TV3 -ის საინფორმაციო სამსახურის უფროსმა იმედა დარსალიამ ტელეკომპანია დატოვა. ამის შესახებ მან საკუთარი "ფეისბუქის" გვერდზე დაწერა:
"დამთავრდა ერთი რთული და საინტერესო წელიწადი TV3-ზე, ჩემი სუბიექტური აზრით გავაკეთეთ ის, რომ მაყურებლისთვის ინფორმაციის ახალი წყარო შეგვეთავაზებინა, საავტორო ნიუსის სტილში – მთავარი ამბები 8 საათზე ნანა ლეჟავასთან ერთად, საქართველოში ზოგადად ყოველთვის მსჯელობის და კრიტიკის საბაბი ხდება "საავტორო ნიუსი" , მაგრამ ვფიქრობ , ეს იყო ხშირ შემთხვევაში საუკეთესო და საინტერესო ტექსტები წამყვანის მხრიდან, ასევე განსხვავებული სტილის და თემატიკის რეპორტაჟები რეპორტიორების მხრიდან. მადლობა ყველას, ვისთან ერთადაც მომიწია ახალი ამბების სამსახურში მუშაობა, ვინც ჩემ საყვედურებს და პრეტენზიებს ხან დუმილით, ხანაც კამათით ხვდებოდა", _ წერდა დარსალია.
"გურია ნიუსი" იმედა დარსალიას TV3-იდან წამოსვლის მიზეზებსა და სამომავლო გეგმებზე ესაუბრა.
_ რა გახდა TV3-იდან თქვენი წამოსვლის მიზეზი?
_ ორმხრივი შეთანხმების საფუძველზე, წელიწადნახევრით ადრე გავწყვიტეთ კონტრაქტი. ტელევიზიაში ნიუსის კეთების პირველი ეტაპი გავიარეთ. გულდასაწყვეტია, რომ არხის რესურსები შემდგომ ეტაპზე გადასასვლელად მზად არ აღმოჩნდა. მე, როგორც ნიუსის მენეჯერმა, იქიდან გამომდინარე, რომ ვეღარ ვვითარდებოდით, მივიღე გადაწყვეტილება, რომ ჩემს იქ ყოფნას აზრი არ ჰქონდა და დავტოვე არხი.
_ ფინანსური რესურსის უკმარისობას გულისხმობთ?
_ კი, სხვა არაფერი. ტექნიკური, ადამიანური რესურსი მაინც ფინანსებთან არის დაკავშირებული. არხი მუშაობს ფინანსების მოზიდვაზე. ჩემი კომპეტენცია არ არის ეს საკითხი. როდის რა იქნება, არ ვიცი. ჩემთვის მძიმე იყო, რომ შემდგომ ეტაპზე ვერ გადავედით და არ მინდოდა, ერთსა და იმავე ადგილზე გავყინულიყავი.
_ ნიუსის გუნდი აგრძელებს მუშაობას? სხვა ჟურნალისტები ხომ არ აპირებენ არხიდან წასვლას?
_ ვერ გეტყვით. თავად მათ უნდა ჰკითხოთ.
_ სხვა არხზე გადასვლას ხომ არ აპირებთ?
_ პროფესიის შეცვლას არ ვაპირებ. ჯერ-ჯერობით არ მაქვს შემოთავაზება. ავდექი და რომ იტყვიან, სახლში წავედი. გამორიცხული არ არის, რომ შემოთავაზებები იყოს.
_ შემოთავაზებები ტელეკომპანია "ჯი-დი-ეს"-ზე ბიძინა ივანიშვილის გადაცემას ხომ არ უკავშირდება?
_ ყველა ჟურნალისტი ამას მეკითხება. არ ვადასტურებ, იმიტომ რომ მართლა არ მქონია შემოთავაზება.
