ჩოხატაურის მუნიციპალიტეტის სოფელ წიფნარში, თანამედროვე სტანდარტების სკოლის მშენებლობა და აღჭურვა რამდენიმე დღის წინ დასრულდა. ახალი სკოლა განათლებისა და მეცნიერების მინისტრმა, თამარ სანიკიძემ, ჩოხატაურის მაჟორიტარმა დეპუტატმა თემურ ჭკუასელმა, გურიის გუბერნატორმა გიორგი ჩხაიძემ და ადგილობრივი ხელისუფლების წარმომადგენლებმა მოინახულეს.
წიფნარის საჯარო სკოლას, 20 წლის შემდეგ, პირველად აქვს გათბობა, ბიბლიოთეკა და ექიმის კაბინეტი. აღსანიშნავია, რომ ახალაშენებული სკოლა ადაპტირებულია სპეციალური საგანმანათლებო საჭიროების მქონე მოსწავლეებისთვის.
წიფნარის საჯარო სკოლაში ამ ეტაპზე 35 მოსწავლე სწავლობს, თუმცა, 60 მოსწავლეზეა გათვლილი.
როგორც წიფნარში ამბობენ, საგანმანათლებლო კერის ახალ შენობას სოფელში ოჯახების მატებაც მოჰყვა _ ახალი სკოლის გამო სოფელში რამდენიმე ოჯახი დაბრუნდა,.
წიფნარის საჯარო სკოლა ამ დრომდე საბავშვო ბაღში ფუნქციონირებდა, რადგან ძველი შენობა ავარიულ მდგომარეობაში იყო ("გურია ნიუსი" ამ თემაზე არაერთხელ წერდა).
წიფნარელმა მოსწავლეებმა თამარ სანიკიძეს ახალი სკოლის აშენებისთვის მადლობა გადაუხადეს და საკუთარი შემოქმედებაც გააცნეს. სპეციალურად ამ დღისთვის გამართულ ღონისძიებაში გუთურის საჯარო სკოლის მოსწავლეების მონაწილეობდნენ, რომელმაც მინისტრს იმდენად ამაღელვებელი ფლეშ მობი დაუდგეს, რომ სანიკიძე აატირეს.
გუთურის საჯარო სკოლის მოსწავლემ ლექსი ცრემლების გარეშე ვერ წაიკითხა _ გამოსვლა იმდენად შთამბეჭდავი იყო, რომ ბავშვს დამსწრე საზოგადოებაც აჰყვა, კულმინაცია კი "სოსოიას" და "ხატიას" გამოჩენა იყო.
"უსინათლო ხატიამ" განათლების მინისტრს მზის დანახვა სთხოვა:
_ თქვენ შეგიძლიათ, დამანახეთ მზე! ნუ მეტყვით უარს _ გთხოვთ აგვიშენეთ ახალი სკოლა გუთურში, _ ეს ტექსტი "ხატიას" ცრემლებს გარეშე არ უთქვამს.
განათლების მინისტრს ამ მართლაც ნიჭიერ წარმოდგენაზე ემოციების შეკავება არ უცდია და აღნიშნა, რომ ეს იყო ერთ-ერთი ყველაზე თბილი და დასამახსოვრებელი შეხვედრა მოსწავლეებთან და პედაგოგებთან.
_ სასკოლო ინფრასტრუქტურის მკვეთრად გაუმჯობესება და თანამედროვე სასწავლო გარემოს შემქნა საგანმანათლებო რეფორმის ძირითად პრიორიტეტად რჩება, სამინისტრო ამ მიმართულებით დიდი სამუშაოებს აწარმოებს. მომდევნო პერიოდშიც სასკოლო ინფრასტრუქტურის განვითარება გახორციელებული იქნება გეგმაზომიერად, საჭიროებებიდან გამომდინარე და თანამედროვე საგანმანათლებლო სტანდარტებზე დაყრდნობით, _ აღნიშნა სანიკიძემ, რომლის თქმით, ამ ეტაპზე სასწრაფო რეაბილიტაციას ოთხმოცამდე სკოლა საჭიროებს.
განათლების მინისტრი წიფნარის შემდეგ სოფელ ზოტს ესტუმრა და ახალი სკოლის პროექტის პრეზენტაცია გამართა.
ზოტში საუკუნოვანი ძველი ხის შენობა იმდენად ავარიულია, რომ იქ გაჩერება სიცოცხლისთვის სახიფათოა. "გურია ნიუსი" ამ პრობლემის შესახებ ბევრჯერ წერდა. მაღალმთიან არსებულ სოფელში მდებარე ავარიულ სკოლაში ამ ეტაპზე 220 მოსწავლე სწავლობს, თუმცა, კონტიგენტი ყოველწლიურად მატულობს. განათლების მინისტრის ინფორმაციით, ზოტში ახალი სკოლის მშენებლობა რამდენიმე დღეში დაიწყება:
_ ზოტის სკოლა ერთ-ერთია იმ 8 სკოლიდან, რომლის მშენებლობაც წელს დაიწყება, _ აღნიშნა თამარ სანიკიძემ.
იქნება თუ არა სამინისტროსთვის მომავალი წლის პრიორიტეტში გუთურის სკოლის აშენება; მოწმდება თუ არა სკოლებში კვების ხარისხი; რა რეფორმას ახორციელებს განათლების სამინისტრო; რას სთავაზობს განათლების მინისტრი "ნაციონალური მოძრაობის’ წევრს სერგო რატიანს; არის თუ არა შუაში სანიკიძის თანამდებობა მამის ბიზნესთან, რომელის მიმართაც ბოლო დროს პრეტენზიები ისმის. ამ და სხვა მნიშნელოვან თემებზე განათლების მინისტრმა "გურია ნიუსს" ექსკლუზიური ინტერვიუ მისცა, რომელსაც მალე შემოგთავაზებთ.
