როგორც პროგნოზირებადი იყო, ლანჩხუთის მუნიციპალიტეტის 2015 წლის ბიუჯეტის პროექტი საკრებულომ უკან დაუბრუნა გამგეობას, რა თქმა უნდა შესაბამისი შენიშვნებით. შენიშვნები საკმაოდ ბევრი იყო, რაც საკრებულოს საფინანსო-საბიუჯეტო კომისიის თავმჯდომარის, ალეკო სარიშვილის მოხსენებით ბარათში მკაფიოდ აისახა. საკრებულოს კომისიების, ფრაქციების მოსაზრებებს დაემატა მუშა ჯგუფების ტერიტორიული ორგანოების მოსახლეობასთან შეხვედრის შემდეგ გამოთქმული მოსაზრებები და ამის მიხედვით შეირჩა ის პრიორიტეტები, რომელთა დაფინანსება ახალ ბიუჯეტში უნდა გაიზარდოს.
კერძოდ კი, უნდა გაიზარდოს სკოლამდელი აღზრდის დაწესებულებების დაფინანსება მათი ფუნქციონირების სტანდარტებთან მიახლოების მიზნით. ასევე გაიზარდოს კულტურის ცენტრის ბიუჯეტი, მოხდეს ქალაქ ლანჩხუთის კეთილმოწყობის ხარჯების ზრდა. აგრეთვე გათვალისწინებული უნდა იყოს შენობა-ნაგებობების ტექნიკური პასპორტების და მიწის საკადასტრო აზომვითი ნახაზების დამზადების და საინფორმაციო საშუალებებში გამოქვეყნების ხარჯები. ახალ პროექტში უნდა მოხდეს სარეზერვო ფონდის ზრდა და საკრებულოს აპარატსა და გამგეობაში თანამშრომელთა შრომითი ანაზღაურების ხარჯების მატება. ასევე ბავშვთა დღის ცენტრ "იავნანას" და ჰუმანიტარული დახმარების ხელშეწყობის პროგრამის დაფინანსების ზრდის აუცილებლობა გამოიკვეთა დეპუტატების მიერ.
საგულისხმო და საკმაოდ კრიტიკული დასკვნა გააკეთა საკრებულოს სამანდატო, საპროცედურო, იურიდიულ საკითხთა და ეთიკის კომისიამ, რომელიც 5 პუნქტად ჩამოყალიბდა:
ბიუჯეტის პროექტი ვერ პასუხობს "საქართველოს საბიუჯეტო კოდექსის" მოთხოვნებს, რადგან უგულებელყოფილია საბიუჯეტო სისტემის უმთავრესი, ყოვლის მომცველობის პრინციპი, ანუ ბიუჯეტის ყველა შემოსულობები, გადასახდელები სრულყოფილად არაა ასახული. პროექტი არ არის ორიენტირებული საზოგადოების მოთხოვნების იდენტიფიკაციაზე, არ არის გათვალისწინებული მოსახლეობის კეთილდღეობის ზრდაზე ორიენტირებული პროგრამების დაფინანსება.
ბოლომდე არ არის დაცული გამჭვირვალეობის პრინციპი, რადგან ზოგიერთი შემოსულობა და ხარჯი დაუსაბუთებელია. მოსახლეობისთვის ბიუჯეტის პროექტის რეალური შინაარსი დაფარული და ბუნდოვანია.
სახეზეა ჩრდილოვანი ეკონომიკის მასშტაბების ზრდა ა(ა)იპ საფეხბურთო კლუბ "გურიასთან" დაკავშირებით, რომლის ბიუჯეტის შემცირებით შესაძლებელი იქნება თვითმმართველობის კოდექსით გათვალისწინებული პრიორიტეტების: სკოლამდელი აღზრდის, კეთილმოწყობის და სოციალური პროგრამების დაფინანსების ზრდა.
კომისიას მიზანშეწონილად მიაჩნია ლანჩხუთის მუნიციპალიტეტის 2015 წლის ბიუჯეტის პროექტში შეიქმნას წინა წლებში წარმოქმნილი დავალიანების დაფარვისა და სასამართლო გადაწყვეტილების აღსრულების ფონდი.
ლანჩხუთის მუნიციპალიტეტის საკრებულოს წევრები ვალდებულნი არიან დაიცვან ორგანული კანონის "ადგილობრივი თვითმმართველობის კოდექსის" 45-ე მუხლის მე-5 პუნქტის მოთხოვნები საკითხის კენჭისყრაზე დაყენების დროს.
უნდა ითქვას, რომ მოსახლეობას აღნიშნულთან დაკავშირებით გარკვეული შენიშვნები გააჩნია. მაგალითისთვის, სოფელ ნინოშვილის მოსახლება მიიჩნევს, რომ უპირველესად ხელფასები უნდა გაეზარდოს საბავშვო ბაღის თანამშრომლებს; ასევე, ისინი მიზანშეუწონლად მიიჩნევენ საფეხბურთო კლუბ "ლანჩხუთის გურიას" ადგილობრივი ბიუჯეტიდან დაფინანსებას. სოფელ ჩოჩხათის მოსახლეობა კი თვლის, რომ დაფინანსება უნდა გაიზარდოს სოფლის მეურნეობის განვითარების კუთხით. სუფსის მცხოვრებლებს პრიორიტეტად, მძიმე სოციალური მდგომარეობიდან გამომდინარე, სოციალურად დაუცველი მოსახლეობისთვის დახმარების გაწევაც მიიჩნევენ.
ძირითადად იკვეთება, რომ სხვადასხვა სოფლის მოსახლეობა ყველაზე მეტ აქცენტს სკოლამდელ აღზრდაზე აკეთებს. მათი აზრით, ამ კუთხით მეტი თანხა უნდა დაიხარჯოს, ასევე, უნდა მოგვარდეს ბავშვების ტრანსპორტირების პრობლემაც, ყველაზე სკეპტიკურად კი მოსახლეობა "გურიას" ბიუჯეტიდან დაფინასებას უყურებს.
