“სამწუხაროდ, ნაციონალურ არხებზე ხდება ქვეყანაში მიმდინარე პროცესების მარგინალიზაცია, რეალურ ცვლილებებს კი, ვფიქრობ, ვერაფერი შეაჩერებს”, _ ამბობს პარლამენტის წევრი დიმიტრი ლორთქიფანიძე. იგი დღეს ჩვენი გაზეთის სტუმარია.
_ ბატონო დიმიტრი, ოპოზიციური პარტიების შეფასების პარალელურად, ივანიშვილმა ქართული მედიაც საკმაოდ გააკრიტიკა…
_ მედია საშუალება, რომელიც არ არის ნეიტრალური მხარე, ანუ მიუკერძოებელი არბიტრი, დამეთანხმებით, ხშირ შემთხვევაში გვევლინება პროპაგანდისტულ მანქანად, ინსტრუმენტად. ამის დასტურია ნაციონალურ არხებზე გასული სიუჟეტები. იფრქვევა ლანძღვა-გინება, ნაცვლად იმისა, რომ ობიექტურად გაშუქდეს პროცესები, რომლებსაც სათავეში ჩაუდგა ადამიანი, რომელსაც აქვს უდიდესი კაპიტალი, ბოლო 15 წლის მანძილზე ეწევა აქტიურ ქველმოქმედებას, ყოველდღიურ რეჟიმში დგას თავისი ქვეყნის კულტურის თუ სხვა სფეროების სადარაჯოზე, ეხმარება სხვადასხვა სოციალურ ფენას, რომ საზოგადოებაში შეინარჩუნოს თავისი ადგილი. ეს იყო ივანიშვილის უტყვი პოლიტიკის გამოხატულება და ახლა ღიად განაცხადა პოლიტიკაში შემოსვლის შესახებ.
_ ეს მისი მხრიდან სწრაფი გადაწყვეტილება იყო?
_ მე ასე არ ვფიქრობ, მან ყველაფერი კარგად გააანალიზა, ის ძლიერი პრაგმატიკოსია. მაშინ, როდესაც ქართული საზოგადოება სასოწარკვეთილი იყო, უცებ თამაშში შემოვიდა მძლავრი ფიგურა, რომელსაც ზურგს უმყარებს სერიოზული კაპიტალი. მან განაცხადა, რომ ქმნის პარტიას.
_ ხალხი არ ენდობა ოპოზიციურ ძალებს და თვლის, რომ ისინი თავიანთ ინტერესებს აყენებენ წინ.
_ გეთანხმებით, ოპოზიციის ბევრი ლიდერი, დღეს, დისკრედიტირებულია. მათ ვერ უერთგულეს იმ ღირებულებებს, რომლითაც ფასდება ნებისმიერი პოლიტიკოსი. ამიტომ, იმ ჯანსაღ ძალებთან ერთად, რომლებიც არ მიეყიდნენ “ნაციონალურ მოძრაობას”, არ აირჩიეს მმართველი გუნდის თამაში, ქმნის ერთ დიდ კონგლომერაციას და დაუპირისპირდება სახელისუფლო პოლიტიკურ ძალას, რომელიც საკუთარი ძალაუფლების ტყვეობაში იმყოფება. ჯერ საბოლოო კონტური არ არის გამოკვეთილი, კონსულტაციები გრძელდება. შემდეგ შიდაპრაიმერის დონეზე ვიფიქრებთ იმ ბირთვზე, რომლითაც მოხდება მისი დანაპირების შესრულება.
_ ჩვენ ვხედავთ, როგორი მანკიერი და წარუმატებელია ერთპარტიული მმართველობა…
_ პარლამენტში აბსოლუტური უმრავლესობით მოსვლა არ ნიშნავს “ნაციონალური მოძრაობის” რეკორდის მოხსნას. იქ იქნებიან სხვადასხვა პოლიტიკური გაერთიანებები, კოალიცია არ ნიშნავს, რომ ეს იქნება ერთიანი პოლიტიკური გუნდი; გახსოვთ, რომ კრახით დასრულდა “მოქალაქეთა კავშირის” მოღვაწეობა. ასეთ ბედს გაიზიარებს “ნაციონალური მოძრაობაც”.
_ თუმცა, სახელისუფლებო გუნდი უკვე საარჩევნო რეჟიმშია. შესაძლებელია, დაინიშნოს ვადამდელი საპარლამენტო არჩევნები?
_ არა მგონია ეს ხელისუფლებისთვის იყოს ხელსაყრელი. სამწუხაროდ, იგი გაუაზრებელ ნაბიჯებს დგამს _ კაცს, რომელიც 15 წლის განმავლობაში ცხოვრობს საქართველოში, ეწევა აქტიურ ქველმოქმედებას, მის სახელს უკავშირდება ბევრი სახელმწიფო პროექტი, მოულოდნელად უუქმებენ მოქალაქეობას. მასში ეძებენ რუსულ კვალს, პრობლემებს უქმნიან მის ბანკს, მოქალაქეობას ართმევენ მის მეუღლეს. ეს მათ წისქვილზე არ ასხამს წყალს. ჩვენ არ უნდა ვიჩქაროთ, არ გავუსწროთ მოვლენებს წინ. ვადამდელი არჩევნები არც ოპოზიციისთვის არ უნდა იყოს მისაღები. საარჩევნო საკითხებზე მომუშავე ჯგუფის მიერ შემუშავებული პროექტი გადაგზავნილია განსახილველად ევროპის საბჭოს ვენეციის კომისიაში. პირველად დასკვნას ნოემბერ-დეკემბერში მოვისმენთ, რასაც უნდა მოჰყვეს საკანონმდებლო ორგანოში აქტიური განხილვები. წმინდა ტექნიკური თვალსაზრისით, გაზაფხულამდე აღნიშნული კოდექსის მიღება ვერ მოხერხდება.
_ ვანო მერაბიშვილის მისამართით გაკეთებული განცხადებებით რა უნდა იფიქროს საზოგადოებამ?
_ ბატონი ბიძინას მხრიდან აღიარებულია ის გარემოება, რომ პოლიციის რეფორმა არის წარმატებული, მაგრამ ის ამბობს, თუ ყოველივე ამას ჩამოვაშორებთ სოდ-ს, კუდ-ს, იმ საიდუმლო პოლიტიკური პოლიციის წარმომადგენლებს, ჯანსაღი პოლიციის სისტემა სახელმწიფოებრივად საუკეთესო პირობაა ზედნაშენის აშენებისთვის. რაც შეეხება მის მოწოდებას, აქ იცვლება მისი ტონი, ის აცნობიერებს, რომ პრეზიდენტთან ყველაზე დაახლოებული პირი შინაგან საქმეთა მინისტრია. როგორც მის უპირველეს მრჩეველს მიმართავს, არ გადადგას წინ ნაბიჯი, რადგან იქ უფსკრულია და შეიძლება, პოლიტიკურად ჩაიჩეხოს. თუ სააკაშვილი ყურს არ დაუგდებს, მაშინ პასუხისმგებლობას აკისრებს მერაბიშვილს, რომ მიიღოს გადაწყვეტილება და გადადგეს, ისე, როგორც თავის დროზე გადადგა ზურაბ ჟვანია. მინისტრის გადადგომაში ივანიშვილი შესაძლოა, სულაც არ გულისხმობს მის პოლიტიკურ ველში დატოვებას. ვფიქრობ, მან მერაბიშვილს მისცა შანსი, რომ მიიღოს სწორი პოლიტიკური გადაწყვეტილება.
_ რატომ გექცევათ საპარლამენტო უმრავლესობა ასე ხისტად?
_ ჩვენ შორის ბრძოლა დიდი ხანია დაიწყო. ისინი ვერ ეგუებიან განსხვავებულ აზრს, მე ვცდილობდი კონკრეტულ საქმეებში პენიტენციალურ სისტემაში დავხმარებოდი ადამიანებს, რადგან დღემდე ადგილი აქვს წამებისა და არაადამიანური მოპყრობის ფაქტებს; ვცდილობ, ეს ფაქტები საერთაშორისო ორგანიზაციების მსჯელობის საგანი გახდეს. ისე აღშფოთდნენ, რომ გამათავისუფლეს დაკავებული თანამდებობიდან _ აღარ ვარ პარლამენტის ადამიანის უფლებათა დაცვის კომიტეტის თავმჯდომარის მოადგილე. ვხედავთ, რომ ქვეყანაში არ არსებობს მართლმსაჯულება, ფეხქვეშ ითელება ადამიანის უფლებები, დაუცველია კონსტიტუციით გარანტირებული უფლება; მაგალითად, საკუთრების უფლება _ თქვენ იცით, რომ გონიოში, 270 ოჯახს ერთბაშად წაართვეს კუთვნილი ქონება. საქართველო, აღმოსავლეთ ევროპის სახელმწიფოებს შორის, სტრასბურგის სასამართლოში შესული საჩივრების რაოდენობით პირველ ადგილზეა. ეს ტრაგედიაა და ამას სჭირდება პოლიტიკური გადაწყვეტილების მიღება. მალე დავინახავთ, თუ რა შეუძლია ქართველ ხალხს.
_ რა შეუძლია ხალხს, თუ თვლის, რომ იგი პოლიტიკური თამაშიდან გამოთიშეს?
_ მას სჭირდება ლიდერი და პოლიტიკური წარმმართველი ძალა. ასეთ შემთხვევაში, ის აუცილებლად გააკეთებს სწორ არჩევანს. ახლა, მთავარია, არ “გავაფეტიშოთ” ივანიშვილის შესაძლებლობები, არ ვიბრძოლოთ ახალი უმრავლესობის ჩამოყალიბებისთვის.
_ თუ ხელისუფლება ებრძვის განსხვავებულ აზრს, ბუნებრივია, მას არ სურს ჰყავდეს თავისუფალი მოქალაქე.
_ რა თქმა უნდა, ეს მათ ინტერესებში არ შედის; დღეს, სამუშაო ადგილი აქვთ მათ მხარდამჭერებს, დანარჩენები განწირული არიან შიმშილისთვის, ან სამათხოვროდ მიიღებს სიღარიბის ზღვარს ქვემოთ მყოფთათვის განკუთვნილ ფულად დახმარებას. როცა ქვეყანაში არ მოქმედებს სოციალური პოლიტიკის განმსაზღვრელი კანონმდებლობა, შრომის კანონი კაბალურია, ხდება საზოგადოების დამცირება და შემდეგ დამორჩილება. ხელისუფლების “მათრახის პოლიტიკა” ქართველ ხალხს ყოველდღიურად დამორჩილებისკენ მიერეკება და დაუმორჩილებელთათვის ფიზიკური არსებობის რისკიც კი დგას! დღეს, ქვეყანაში მილიონ ოთხასორმოცდაათი ათასი ადამიანია ღარიბის სტატუსის მატარებელი! _ ეს იმას ნიშნავს, რომ ერს მალე აღარ ექნება სიცოცხლის გაგრძელების შანსი. ამიტომ, ივანიშვილის, როგორც კარგი სტრატეგისა და ძლიერი პრაგმატიკოსის გამოჩენა, იმედის მომცემია.
