თბილისში, ლილოს დასახლებაში მდებარე სამკერვალო საწარმო "ელ-ჯი“-ს თანამშრომლის ინფორმაციით, "ნაციონალური მოძრაობის“ მიერ დაგეგმილ დღევანდელ აქციაზე საწარმოში დასაქმებულები იძულებით წაიყვანეს, თუმცა, საწარმოს ხელმძღვანელობა ამას კატეგორიულად უარყოფს.
"გურია ნიუსს“ საწარმოს ერთ-ერთი თანამშრომელი დაუკავშირდა, რომელიც აცხადებს, საწარმოს ხელმძღვანელმა ლაურა ღაჭავამ, იმის გამო, რომ მან უარი თქვა აქციაზე წასულიყო, სამსახურიდან გაათავისუფლა.
თავად ლაურა ღაჭავა ფაქტს კატეგორიულად უარყოფს და აცხადებს, რომ მისი საწარმოს თანამშრომლები აქციაზე ნებაყოფლობით წავიდნენ.
როგორც საწარმოს თანამშრომელი ხათუნა წაქაძე "გურია ნიუსთან“ საუბრისას ამბობს, აქციაზე წასვლასთან დაკავშირებით ისინი რამდენიმე დღით ადრე გააფრთხილეს.
"რამდენიმე დღის წინ მძღოლებმა გვითხრეს წარმოების თანამშრომლებს რომ ნახევარი დღე ვმუშაობთ, მერე აქციაზე უნდა წავიყვანოთ ხალხიო. თავიდან გვეგონა, რომ ეს სურვილის მიხედვით იყო, თუმცა დღეს თავად მოვიდა ქალბატონო ლაურა ღაჭავა საწარმოში და აკონტროლებდა აქციაზე ვინ მიდიოდა. გარეთ რომ გამოვედით, უკვე მობილიზებული იყო სამარშრუტო ტაქსები. თანამშრომლებს დავემშვიდობე და წამოსვლა დავაპირე. ჩემთან ერთად კიდევ ორი თანამშრომელი აპირებდა წამოსვლას, მაგრამ ქალბატონმა ლაურამ დამიძახადა მკითხა სად მივდიოდი, ვუთხარი, რომ სახლში ვაპირებდი წასვლას. პირდაპირ გამომიცხადა, რომ სამსახურიდან გათავისუფლებული ხართ და აღარ დაგინახოთ მოსულიო. ვიკითხე რა იყო ამის მიზეზი, თუმცა არანაირი ახსნა-განმარტება, რისთვის გამათავისუფლა, არ მოუცია, არც რაიმე დოკუმენტზე მომიწერია ჯერჯერობით ხელი. ღაჭავამ დაცვაც გააფრთხილა, რომ მე საწარმოში არ უნდა შემიშვან: არ დავინახო ეს ქალბატონი აქ მოსულიო. ეს საუბარი რომ ჩემთან ერთად მომავალმა თანამშრომლებმა გაიოგონეს, დაბრუნდნენ და იძულებულები გახდნენ მიტინგზე წასულიყვნენ. რამდენიმე ადამიანი სექციებიდან გაიპარა, იმის გამო რომ მიტინგზე არ წაყოლოდნენ“, _ ამბობს წაქაძე.
მისივე თქმით, საწარმოდან აქციაზე დაახლოებით 400 ადამიანი წავიდა.
"ნამდვილად ვიცი, რომ საწარმოს თანამშრომლების ნახევარზე მეტს არ უნდოდა აქციაზე წასვლა და ღაჭავამ აიძულა მას გაყოლოდნენ. დაახლოებით, საუბარია 400-მდე ადამიანზე“, _ ამბობს წაქაძე და დასძენს, რომ თუ სამსახურიდან უკანონოდ გამათავისუფლებენ, სასამართლოს მიმართავს.
"დაახლოებით, თვის ბოლოს ისედაც ვაპირებდი სამსახურიდან წამოსვლას, მაგრამ აქციის გამო ჩემი სამსახურიდან გათავისუფლება უკანონოდ მიმაჩნია“, _ აცხადებს "გურია ნიუსთან“ ხათუნა წაქაძე.
ლაურა ღაჭავა თავისი თანამშრომლის ბრალდებებს კატეგორიულად უარყოფს და ამბობს, რომ აქციაზე საწარმოს თანამშრომლები თავიანთი სურვილით წავიდნენ.
"არ არის ეს ინფორმაცია მართალი, რომ მე ვინმე ვაიძულე. ყველა თავისი ნებით მოდის. ერთი ქალბატონი ავად გახდა და ვუთხარი სახლში წასულიყო. პირიქით, თანამშრომლებმა მთხოვეს, რომ 2-3 საათით ადრე გაგვიშვი მიტინგზე გვინდა წასვლაო. ჩემი თანამშრომლების 80% აფხაზეთიდან და სამხრეთ ოსეთიდან ლტოლვილები არიან. უარს როგორ ვეტყოდი?! რა უფლება მქონდა გამეჩერებინა?" _ აცხადებს ღაჭავა.
მისივე თქმით, მან ზუსტად არ იცის, მისი რამდენი თანამშრომლია აქციაზე.
"არ ვიცი, რამდენი წამოვიდა და რამდენი დარჩა. ისე ძალიან ბევრია წამოსული“, _ ამბობს ღაჭავა.
რაც შეეხება ხათუნა წაქაძის გათავისუფლებას, ღაჭავა აცხადებს, რომ მან დღეს თავად გამოთქვა სურვილი, რომ სამსახურიდან გაეთავისულებინათ.
"საწარმოში ორი დღის მოსულია და როგორ ვეტყოდით აქციაზე წამოდიო?! დღეს თავად გამოთქვა სურვილი, რომ გაგვეთავისუფლებინა სამსახურიდან, ამას წარმოების ხელმძღვანელიც დაგიდასტურებთ. ორშაბათიდან არ ვიქნებიო, ასე უთქვამს“, _ აცხადებს ღაჭავა.
წარმოების ხელმძღვანელი დარეჯან ცეცხლაძე, ხათუნა წაქაძის გავისუფლებაზე ამბობს, ის ორშაბათიდან სამსახურში მისვლას ისედაც არ აპირებდა და ამის შესახებ თავადაც ინფორმირებული იყო.
"ხათუნა წაქაძემ საწარმოში მუშაობა 2 თვის წინ დაიწყო. გუშინწინ დამემშვიდობა, ორშაბათიდან სამსახურში აღარ მოვალო, ფიზიკურად მუშაობა არ შეუძლია. არც ველოდები, რომ ის ორშაბათიდან სამსახურში გამოვა. თუმცა განცხადება ჯერ არ დაუწერია. როგორ გეკადრებათ, დეზინფორმცია მოუწოდებია. ორშაბათს მოვიდეს, სამშაბათს და თუ უნდა დღედაღამე იმუშაოს. მაგას ვინ დაუშლის“, _ აცხადებს ცეცხლაძე.
