საქართველოს პარლამენტის ჯანდაცვისა და სოციალურ საკითხთა კომიტეტის თავმჯდომარის, პრემიერის მრჩეველის დემოგრაფიულ საკითხებში დიმიტრი ხუნდაძის ინიციატივით, დღეს ოზურგეთის ალექსანდრე წუწუნავას სახელობის სახელმწიფო თეატრში ადგილობრივი მოსახლეობის ინფორმირების მიზნით, თუ რა დემოგრაფიული საფრთხის წინაშე დგას ჩვენი ქვეყანა და რა ნაბიჯებს დგას სახელმწიფო ამ მწვავე პრობლემის მოსაგვარებლად, შეხვედრა გაიმართა. შეხვედრას ქ. ოზურგეთის მუნიციპალიტეტის მერი ბეგლარ სიორიძე, დეპუტატი ზვიად კვაჭანტირაძე და მუნიციპალიტეტის გამგებელი მერაბ ჭანუყვაძე მასპინძლობდნენ:
"მივესალმები ჩვენს სტუმრებსა და მივესალმები გურიის მოსახლეობას, შეკრებილ დარბაზს. ჩემთვის სასიამოვნოა თქვენი სტუმრობა, თუმცა, სამწუხაროა ის მაჩვენებელი, რომელსაც სტატისტიკა გვთავაზობს კონკრეტულად ჩვენი რეგიონის მაგალითით, ვგულისხმობ მონაცემებს, რომლის მიხედვითაც, გურია იმ ექვს რეგიონს შორისაა, სადაც სიკვდილიანობა აღემატება შობადობას.
დემოგრაფიული პრობლემა საქართველოს წინაშე მდგარ პრობლემათაგან ერთ–ერთი უმთვრესია, მითუმეტეს, გაეროს ხალხთმოსახლეობის ფონდის კვლევების მონცემებით, რომლის თანახმად, 2050 წლისათვის საქართველოს მოსახლეობა 1 მილიონ 170 ათასით შემცირდება და ქართველები კავკასიის რეგიონში უმცირესობაში მოექცევიან. მინდა აღვნიშნო, რომ თქვენი აქტიურობა, ასეთი შეხვედრები და განსაკუთრებით კი დემოგრაფიული ფონდის დაარსება, ეს არის საუკეთესო ინიციატივა საქართველოში არსებული დემოგრაფიული მდგომარეობის გასაუმჯობესებლად, ჩვენ კი, ჩვენი მხრიდან, ყველა ადგილობრივი რესურსით , პროექტით ჩავერთვებით თქვენს წამოწყებაში.
ამ კუთხით, განსაკუთრებული და მნიშვნელოვანი ნაბიჯია ჯანდაცვისა დ სოციალურ სფეროში განხორციელებული წარმატებული პროექტები. ერთ–ერთია მდგომარეობის გაუმჯობესება შობადობის მატერიალური წახალისების მეშვეობით, ყოველ მესამე და შემდეგ შვილზე ფულადი დახმარება ბარში 150 ლარისა, ხოლო მთაში 200 ლარის ოდენობით, ასევე, უფასო სამედიცინო მომსახურეობა– საყოველთაო დაზღვევა.
გადაუდებელი აუცილებლობის დროს სახელმწიფოს მხრიდან 70 % იანი დაფინანსებისას ბენეფიციარს, თუ მისი სარეიტინგო ქულა 57 000 დან 150000– მდეა, ადგილობრივ დონეზე ანგარიშფაქტურის წარდგენის საფუძველზე, გადაერიცხება დარჩენილი 30 %, ასევე, მრავალშვილიანთა დახმარების პროგრამა, რომელიც გულისხმობს 4 ბავშვზე და ზემოთ (18 წლამდე ) ყოველთვიურად თითოეულ ბავშვზე 25 ლარის ოდენობით თანხის ჩარიცხვას.
მინდა, განსაკუთრებული პატივისცემა გამოვხატო სრულიად საქართველოს კათალიკოს პატრიარქის მიმართ. შობადობის გაზრდა მნიშვნელოვან კავშირშია კათალიკოს პატრიარქის ინიციატივასთან მესამე შვილის მონათვლასთან დაკავშირებით.
კიდევ ერთხელ მივესალმები ჩვენს სტუმრებს, რომლებიც პრეზენტაციის სახით წარმოგვიდგენენ დეტალურ მონაცემებს საქართველოში არსებულ დემოგრაფიულ მდგომარეობასა და სოციალურ სფეროში განხორციელებულ პროგრამებზე, რომელმაც თავის მხრივ, მნიშვნელოვნად შეცვალა არსებული ნეგატიური ფონი".
დიმიტრი ხუნდაძემ, თანამომხსენებელ "საქართველოს დემოგრაფიული აღორძინების ფონდ"-ის თავმჯდომარე თამარ ჩიბურდანიძესთან ერთად დეტალურად მიმოიხილეს ქვეყანაში შექმნილი მძიმე დემოგრაფიული სურათი და დეტალურად ისაუბრეს სოციალურ სფეროში განხორციელებულ წარმატებულ პროექტებზე.
დიმიტრი ხუნდაძე: "მინდა, განსაკუთრებული პატივისცემა გამოვხატო გურულების მიმართ. გურია ყველაფერში არის ლიდერი და ჩემთვის ერთ – ერთი პირველი რეგიონი, მჯერა, რომ ლიდერი იქნება ამ კუთხით და შობადობა გაიზრდება".
მირიან წიკლაური – ყაზბეგის მაჟორიტარი დეპუტატი: "ჩემთვის პატივია ამ კუთხის წარმომადგენლების წინაშე გამოსვლა. დღეს რაც ხდება, სახუმარო საქმე არაა, თუ ჩვენ არ მივხედავთ ამ საქმეს, ჩვენი ხსოვნაც აღარ იქნება ხვალ, ზეგ და წავიშლებით, ჩვენი კულტურის მხოლოდ ის ნაწილი დარჩება, რომელიც მკვდარ ერებს დარჩათ. თითოეულმა ჩვენგანმა უნდა გააცნობიეროს რომ დიდი ერის , მოდგმის შვილები ვართ, უნდა შევუძახოთ ერთმანეთს, გვერდში დავუდგეთ და შევეცადოთ, ჩვენი ერი გადავარჩინოთ".
ზვიად კვაჭანტირაძე: "მოგესალმებით ყველას. აუცილებლად უნდა დავძლიოთ ეს უმძიმესი მდგომარეობა, ცოტა მეტი დაინტერესება და ხელის წაკვრა გვჭირდება და გურია დაიბრუნებს თავის დიდებას, რომელიც ყოველთვის ჰქონდა."
(R)
