სხდომაზე პარლამენტმა მესამე მოსმენით განიხილა "სახელმწიფო აუდიტის სამსახურის შესახებ კანონში" ცვლილებების შეტანის თაობაზე კანონპროექტი და მისგან გამომდინარე კანონპროექტი "საქართველოს პარლამენტის რეგლამენტში ცვლილების შეტანის შესახებ".
მეორე მოსმენით განიხილეს კანონპროექტი "უცხოელთა და მოქალაქეობის არმქონე პირთა სამართლებრივი მდგომარეობის შესახებ" კანონში შესატანი ცვლილებები და მისი თანმდევი კანონპროექტი "სახელმწიფო ბაჟის შესახებ საქართველოს კანონში ცვლილების შეტანის თაობაზე", რომელიც ინიციატორის თხოვნით დაჩქარებული წესით განიხილება.
