პარლამენტის ჯანმრთელობის დაცვისა და სოციალურ საკითხთა კომიტეტის სხდომაზე სოციალურად დაუცველი ოჯახების (შინამეურნეობების) სოციალურ-ეკონომიკური მდგომარეობის შეფასების ახალი მეთოდოლოგიის შესახებ მოისმინეს ინფორმაცია, რომელიც სოციალური მომსახურების სააგენტოს დირექტორმა, გაიოზ თალაკვაძემ წარმოადგინა.
მისი განცხადებით, რეფორმა 2013 წლის სექტემბერში დაიწყო. გაფორმდა ურთიერთგაგების მემორანდუმი შრომის, ჯანმრთელობის დაცვისა და სოციალური დაცვის სამინისტროსა და გაეროს ბავშვთა ფონდს – იუნისეფს შორის. რეფორმისთვის საჭირო მონაცემთა შეგროვებაში ჩართული იყო სტატისტიკის სამსახური. შემუშავდა ახალი მეთოდოლოგია, რომელშიც გათვალისწინებულია ქვეყანაში მიმდინარე რეფორმები და სიღარიბის ტენდენციები, გადაიხედა საჭიროების ინდექსი.
როგორც სოციალური მომსახურების სააგენტოს დირექტორმა აღნიშნა, ახალი მეთოდოლოგიის მთავარი პრინციპი არის ის, რომ დაითვლება ოჯახის შემოსავალი და დაითვლება ოჯახის ის ქონება, რომელიც პოტენციურად არის შემოსავლის მომტანი.
გაიოზ თალაკვაძის განცხადებით, ძველი მეთოდოლოგიის ცვლადები: სოციალური აგენტის სუბიექტური შეფასება და საყოფაცხოვრებო საგნები (მაცივარი, სარეცხი მანქანა, გაზქურა, წყლის გამათბობელი ავზი, გაზის წყლის გამათბობელი, გაზის გამათბობელი, კონდიციონერი, ტელევიზორი, თამბაქოს მოხმარება) აღარ იქონიებენ გავლენას ახალი ქულების განსაზღვრაში.
გაიოზ თალაკვაძემ დეტალურად ისაუბრა ახალი მეთოდოლოგიის ცვლადებზე, საჭიროების ინდექსის კატეგორიებზე (განისაზღვრა 10 კატეგორია), ახალ ფორმულასა და ფულადი ბენეფიტების ახალ სტრუქტურაზე. ძველი ფორმულის მიხედვით, 57 000 სარეიტინგო ქულის ქვემოთ ოჯახის პირველი წევრი იღებდა 60 ლარს, ხოლო ყოველი შემდგომი წევრი 48 ლარს, ბავშვის დანამატი არ იყო გათვალისწინებული. ახალი ფორმულის მიხედვით, მოხდა სარეიტინგო ქულების გრადაცია. 30 000 ქულის ქვემოთ ოჯახის ნებისმიერი წევრი მიიღებს 60 ლარს, ხოლო ბავშვისთვის გათვალისწინებულია 10 ლარიანი დანამატი. 30 000-დან 57 000 ქულამდე ოჯახის ნებისმიერი წევრი მიიღებს 50 ლარს და 10 ლარს ბავშვის დანამატს, 57 000-დან 60 000 ქულამდე ოჯახის ნებისმიერი წევრი მიიღებს 40 ლარს და 10 ლარს ბავშვის დანამატს, 60 000-65 000 ქულამდე ოჯახის ნებისმიერი წევრი მიიღებს 30 ლარს და 10 ლარს ბავშვის დანამატს, ხოლო 65 000- 100 000 ქულამდე ოჯახი მიიღებს მხოლოდ ბავშვის დანამატს 10 ლარს.
დღეის მდგომარეობით, 57 000 სარეიტინგო ქულაზე ქვემოთ მყოფი ოჯახები სოციალურ დახმარებას თვეში საშუალოდ 165 ლარს იღებებ. ახალი პროექტით ოჯახებს, რომლებსაც 30 000 ნაკლები სარეიტინგო ქულა ექნებათ, სოციალური დახმარე გაეზრდებათ საშუალოდ 331 ლარამდე ბავშვის დანამატის გარეშე, 30 000-დან 57 000-მდე საშუალოდ 207 ლარამდე, 57 000-დან 60 000 -მდე 163 ლარამდე, ხოლო 60 000 დან – 65 000- მდე 111 ლარამდე. ამ ცვლილების შედეგად 38 ათასი ოჯახით მეტი იქნება მოცული სოციალური დახმარებით.
სოციალური მომსახურების სააგენტოს დირექტორმა ისაუბრა ასევე სოციალურად დაუცველი ოჯახების (შინამეურნეობების) სოციალურ-ეკონომიკური მდგომარეობის შეფასების ახალი მეთოდოლოგიის სხვა პარამეტრებზეც და დეპუტატების შეკითხვებსაც უპასუხა.
ჯანმრთელობის დაცვისა და სოციალურ საკითხთა კომიტეტის თავმჯდომარემ, დიმიტრი ხუნდაძემ განაცხადა, რომ კომიტეტში გაგრძელდება ახალ მეთოდოლოგიაზე მუშაობა და მან არასამთავრობო ორგანიზაციებისა და სხვადასხვა პოლიტიკური ჯგუფების წარმომადგენლებს მუშაობაში აქტიური ჩართულობისკენ მოუწოდა.
_ ქვეყანაში 450 ათასი მოქალაქე არის სოციალურად დაუცველის სტატუსის მატარებელი და სახელმწიფოს მხრიდან ისინი გარკვეულ ფინანსურ მხარდაჭერას ყოველთვიურად ღებულობენ, რაც ახალი ხელისუფლების პირობებში გაორმაგდა, მაგრამ ის კრიტერიუმები, რაც აქამდე იყო, 2007 წელს მიღებული, სრულად ვერ ასახვას ოჯახის სოციალურ-ეკონომიკურ მდგომარეობას და ვფიქრობ, რომ ბოლომდე სამართლიანი არ არის და თან ხშირად ხდებოდა ხოლმე პოლიტიკური მიზნებისთვის გამოყენება. მაგალითად , საარჩევნო კალენდარს ემთხვეოდა ხოლმე ქვეყანაში სოციალურად დაუცველთა რიცხვის მატება და შემდგომ შესაბამისად კლება. დაუშვებელია, რომ რომელიმე პოლიტიკურმა გუნდმა ეს გამოიყენოს პოლიტიკურ იარაღად. ამიტომ, ჩვენ უნდა შევქმნათ, შევიმუშაოთ ახალი კრიტერიუმები, რომელიც იქნება ობიექტური და სამართლიანი სოციალურად დაუცველთა მიმართებაში. ვისაც ეკუთვნის შესაბამისი ფინანსური მხარდაჭერა სახელმწიფოს მხრიდან უნდა ჰქონდეს და არ უნდა დარჩეს ამ დახმარების მიღმა, – განაცხადა დიმიტრი ხუნდაძემ.
