ჩოხატაურში საკადრო ცვლილებები იწყება

_ მე შევხვდი იმ ადამიანებს, რომლებსაც 2011 წელს, გამგეობაში სამუშაოს დაწყების თხოვნით განცხადებები ჰქონდათ დაწერილი. რამდენიმე ადამიანი ძალიან მომეწონა. ვფიქრობ, რომ ისინი ჩოხატაურს სჭირდება. შესაბამისად, ეს ადამიანები დღეიდან მუნიციპალიტეტის გამგეობაში მნიშვნელოვან თანამდებობებს დაიკავებენ, _ აღნიშნა იმედაშვილმა და დასძინა, რომ თანამდებობებზე ადამიანები ნაცნობობით და ნათესაობით აღარ დაინიშნებიან.

გამგებელმა ახალი კადრების და მათი თანამდებობის დაკონკრეტებისგან თავის შეიკავა, თუმცა, დაგვიდასტურა, რომ რამდენიმე ადამიანი შესაძლოა, სამსახურიდან უპასუხისმგებლობის და უსაქმურად ყოფნის გამო გაუშვას.

გამგებლის თქმით, რამდენიმე სფეროში ისეთი პრობლემებია მოუგვარებელი, რომლის მოგვარებაც ადვილი შესაძლებელი იყო:

_ როდესაც მუზეუმების გაერთიანებას შევხვდი, ხელმძღვანელს ვკითხე, რატომ არ იყო მოსე გოგიბერიძის სახლ-მუზეუმის აბრა ქვენობანში. მან ეს ინფორმაცია არ იცოდა და როგორც მითხრა, 2 თვეა, იქ არ ყოფილა. არადა, მე დაახლოებით 4-5 თვის წინ ვნახე, რომ აბრა არ იყო.

_ ეს იმას ნიშნავს, რომ მუზეუმების გაერთიანების ხელმძღვანელი შესაძლებელია გაათავისუფლოთ?

_ ამას ასე ნუ გაიგებთ. ამის გამო მან საყვედური მიიღო. ერთს გეტყვით დაზუსტებით _ ის ადამიანები, რომლებიც თავიანთ მოვალეობას უპასუხისმგებლოდ ეკიდებიან, ჩოხატაურს არ სჭირდება(?!) და ამას არ დავუშვებ, _ გვითხრა გამგებელმა.

ჩვენს კითხვაზე, მოხდება თუ არა კულტურის და სოციალური სამსახურის გაერთიანება, იმედაშვილმა აღნიშნა, რომ ამ საკითხზე მუშაობს:

_ მაქვს რიგი სამსახურების გაერთიანების მცდელობა, თუმცა, ჯერ დაკონკრეტება არ შემიძლია, რადგან საბოლოო გადაწყვეტილება არ მიმიღია. შემიძლია დაზუსტებით გითხრათ, რომ ახალი სახეები იქნებიან თანამდებობებზე და ახალი სამსახურიც შეიქმნება. ეს იქნება საინფორმაციო-ანალიტიკური სამსახური, რომელიც ძალიან საჭიროა ჩოხატაურისთვის და ეს სამსახური მხოლოდ მედიასთან მიმართულებაზე არ იმუშავებს. ანალიტიკური სამსახურის მთავარი ფუნქცია ბაზის შექმნა იქნება. ჩვენ უნდა ვიცოდეთ რა რესურსია ჩოხატაურში, რომ ისინი გამოვიყენოთ. ხმამაღლა ვაცხადებ, რომ ჩემი კარი ღიაა ყველა იმ ადამიანისთვის, რომლებსაც მიაჩნიათ, რომ არიან პროფესიონალები და ჩოხატაურისთვის კარგი საქმეების გაკეთება შეუძლიათ, _ გვითხრა იმედაშვილმა.

გამგებელმა იმ პრობლემებზეც ისაუბრა, რომელიც ამ დროისთვის ჩოხატაურშია:

_ ჩოხატაურში ძალიან ბევრი პრობლემაა. მოსაწესრიგებელია დასუფთავების სფერო; არ არსებობს სკვერი, პარკი _ ადამიანებს არ აქვთ საშუალება დაისვენონ, შვილები გაასეირნონ; შემოსასვლელებში არ არის ნიშნულები; ძალიან დიდი პრობლემაა არხებთან დაკავშირებით. მე პირადად შემოვიარე ჩოხატაურის ქუჩები და აღმოჩნდა, რომ არხების გაუწმენდაობის გამო, ბევრ მოსახლეს ძალიან სერიოზული პრობლემები აქვს. არის საკითხები, რომლის მოგვარება არც ისე რთულია. პრობლემაა სოციალური მომსახურების სააგენტოც და ამ საკითხს აუცილებლად მივხედავ. ჩემთან ძალიან ბევრი განაწყენებული ადამიანი მოდის იმ მიზეზით, რომ სოციალურმა სააგენტომ მათ ქულები არასწორად მიანიჭა. პირადად გადავამოწმე მათი საცხოვრებელი სახლები და დავრწმუნდი, რომ ეს ადამიანები სიმართლეს ამბობენ, _ აღნიშნა იმედაშვილმა.

გამგებლის ინფორმაციით, ბიუჯეტში ჩაიდება მუხლი, რომელიც ახალგაზრდულ პროექტებს დააფინანსებს: _ ძალიან მნიშვნელოვანია ახალგაზრდების წახალისების საკითხი. მე აუცილებლად მოვძებნი ნიჭიერ ადამიანებს მთელი მუნიციპალიტეტის მასშტაბით და მათ შესაძლებლობას მივცემ, საკუთარი ნიჭი წარმოაჩინონ. ვიცი, რომ კულტურის ცენტრი აკეთებს ამას, მაგრამ ამ საკითხს უფრო სხვანაირი მიდგომა უნდა. ჩვენ უნდა გვქონდეს ბაზა იმ ადამიანებისა, რომლებიც ჩოხატაურში ცხოვრობენ და თავისთვის, ჩუმად ქმნიან რაღაცეებს _ ხატავენ, ლექსებს წერენ, მღერიან. ვგეგმავ, რომ მომავალი წლის ბიუჯეტში იყოს მუხლი, რომელიც ახალგაზრდულ პროექტებს დააფინანსებს. ეს იქნება საჯარო კონკურსი, რომლის კომისიის წევრები აუცილებლად იქნებით თქვენ _ მედიის წარმომადგენლები. ღიად, საჯაროდ უნდა შეირჩეს ის პროექტები, რომლებიც ჩოხატაურისთვის სასარგებლო იქნება. არცერთი იდეის დაკარგვა არ შეიძლება. მე ყველას ვაძლევ შანსს, რომ მოიტანონ ჩვენამდე იდეები და საუკეთესოები აუცილებლად წახალისდება, _ თქვა იმედაშვილმა.

მისივე განცხადებით, ყველა თემა საჯარო იქნება: _ მოვუწოდებ ყველა მოქალაქეს, მონაწილეობა მიიღონ ბიუჯეტის დაგეგმვაში. ჩვენ, ჩვენი მოსახლეობისგან უნდა გავიგოთ, რა არის მათთვის მნიშვნელოვანი. მათი მოსაზრებები აუცილებლად იქნება გათვალისწინებული. აქვე გეტყვით, რომ მომავალი წლის ბიუჯეტში გაცილებით მეტი თანხა იქნება ჩასმული სოციალური სფეროს კუთხით, _ აღნიშნა გამგებელმა.

ლელა იმედაშვილის განმარტებით, ჩოხატაურის კულტურის სახლის მშენებლობაც მალე დაიწყება. გამგებლის ინფორმაციით, მოსამზადებელი სამუშაოები უკვე დაწყებულია და მშენებლობისთვის საჭირო დოკუმენტაცია გროვდება:

_ მოგეხსნებათ, რომ მშენებლობის დაწყებას მთელი რიგი პროცედურები ახლავს. ეკონომიკის სამინისტროს, გარემოს დაცვის სამინისტროს და კიდევ რამდენიმე სტრუქტურის თანხმობაა საჭირო. ამ ეტაპზე ორი თანხმობა უკვე გამგეობაშია, _ გვითხრა იმედაშვილმა.

გამგებლის ცნობით, სოფელ ხიდისთავისთვის საარჩევნოდ გადაცემული ავტობუსი, რომელიც დიდი ხანია უფუნქციოდ არის, კულტურის ცენტრს გადაეცემა:

_ არ მიმაჩნია მიზანშეწონილად, რომ ეს ავტობუსი ხიდისთავს ემსახურებოდეს, რადგან ამის უკან ბევრი სამართლებრივი პროცედურა დგას. ამასთან ერთად, სამართლიანია ხალხის შენიშვნა, თუ რატომ უნდა მოემსახუროს ავტობუსი კონკრეტულ სოფელს. ამიტომ მივიღე გადაწყვეტილება, ეს ავტობუსი კულტურის ცენტრს გადაეცეს, რომელსაც ნამდვილად სჭირდება და რაც ცენტრის ხარჯებსაც შეამცირებს, რადგან სხვადასხვა ღონისძიებაზე გამგზავრების დროს, მათ სერიოზული ხარჯების გაღება უწევთ, _ დასძინა გამგებელმა.

მანვე განმარტა, რომ ჩატარდება ინვენტარიზაცია, რომლის შედეგადაც მუნიციპალიტეტის ბალანსზე არსებული ავტომანქანები, რომლებიც არ ფუნქციონირებენ, აუქციონზე გაიყიდება: _ ჩოხატაურის გამგეობას არ სჭირდება უცხოური ფორმის მანქანები. ამიტომ მათ აუქციონზე გავყიდით და ვიყიდით ისეთ მანქანას, რომელიც ჩოხატაურს გამოადგება და ზამთარში სოფლებში გადაადგილებაც იქნება შესაძლებელი.

იმედაშვილი უმუშევრობის პრობლემასაც შეეხო და აღნიშნა, რომ უკვე არსებობს კონკრეტული პიროვნება, რომელიც ჩოხატაურში ინვესტიციებს ჩადებს: _ მე ვიყავი რამდენიმე სოფელში და ყველგან, ყველაზე მთავარი პრობლემა უმუშევრობაა. ყველა უმუშვრის საჯარო სამსახურში დასაქმება შეუძლებელია, ამიტომ საჭიროა ინვესტიციების მოზიდვა. ამ ეტაპზე შემიძლია გითხრათ, რომ არსებობს ადამიანი, ორგანიზაცია, რომელიც ჩოხატაურში ინვესტიციებს ჩადებს და შესაბამისად, ადამიანებს დაასაქმებს. ახლა დეტალებზე საუბარი არ შემიძლია, რადგან ჯერ ხელშეკრულება არ არის გაფორმებული _ ეს საკითხი მზადების პროცესშია. რამდენიმე დღეში ამ ინვესტიციის შესახებ უფრო ვრცლად გესაუბრებით, _ გვითხრა იმედაშვილმა.

ჩოხატაურის მუნიციპალიტეტის გამგებლის თქმით, მომავალ წელს მნიშვნელოვანი ყურადღება მიექცევა ინფასტრუქტურულ პროექტებს:

_ გზა, წყალი _ ეს ის საკითხებია, რომელიც ჩოხატაურისთვის პრიორიტეტი იქნება და ამ საკითხებს შეძლებისდაგვარად მოვაგვარებთ, _ დასძინა ლელა იმედაშვილმა.