ქალაქ ოზურგეთის მერ ბეგლარ სიორიძესთან შეხვედრაზე, ხუთშაბათობით, მოქალაქეები დილით ადრიანად იკრიბებიან და ელოდებიან, რომ თავიანთ პრობლემებზე ესაუბრონ. ხელისუფლების წარმომადგენლისგან ყურადღებასა და დახმარებას მოითხოვენ.
" გურია ნიუსი" დაინტერესდა რა ხდება ქალაქ ოზურგეთის მერთან მიღების დღეს. დღევანდელი დღე გამონაკლისი არ ყოფილა, ბეგლარ სიორიძესთან შეხვედრის მიზნით უამრავი ოზურგეთელი იყო შეკრებილი, მათ ჟურნალისტების დანახვაზე თვალზე ცრემლი მოადგათ, თითოეული მათგანი ერთმანეთს ასწრებდა გასაჭირის თხრობას.
ქალაქ ოზურგეთის მერი მათ არ შეხვედრია, მოქალაქეების მიღება 11 საათზე მერის მოადგილე ალეკო ბურჭულაძემ და თანაშემწე კახაბერ ღლონტმა დაიწყეს.
მერი კილაძე: "ვცხოვრობ ოზურგეთში, ბესიკის ქუჩაზე, ცხრაჯერ მოვედი მიღებაზე, კი მხედავთ როგორი მოხუცებულიც ვარ, სახლის სახურავი გადამიძრო ქარმა, სულ ჩამოდის წყალი, დილიდან აქ ვარ, არჩევნების მერე რამდენჯერ მოვედი კაცმა არ იცის, სახლში 82 წლის მოხუცები ვცხოვრობთ სახლში, რა ვქნათ? ზამთარი მოდის, რა გვეშველება?"
ნაზი კალანდაძე: " ოზურგეთში, ნემიროვიჩ – დანჩენკოს ქუჩაზე ვცხოვრობ, ორი წელია დავდივარ, აღარ ვიცი რა ვქნა, რა გზას დავადგე, ვის მოვთხოვო, წინა მთავრობამ არ მომეხმარა, ახლა ამასთან დავდივარ, მერს სულ ვერ ვნახულობ, მოადგილე მხვდება, შევალ მიმიღებს, დამპირდებიან და ვარ ასე, გვაინტერესებს არის თუ არა ბიუჯეტში ჩვენთვის რაიმე დახმარება? სახლში შვილი და ორ მცირეწლოვანი შვილიშვილი მყავს, გაუსაძლისად ვცხოვრობთ, პატარა ბავშვებთან რომ სახლში წვიმა ჩამოგივა, როგორ უნდა იყო?"
ეთერი წულაძე: "ვცხოვრობ ბათუმის 33 ნომერში, მეუღლე გარდაცვლილი მყავს, ვარ ღრმად მოხუცებული, მარტოხელა, მეზობლების ამარა, სულ სასწრაფოს იძახებს მეზობლები, შვილი სამუშაოდ გადახვეწილი მყავს საქართველოდან, მაგრა იქაც ვერ აკეთებს ვერაფერს, 20 წლის წინ ასაშენებელად დაწყებული სახლი მიტოვებული გვაქვს, შიგნით ისე წვიმს, როგორც გარეთ, ამ ზამთარს ვერაფრით ვერ გავძლებ, თუ არ მომეხმარებიან, სახურავით დამეხმარონ, სხვას არაფერს არ ვითხოვ, საიდან მოგცეთ რომ არ გვაქვს საშუალებაო ასე მეუბნებიან, დიდი ხანია დავდივარ, თქვენ გეცოდინებათ დაგვეხმარებიან? "
ნანი რიჟამაძე: -"მე რძალი უკანონოდ გაანთავისუფლეს სამსახურიდან წინა ხელისუფლებამ, სასამართლოს მივმართეთ, მაგრამ ისე წაიყვანეს საქმე ვერაფერს ვერ გავხდით. ახლა ახალი ხელისუფლების იმედი მქონდა, ამ არჩევნებზე მთელმა ოჯახმა ვირბინეთ, მთელი ქუჩა ფეხზე დავაყენეთ, რომ ამათ გაემარჯვათ, მაგრამ არაფერი. ვიყავი მიღებაზე, ალეკო შემხვდა, კარგად მიმიღო, დამპირდა, ველოდებოდი, არაფერი არ ისმის, დღეს ისევ მოვედი. მრავალსულიანი ოჯახი ვართ, პენსიის ამარა, ყველა უმუშევარი, ჩვენ მოხუცები ინვალიდები ვართ და ჩვენი პენსია წამლებში არ გვყოფნის, ბავშვები ცოდვები არ არიან? რა ქნან? სამართალი როდის იქნება გვითხარით.. რამდენი რამ სჭირდებათ ბავშვებს, საჭმლის ფული აღარ გვაქვს".
ლეილა სალუქვაძე: "მე ვარ მრავალსართულიანი ბინის წარმომადგენელი, მეგობრობის ქუჩაზე მდებარე 50 ოჯახი ცხოვრობს, მაქვს განცხადება მოტანილი, სადაც მთელი ბინის მაცხოვრებელები აწერენ ხელს, ვითხოვთ ყურადღების მიქცევას, 50 წელია ჩვენი ბინა არასოდეს არავითარი რემონტი არ ჩატარებია, ახლა წვიმის დროს ოთახებში წყალი შემოდის კედლებიდან აწვიმს, საშინელი მდგომარეობაა, მთელი ბინის მაცხოვრებელები გაუსაძლის პირობებში ვცხოვრობთ, ზამთარი მოდის და არ ვიცით რა გვეშველება, ყველაზე მეტად ამ ბინებში ცხოვრობს პენსიონერი და უმუშევარი ადამიანები. ჩვენ რა საშუალება გვაქვს? ამასთანავე არის წყლისა და სხვა უამრავი პრობლემა, მაგრამ ვინ მოაგვარებს ამაზე პასუხი ჯერ არ გვაქვს, ვნახოთ, დღეს რას გვეტყვიან."
ლეილა ანდღულაძე: "ანდღულაძის ქუჩაზე, #5 ვცხოვრობ, "მე ვარ ინვალიდი, უსინათლო, მეზობელმა თუ არ წამომიყვანა ისე ვერ დავდივარ, რამდენჯერმე ვიყავი, ვთხოვე ამ ზამთარში შეშით დამეხმარეთ მეთქი, პენსია წამლებში არ მყოფნის, მარტოხელა, მოხუცი ვარ, გუშინ ვიყავი კიდევ და ასე მითხრეს, არაა საშუალება და რა ვქნათო, აბა ჩვენ რა ვქნათ? შვილები კი მყავს, მაგრამ თბილისში არიან ლუკმა -პურის საშოვნელად, ნათესავის ბინებს აქვთ თავი შეფარებული. ყველაფერი მაწუხებს, კი ვარ სოციალურად დაუცველ, მაგრამ წინასწარ მაქვს გამოტანილი და ახლა ვერაფერს ვერ ვიღებ. წლების განმავლობაში ბუღალტრად ვმუშაობდი, დღეს მოვხუცდი და არავის არ ვუნდივარ. იქნებ თქვენ გაიგოთ, თუ არის რაიმე სახის დახმარება ჩვენნაირ გაჭირვებულებზე".
მოქალაქეების ჩაწერის შემდეგ "გურია ნიუსმა" კომენტარი სთხოვა, ქალაქ ოზურგეთის მერის მოადგილეს ალეკო ბურჭულაძეს, რომელიც მოქალაქეებს ხვდებოდა ხუთშაბათს, მიღების დღეს, თუმცა მერის მოადგილემ და თანაშემწემ მოქალაქეების მიერ დასახელებულ პრობლემებზე " გურია ნიუსთან" კომენტარი არ გააკეთეს.
დაეხმარება თუ არა ქალაქის მერია მოქალაქეებს, რომლებიც ზამთრის მოახლოებასთან ერთად უამრავი პრობლემის წინაშე დგანან, არის თუ რა ბიუჯეტში გამოყოფილი თანხა მარტოხელა მოხუცებისთვის შეშით დახმარებაზე, მიიღებს თუ არა სტიქიით დაზარალებული ოჯახები სახლის სახურავებს -ამ კითხვებით " გურია ნიუსმა" ქალაქ ოზურგეთის მერიის პრესსამსახურს მიმართა, მათ პასუხს მოგვიანებით შემოგთავაზებთ.
