მარინა და სოსო კაპანაძეების ოჯახი ოზურგეთის მუნიციპალიტეტის სოფელ ჭანიეთში ცხოვრობს. ისინი ხუთი შვილის მშობლები არიან და მიუხედავად გასაჭირისა, შრომობენ და შვილებს ზრდიან.
მარინა კაპანაძეს სოფლის ცენტრალურ გზაზე შევხვდით. მეზობლებში დადიოდა, იქნებ, ღორის ქონი გაქვთ, თითებს ვეღარ ვამოძრავებ, რაღაც მალამოებს ვისვამდი, თუმცა არაფერმა მიშველაო. როგორც თვითონ ამბობს, სარეცხის რეცხვის დროს წყლისა და ფხვნილისგან თითები დაუზიანდა, სახსრებზე კანი გადაძვრა მერე სოკოვანი გარსიც წარმოიქმნა. მწვანე იოდით დამუშავებული ადგილები ღია ჭრილობები უფროა, ვიდრე, უბრალოდ, გარეგანი გაღიზიანება.
კაპანაძეების ოჯახი, სოციალური დახმარების სახით, ყოველთვიურად 224 ლარს იღებს. წელიწადში ერთხელ კი, ბავშვებისთვის, 300 ლარს იღებენ ერთჯერადი დახმარების სახით. თუმცა, ეს ზღვაში წვეთია ხუთი შვილის გასაზრდელად.
_ სოციალურ დახმარებას ვიღებ და მეტი ვის რა მოვთხოვო? მერიდება, თუმცა, სარეცხი მანქანა რომ მქონდეს, მართლაც, ბედნიერი ვიქნებოდი. წლების წინ მეზობელმა, ხატია ლომჯარიამ მაჩუქა სარეცხი მანქანა, პატარა ზომის იყო, მაგრამ მე მყოფნიდა. მერე გაფუჭდა და ახლა ხელის თითები, ყოველდღიური რეცხვისგან, ისე გადამეყვლიფა, უკვე სახსრების მოხრაც მიჭირს. არადა, ხუთი ბავშვის სარეცხს რა ვუყო? _ ცრემლების შეკავებას ლამობს ხუთი მცირეწლოვანი შვილის დედა.
ამის შემდეგ, კაპანაძეების ოჯახს შინ ვეწვიეთ.
_ ჩვენი უფროსი ბიჭი, გიორგი, რომელიც 12 წლისაა, ნერვული პრობლემების გამო, დეიდასთან იმყოფება. წამლის ფულს, ხანდახან ჩემი და თუ წამომაშველებს, თორემ, რასაც ჩვენ ვიღებთ, საჭმლისთვის ძლივს გვყოფნის, _ ამბობს ქალბატონი მარინა.
სოსო და მარინა კაპანაძეების შვილები ყველა მცირეწლოვანია: გიორგი 12 წლისაა, ლაშა _ 10-ის, რუსუდანი ცხრა წლის ხდება, ნიკუშა ხუთი წლისაა, დათო კი სამი წლის ახლახან გახდა. ახალგაზრდა მშობლებს, თავად ადრე გარდაეცვალათ მშობლები და მათი მომხმარე, როგორც თვითონ ამბობენ, უფალი ღმერთი და მრავალი კეთილი ადამიანია, რომლებიც ხან საკვებით, ხანაც სამოსით ეხმარებიან და ასე იზრდებიან პატარები.
_ დახმარებით ბავშვებს ხან ტკბილეული ვუყიდე. ზოგმა ისიც თქვა, კანფეტის ყიდვას მოერიდოს და სარეცხი მანქანა შეიძინოსო. რა ვქნა, ხუთ შვილს თვეში ერთხელ კანფეტი არ ვუყიდო? უფრო უარესიც მომისმენია _ რამდენსაც მოუვლი, იმდენი ბავშვი უნდა გააჩინოო… მე მორწმუნე ადამიანი ვარ და ღმერთი რამდენსაც მაჩუქებს, იმდენ შვილს გავაჩენ, სიცოცხლეს არ მოვუსპობ, ამაზე უფროც რომ გამიჭირდეს, _ ამბობს მარინა კაპანაძე.
დედას, რომელიც 35 წლისაა, საკუთარი გასაჭირის გამხელა იმიტომ ერიდება, ვინმეს ზარმაცი არ ვეგონო და არ იფიქრონ, შვილებისთვის სამოსის გარეცხვა მეზარებაო. არადა, მის სახსრებდაზიანებულ თითებს, როგორც ჭანიეთის ამბულატორიის ექიმი ირმა გორგოშიძე ამბობს, ამ ეტაპზე ყურადღება აუცილებლად სჭირდება და საშიში არაფერია იმ შემთხვევაში, თუ მკურნალობას ჩაიტარებს, შეწყვეტს სარეცხი ფხვნილისა და წყლის ზემოქმედებას. წინააღმდეგ შემთხვევაში, იქნებ, გართულდეს და მკურნალობას შედეგი არ ექნებაო.
_ ხუთ შვილს ხუთი დღის განმავლობაში ტანსაცმელი როგორ არ გავურეცხო? რეზინის ხელთათმანები ორ დღეში შემომეხა, ყიდვაც ჭირს, როცა თითოეულ თეთრზე ვარ დამოკიდებული. არ მინდა, ვინმეს ეწყინოს, ახლა ამას რომ ხმამაღლა ვამბობ. სოციალური დახმარება კი მეძლევა და უმადური ადამიანი არ ვარ. ახლახან, კვების პროდუქტებითაც დამეხმარა რაიონის ხელმძღვანელობა, _ ასე ასრულებს ჩვენთან საუბარს მრავალშვილიანი დედა.
სოსო კაპანაძე პერიოდულად თურქეთში ხან ჩაის საკრეფად, ხან კიდევ სხვადასხვა ფიზიკური სამუშაოს შესასრულებლად დადიოდა. თუმცა, იმის შიშით, რომ ვინმემ არ გაიგოს და სოციალური დახმარება არ მოგვეხსნასო, ამ მძიმე სამუშაოზე უარი თქვა.
სოფელ ჭანიეთის გამგებელი მერაბ ბერაძე ამბობს, რომ შესაძლებლობის ფარგლებში, კაპანაძეების მრავალშვილიან ოჯახს დახმარებას უწევს ხელისუფლება: _ რაც შეეხება სარეცხ მანქანას, მისი ყიდვა ჩვენ შესაძლებლობის ფარგლებს აღემატება, პირადად მე რომ მქონდეს შესაბამისი თანხა, თავად ვუყიდდი, _ გვითხრა ბერაძემ.
სოსო და მარინა კაპანაძეები ამბობენ, რომ ბანკებსაც მიმართეს სესხისთვის, თუმცა, ერთხელ დარღვეული პირობის გამო, ამჯერად უარი უთხრეს.
