2014 წლის 29 სექტემბერს ქალაქ ოზურგეთის მერს, ბეგლარ სიორიძესა და ფიზიკურ პირ გიორგი კუნჭულიას შორის #34 ხელშეკრულება გაფორმდა.
ხელშეკრულების საგანი "ქალაქ ოზურგეთის მუნიციპალიტეტისთვის ოფიციალური ვებ-გვერდის დამზადება და ტექნიკური მომსახურებაა". მომსახურების ღირებულება, ოფიციალური ხელშეკრულების თანახმად, 4500 ლარს შეადგენს.
4500 ლარიან საიტზე ozurgeti.gov.ge ინფორმაცია მხოლოდ მერის და მერიის ადმინისტრაციის შესახებ იძებნება. ასევე, განთავსებულიa ინფორმაცია მერის მიერ განხორციელებული აქტივობების შესახებ.
მერიის საზოგადოებრივი ურთიერთობისა და საინფორმაციო განყოფილების უფროსი, იზა დარჩია ჩვენთან საუბრისას ამბობს, რომ საიტი ახალშექმნილია და დახვეწის რეჟიმშია:
_ ქალბატონო იზა, რა კრიტერიუმებით შეარჩიეთ საიტის დამამზადებლად ფიზიკური პირი გიორგი კუნჭულია და ხელშეკრულების დადებამდე გადაამოწმეთ თუ არა სხვაგან ვებგვერდის დამზადების ფასები?
_ აღნიშნული მომსახურება არ აღემატებოდა სატენდერო თანხის ღირებულებას, ამიტომაც არ გამოცხადდა ტენდერი. რაც შეეხება ფასებს, აღნიშნულ მომსახურებაზე გადავხედეთ სატენდერო ფასებს და ეს ფასი მათზე გაცილებით დაბალი თანხის გადახდას ითვალისწინებდა. ეს არის ორივე ორგანოში _ მერიასა და საკრებულოში. უბრალოდ, სულ ახლახან დავიწყეთ ინფორმაციების დადება და სრულყოფილად, ეტაპობრივად შეივსება ყველა სახის ინფორმაცია.
_ ვებ გვერდზე ქალაქ ოზურგეთის საკრებულოს შესახებ არანაირი ინფორმაცია არ იძებნება. აღარაფერს ვამბობთ განხორციელებულ აქტივობებზე, საკრებულოს სხდომის თარიღებზე, ნორმატიულ აქტებზე…
_ ახალი ვებგვერდია. ჩვენც ახლახანს დავდეთ და ისინიც დადებენ, რადგან საერთო საიტია.
მიღება ჩაბარების აქტში, რომელიც 6 ოქტომბერს არის ხელმოწერილი აღნიშნულია, რომ "2014 წლის 29 სექტემბერს #34 ხელშეკრულების შესაბამისად ფ.პ. გიორგი კუნჭულიამ ქალაქ ოზურგეთის მუნიციპალიტეტს დაუმზადა ვებგვერდი და გაუწია ტექნიკური მომსახურება". მიღება-ჩაბარების აქტს შემსყიდველის მხრიდან ხელს იზა დარჩია აწერს.
კითხვაზე ვინ არის ფიზიკური პირი გიორგი კუნჭულია და როგორ მოხდა მისი შერჩევა, დარჩია გვპასუხობს, რომ მისი შერჩევა "შემსყიდველი ორგანიზაციის" გადაწყვეტილებით მოხდა.
_ იქნებ დაგვიკონკრეტოთ, მერის გადაწყვეტილებით?
_მოვიკვლიეთ ინფორმაცია აღნიშნული კუთხით, შევხდით რამდენიმეს და ვისი შემოთავაზებაც უფრო კარგი და მორგებული იყო იმაზე შევჯერდით, _ ამბობს დარჩია.
ხელშეკრულებაში კუნჭულიას მისამართი ქალაქი თბილისია. ოფიციალურ დოკუმენტში საცხოვრებელი ადგილი დაკონკრეტებული არ არის. საიდენტიფიკაციო კოდი, რომელიც სავარაუდოდ (გამომდინარე იქიდან, რომ ფიზიკური პირია) პირადობის ნომერი უნდა იყოს ცენტრალური საარჩევნო კომისიის მონაცემთა ბაზაში არ იძებნება.
როგორც გაირკვა, კუნჭულიას კონტაქტები არც ქალაქ ოზურგეთის მერიაში აქვთ.
_ საკონტაქტო ინფორმაცია მე არ მაქვს. თუ კონკრეტულად გინდათ სხვა სახის ინფორმაცია მაშინ მოითხოვეთ საჯარო ინფორმაცია, _ დაგვიზუსტა დარჩიამ.
"გურია ნიუსის" მიერ გადამოწმებული ინფორმაციით ირკვევა, რომ ვებგვერდების დამზადება იმაზე გაცილებით იაფი ჯდება, რაც მერიამ ფიზიკურ პირს გადაუხადა.
მაგალითად ვებ სტუდია "არტიმედია" ვებგვერდის დამზადებას 600 ლარად გვთავაზობს. ამ ფასში გათვალისწინებულია ექსკლუზიური დიზაინი; მენიუების და გვერდების განუსაზღვრელი რაოდენობა; სიახლეების გვერდი; ფოტოგალერეა; 1 ენის მხარდაჭერა; ანიმირებული სლაიდშოუ; სოციალურ ქსელებში ინტეგრაცია; კონტაქტის და უკუკავშირის ფორმა; ინტერაქტიული რუკა; ვალუტის კურსი; ამინდის პროგნოზი; საიტის რუკა; საიტის შინაარსის მართვის სისტემა (CMS).
smartweb.ge, რომლის მიერ რამდენიმე სერიოზული კომპანიის ვებ გვერდია დამზადებული სხვადასხვა ფასებს გვთავაზობს. მინი პაკეტები 300 ლარიდან 800 ლარამდე მერყეობს, მედიუმ პაკეტის ღირებულება 700 ლარიდან იწყება და 1400 ლარამდე ადის. გოლდ პაკეტის ღირებულება, კი 1400 ლარიდან იწყება და 2000 ლარსაც სცდება. ოღონდ, ამ შემთხვევაში საიტი ორენოვანია.
მსგავს ფასებია სხვა კომპანიებშიც, რომლის შესახებაც ინფორმაციის მოძიება google-ს საძიებო პროგრამით ძალიან მარტივია.
