დღეს, ოზურგეთის აგრარულ ბაზარსა თუ სხვადასხვა სავაჭრო მაღაზიებში, სასურსათო პროდუქტებსა და სხვადასხვა პროდუქციაზე ფასების ცვლა შეინიშნება. საგრძნობლად აიწია ბრინჯის, წიწიბურას, ტომატისა და თვით მარილის ფასიც კი.
"ბრინჯი დღემდე 1 ლარი და 30 თეთრი ღირდა, ახლა უკვე 30 თეთრით კიდევ გაძვირდა. წიწიბურას ფასმა 70 თეთრით მოიმატა. თუ აქამდე 1 ლარი და 70 თეთრი ღირდა, ახლა კილოგრამი 2 ლარი და 40 თეთრი ღირს. მარილიც კი გაძვირდა. 10 თეთრით მოიმატა კილოგრამის ფასმა", _ გვეუბნებიან გზადაგზა შემხვედრი მოქალაქეები.
რაც შეეხება აგრარულ მეურნეობას, ერთი კილოგრამი კომბოსტო 1 ლარი ღირს, ორიოდე დღის წინ კი მისი ფასი 50 თეთრი იყო. ჯერჯერობით, კილოგრამი ხმელი ლობიო 5 ლარი ღირს, ხორცი _ 11 ლარი, ყველი კი _ 7 ლარი და 50 თეთრი.
ხილეულს რაც შეეხება, ყველაზე იაფი მანდარინია. გამყიდველი თამარ ჩოგაძე ამბობს, რომ ბაზარში ვაჭრობს და ზოგი რამ შინიდან მოაქვს, ზოგ სახეობას კი ყიდულობს და ყიდის.
"აბა, რა ვნა? სხვა რა გზა მაქვს. სადაა მთავრობა, მე, როგორც ვიყავი ადრე, ახლაც ისე ვარ. ჩვენი ხმა არჩევნებზე უნდათ, მარტო. აბა, ამ მანდარინის 8 თეთრად ჩაბარება გადაყრა არაა? მირჩევნია აქ დავაღამო და 20 თეთრად ხომ გავყიდი, მეტად თუ არა", _ გვაჩვენებს საკმაოდ ხარისხიან მანდარინს, რომლის რეალიზაციაც, როგორც თვითონ ამბობს, საკმაოდ ჭირს.
პენსიონერი ბადრი ფაცურია, დახლებს შორის, გამყიდველებს ყველსა თუ ფქვილს ევაჭრება და შეწუხებული გვთხოვს, მისი ნათქვამი სიტყვა-სიტყვით მივიტანოთ მთავრობის ყურამდე:
"მტერს ისეთი, ნაციონალები რომ იყვნენ, მაგრამ რაა ჩვენი არჩეულების ეს ხუთიათასლარიანი ხელფასები, კიდევ დანამატიო და თქვენ პენსიას სექტემბრიდან მოგიმატებთო, ვის იგდებენ და რატომ? კომუნისტების დროს ხალხსაც არ შიოდა და თვითონ თუ ჭამდნენ, ადამიანებიც არ ჰყავდათ მაინცდამაინც უკმაყოფილო. ძალიან კარგად ხვდებიან, რაც უნდა ქნან, ხალხს იმის ნახევარსაც თუ მიაქცევენ ყურადღებას, როგორც საკუთარ თავს და ახლობლებს პატრონობენ, ამდენი გაჭირვებული არ იქნება ქვეყანაში. ეს უკვე მეტისმეტია და არ მინდა, ხალხმა შეიძულოს ეს ხელისუფლება…"
მაყვალა მორჩილაძე ოზურგეთის აგრარულ ბაზარში ვაჭრობს, გაბრაზებული საუბრობს, თან თავისთან მომუშავეებს გასძახის – "ყველა რომ ბუზღუნებთ, მობრძანდით აქ ! ვარდის მოკრეფა უეკლოდ რომ გინდათ. გამაგებინეთ, რა უბედურებაა ეს ფასების ზრდა და დოლარის კურსის წაღმა-უკუღმა ტრიალი. ხმაც მივეცით ოცნებას და ბევრიც ვირბინეთ, მაგრამ ერთმანეთის მზრუნველები დარჩნენ საბოლოოდ, ესენი და ნაციონალები. სახელფასო დანამატი ავიღეო, ხადური რომ იძახის და ივანიშვილმა კიდე, _ ცუდი არაფერი ხდებაო, უთხარით მაგათ, ფასები რომ იზრდება, ჩვენც გვინდა დანამატი პენსიაზე და ჩვენს ხელფასზე. იქნებიან თანახმა? მონებად გვიყურებენ, ხმა მოუნდებათ, მერე კი ჩვენი აზრი კი არა, ჩვენი თავიც მეწყერს წაუღია, ვის ვაინტერესებთ?"
ნარგიზ ძიძიგური ნედლი თევზითა და ხორცეულით ვაჭრობს.
"რით ვარჩინო ოჯახი, არ ვიცი. დღითი-დღე უარესობისკენ მივდივართ. კაცი გამოდის (ივანიშვილზე საუბრობს. ავტ.) და ამბობს, ყველაფერი კარგადააო. გააგებინეთ რამენაირად, "ხამსას" რომ ძლივს ვყიდი, ხელებწაყინული ვურევ ამ ქვაბში ხელებს. სიცივეს ვინ დაეძებს, იმდენი გამაყიდვინა, სახლში სამყოფი საჭმელი მივიტანო. ვიცი, ხვალ-ზეგ უარესი მდგომარეობა იქნება. ფულიც არ აქვს ხალხს, რომ ივაჭროს. რას გვერჩოდნენ ამ საახალწლოდ, სული რომ ამოგვართვეს? ესაა პასუხი ჩვენი ხმების სანაცვლოდ? _ საყვედურობს ის. იქვე, ახლოს, ხურმითა და მწვანილით მოვაჭრე, ციალა დოლიძე კი მოკლე კომენტარს აკეთებს, ტელევიზორში მაინც ნუ გამოვა მასეთი სიტყვით, სირცხვილია-თქო, მიაწვდინეთ ხმა, რაცხა, არჩევნებამდე სხვანაირად გვპირდებოდი-თქო, გაახსენეთ. "
ჯუმბერ კონცელიძე, მეუღლესთან ერთად, რძის ნაწარმს ჰყიდის.
"ახლა რაც ხდება, მეტისმტია და ფასების ასეთ ზრდას, მხოლოდ მთავრობის ხალხის ხელფასები თუ გაუძლებს. თუ რამეს იღონებენ, კარგია და თუ არა და ჩვენ რა შეგვიძლია?"
შედარებით იაფი დღეს ოზურგეთის ბაზარში ცოცხალი გოჭი ღირს, კილოგრამს 7 ლარად აფასებენ. გასულ თვეს კი, კილოგრამი 10 ლარი ღირდა.
