კატო მიქელაძის სახელობის პრემიის მფლობელი, ქალთა ფონდ "ტასოს" თანადამფუძნებელი და დირექტორი მარინა თაბუკაშვილი გახდა. პრემიის გადაცემის ცერემონია 28 ნოემბერს, "შერატონ მეტეხი პალასში” გაიმართა.
"ქალთა ფონდი საქართველოში", კატო მიქელაძის სახელობის პრემიას, ქალთა უფლებების დამცველ ერთ აქტივისტს ყოველწლიურად გადასცემს.
პრემიის გადაცემის მიზანი ქალი უფლებადამცველების აღიარება და დაფასებაა, მათი საქმიანობის შესახებ საზოგადოების ცნობიერების ამაღლება, ქალთა უფლებების დამცველთათვის უსაფრთხო სამუშაო გარემოს შექმნა და ახალგაზრდა თაობის წახალისებაა.
ღონისძიება, გენდერული ძალადობის წინააღმდეგ ბრძოლის 16 დღიანი კამპანიის ფარგლებში, ნიდერლანდების საელჩოსა და გაეროს ქალთა ორგანიზაციის მხარდაჭერით ჩატარდა.
კატო მიქელაძის სახელობის პრემია, პირველად, 2013 წელს გაიცა და მისი მფლობელი ქალთა ინიციატივების მხარდამჭერი ჯგუფის დამფუძნებელი და აღმასრულებელი დირექტორი ეკატერინე აღდგომელაშვილი გახდა.
კატო მიქელაძემ განათლება ევროპაში მიიღო. დაამთავრა ბრიუსელის უნივერსიტეტის სოციალურ-პოლიტიკურ მეცნიერებათა ფაკულტეტი.
ქალთა მოძრაობის ევროპულ გამოცდილებას პარიზში გაეცნო და 1916 წელს საქართველოში დაბრუნების შემდეგ, თანამოაზრეებთან ერთად ქალთა უფლებებისათვის ბრძოლა დაიწყო. მისი თაოსნობით, 1917-1918 წლებში რეგიონალური ქსელი "ქალთა ლიგა" ჩამოყალიბდა. გამოსცემდა და რედაქტორობდა გაზეთ "ხმა ქართველი ქალისა".
2013 წლის 29 ნოემბრიდან, ქალთა უფლებების დამცველთა საერთაშორისო დღესთან დაკავშირებით, "ქალთა ფონდმა საქართველოში" კატო მიქელაძის სახელობის ყოველწლიური პრემია დააწესა, რათა ხაზი გაესვას იმ მემკვიდრეობას, რომელიც ქართველ ფემინისტ ქალებს და უფლებადამცველებს გააჩნიათ. 2013 წლის პრემიის მფლობელი "ქალთა ინიციატივების მხარდამჭერი ჯგუფის" დამფუძნებელი ეკა აღდგომელაშვილი გახდა.
