ეროვნული პირველობის ორ ლიგაში ერთბაშად 5 გურული კლუბი რომ გამოდის, ეს პირველად ხდება. ასევე პირველადაა, როცა ერთდროულად 2 გურულ კლუბს ფარმ-კლუბებიც ჰყავს. გარდა ამისა, “გურიას” _ უმაღლეს ლიგაში, ხოლო “ბახმაროს” პირველ ლიგაში აღზევების შანსი აქვთ. უკვე დაასრულა სეზონი ყველაზე ტიტულოვანმა გურულმა კლუბმა “გურიამ” _ ეროვნული თასის პირველი მფლობელი დასკვნით ტურში ისვენებს. უფულო ლანჩხუთელები მოწინავეთა შორის არიან.
მაშინ, როცა წალენჯიხასა და ხობში ფეხბურთის გუნდებს 300 ათას ლარით აფინანსებენ, ბათუმში, საჩხერესა თუ მარტვილში კი ეს თანხა ნახევარ მილიონს აღემატება, ლანჩხუთში “გურიას” წლევანდელი დაფინანსება მხოლოდ 150 ათასი ლარია. ამასთან, მიმდინარე სეზონში ფეხბურთელებს ჯამაგირი საერთოდ არ მიუღიათ და ამ ფონზე მართლაც საოცრებაა, ჩვენებურები სატურნირო ცხრილის მოწინავეთა შორის რომ იმყოფებიან. ქართულ საფეხბურთო წრეებში არავის სჯერა, რომ წელს “გურიას” ფინანსურად უკიდურესად უჭირს.
როგორ ახერხებენ ამ პატარა სასწაულის მოხდენას, რა გეგმები და მიზნები აქვთ და იბრძოლებს თუ არა “გურია” უმაღლეს ლიგაში გადასვლისთვის, ამის შესახებ გურიის რეგიონული ფეხბურთის ფედერაციის თავკაც კახა ებრალიძეს მანამდე ვესაუბრეთ, სანამ გურიას ფეხბურთის ფედერაციის პრეზიდენტი ზვიად სიჭინავა ეწვეოდა:
_ კახა, ერთი წელი გავიდა, რაც გურიის ფედერაციას ხელმძღვანელობთ. რა ხდება დღეს გურულ ფეხბურთში?
_ არის ფინანსური პრობლემები, მაგრამ მაქსიმალურად ვცდილობთ გურიაში ფეხბურთის პროპაგანდა გავწიოთ. ვატარებთ რამდენიმე შეჯიბრს ჭაბუკებს შორის. ახლახანს ფეხბურთის ფედერაციამ კარგ წამოწყებას ჩაუყარა საფუძველი _ რეგიონიდან სხვადასხვა ასაკის მოზარდები მიგვყავს შაბათობით თბილისში, სადაც ხდება შერჩევა. რამდენიმე ლანჩხუთელი და ოზურგეთელი ჭაბუკი მობურთალი გადავიდა მეორე ტურში, ანუ სპეციალისტთა მოწონება დაიმსახურეს. კარგი იქნება, თუ ინვესტორები შემოვლენ, ბიზნესმენები დაეხმარებიან საფეხბურთო სკოლებს, კლუბებს. რეგიონში ფეხბურთი რომ უყვართ, იქედანაც ჩანს, რომ პირველ ლიგაში ორი კლუბი გვყავს, ხოლო რეგიონალლიგაში ერთბაშად 3 კლუბი გურიიდან პირველად გამოდის. ასევე პირველად მოხდა, რომ “გურიას” და “მერცხალს” _ ორივეს ჰყავს ფარმ-კლუბი. რა თქმა უნდა, უკეთესი იქნება, გურიას ორი თუ არა, ერთი კლუბი მაინც ჰყავდეს უმაღლეს ლიგაში, მაგრამ ვიყოთ რეალისტები _ არსებული ფინანსური მდგომარეობის თუ შესაძლებლობების ფონზე, ეს გამორიცხულია. აქვე უნდა აღვნიშნო, რომ გურიის სამივე მუნიციპალიტეტში ფეხბურთის სფეროში ის ადამიანები მუშაობენ, რომლებსაც ბევრი აქვთ გაკეთებული კონკრეტული რაიონის, მთლიანად რეგიონისა და შესაბამისად, ქართული ფეხბურთისთვის. სწორედ მათი დამსახურებაა, რომ დღეს გურიაში არსებული პრობლემების მიუხედავად, ფეხბურთი ცოცხლობს და ვითარდება.
_ რა მდგომარეობაა გურულ კლუბებში? რა თქმა უნდა, ფინანსურ კუთხეს ვგულისხმობ.
_ ჩოხატაურს გუნდი რეგიონულ ლიგაში ჰყავს, შედარებით ნაკლები ხარჯი აქვს და ასე თუ ისე, შეძლებისდაგვარად, “ბახმაროს” ამ კუთხით ნაკლებად აქვს პრობლემები. რაც შეეხებათ “გურიასა” და “მერცხალს”, მათ პრობლემები აქვთ. თუმცა, დღეს ჩვენს ქვეყანაში ფეხბურთი პრიორიტეტულია, არის ხელშეწყობა და დიდი იმედი გვაქვს, რომ გურიაშიც და მთლიანად საქართველოში, ამ მხრივ ყველაფერი დალაგდება, რაც კლუბებს არსებობის საშუალებას მისცემს. თუმცა, აქვე ვიტყვი, რომ სასურველია გამოჩნდეს ინვესტორი და კლუბი კერძო გახდეს.
_ ჩვენთან საუბარში ზვიად სიჭინავამ არაერთხელ აღნიშნა, რომ “გურიისთვის” სპონსორს ეძებს. ამ წუთისთვის რომ გამოჩნდეს ინვესტორი, “გურიას” უპრობლემოდ შეიძენს? ამას იმიტომ გეკითხებით, რომ აქამდე ხშირად იყო, როცა სპონსორი გააქციეს.
_ ამ წუთისთვის კლუბს ყადაღა ადევს, მაგრამ ფეხბურთის ფედერაციას აქვს სახელმწიფოსთან მიღწეული შეთანხმება, რომ ინვესტორს “გურიას” სიმბოლურ თანხად, 1 დოლარად მიჰყიდიან და პრობლემა ამ მხრივ არ შეექმნება.
_ ყველაზე მნიშვნელოვანი ის არის, გადასცემენ თუ არა ინვესტორს გრიგოლეთის ბაზას?
_ რა თქმა უნდა! თუმცა, აქ ჩადებული იქნება პირობა, რომ წელიწადში კლუბს მილიონი ლარი დაახარჯოს. სხვათა შორის, ამ საკითხზე ჩვენი გამგებელი, ბატონი გია გოგუაძე ფეხბურთის ფედერაციის პრეზიდენტს შევახვედრე. ბატონმა ზვიად სიჭინავამ მაშინაც დაადასტურა ზემოთქმული.
_ სანამ მილიონის დამხარჯველი ინვესტორი მოვა, გაანგარიშებული გექნებათ, მაინც რამდენი ჯდება გუნდის შენახვა?
_ პირველ ლიგაში ნორმალურად რომ იასპარეზო და უმაღლეს ლიგაზე იფიქრო, მინიმუმ 300 ათასი ლარია საჭირო. ესეც სწორი მენეჯმენტის პირობებში, თორემ არიან კლუბები, რომლებსაც ნახევარმილიონიანი დაფინანსება აქვთ და წარმატებას მაინც ვერ აღწევენ. ანუ იგივე “გურიისთვის” 300 ათასი საკმარისია, რადგან სწორი და გამართული მენეჯმენტის გარანტიას ვიძლევით. უმაღლეს ლიგაში, მინიმუმ, 600 ათასია საჭირო სეზონის მანძილზე.
_ როგორც ვიცი, ამჟამად ფეხბურთელებს ჯამაგირი მიღებული არ აქვთ…
_ სამწუხაროდ, ასეა. მარტის შემდეგ ბიჭებს ხელფას-პრემია ჯერ ვერ მივეცით. ახლახანს მიღებული 50 ათასით ძველი დავალიანების ნაწილი გავისტუმრეთ.
_ თუ მარტიდან მოყოლებული ფეხბურთელებს პრემია-ხელფასი არ მიუღიათ და მოწინავეთა შორის ხართ, რა საჭიროა 300 ათასი? მართალია, მე პირადად ამ კითხვას ნახევრად ხუმრობით ვსვამ, მაგრამ ბევრს სერიოზულად გაუჩნდება ეს მოსაზრება.
_ (იცინის) ჩვენს ბიჭებს თავის დროზე რომ მიეღოთ ხელფასი და პრემია, ალბათ, ამ შედეგს ვერ მივაღწევდით. ეს, რა თქმა უნდა, ხუმრობით. ხელმძღვანელობის და ფეხბურთელების ვალია, ასეთ დროს გაქცევაზე კი არ იფიქროს, არამედ კლუბს გვერდით დაუდგეს, რომ ეს პრობლემები ერთად გადავლახოთ. რა თქმა უნდა, დაფინანსების გარეშე მუდმივად ასე ვერ გაგრძელდება ეს ყოველივე.
_ კახა, პირდაპირ გეტყვით _ კარგად ვიცი, გუნდის ასეთ სიტუაციაში შენარჩუნება თქვენი დამსახურებაა. მაინც როგორ ახერხებთ ამას?
_ ამ ბიჭებთან ერთად წლების განმავლობაში მიხდებოდა ფეხბურთის თამაში, ჩამომიყალიბდა მეგობრული დამოკიდებულება. ალბათ, ამ ურთიერთდამოკიდებულებამ, ერთმანეთისადმი პატივისცემამ და ნდობამ ითამაშა მთავარი როლი, რის გამოც ყველა მათგანს მადლობას საჯაროდ ვუხდი.
_ ყველაფერი გასაგებია, მაგრამ დღეს უმაღლესი ლიგის გუნდებიც კი გაფიცვებს აწყობენ, ზოგს ძირითადი მოთამაშეები ტოვებენ, თქვენ იმას როგორ ახერხებთ, რომ 8 თვეა ფეხბურთელებს ფული არ მიუღიათ და ერთხელად არ გამოჟონილა ხმები გაფიცვის სურვილის შესახებაც კი? რა არის ამის მიზეზი, კლუბში დიქტატორული მმართველობა ხომ არ გაქვთ, რომ ხმებიც არ გამოვიდეს?
_ (იცინის) ხუმრობთ, როგორც ჩანს. ამიტომ ვუხდი მადლობას ყველა ფეხბურთელს და ნამდვილად ვარ ამაყი, რომ ჩვენს ბიჭებს გაფიცვის სურვილი არ გასჩენიათ. ამასთან, ყოველთვის გვქონდა და გვაქვს იმედი, რომ დავალიანებები გასტუმრებული იქნება.
_ მაოცებს “გურიის” საკადრო პოლიტიკა. მაშინ, როცა წლის შუაში კლუბი დატოვა ათზე მეტმა მოთამაშემ, ამავე დროს სეზონის მსვლელობისას თავს უფლება მიეცით, გაგეშვათ რამდენიმე წამყვანი ფეხბურთელი. ამ პირობებში როგორ ხდება, რომ “გურია” კიდევ უფრო უკეთეს შედეგს აღწევს?
_ ეს მართლაც გასაკვირია, თუმცა, მიმაჩნია, რომ აქ გადამწყვეტი როლი ფეხბურთელების სწორად შევსებამ იქონია. ძალიან გამოგვადგა ფარმ-კლუბის არსებობა _ იქედან რამდენიმე ძირითად გუნდში გადავიყვანეთ, რამდენიმეს კიდევ დავაწინაურებთ. ასევე ძლიერი მოთამაშეები დავიმატეთ სეზონის მიმდინარეობისას.
_ როცა წამყვან ფეხბურთელებს შუა სეზონში გუნდიდან უშვებენ, იქ რაღაც ხდება. რა მოხდა “გურიაში”?
_ შესაძლოა, დღეს “გურიასა” და მთლიანად ქართულ ფეხბურთსაც უჭირს, მაგრამ ჩვენი კლუბის მაისურის ტარება ყოველთვის ჭაბუკი მობურთალების ოცნება იყო. ვერ შევეგუები, ფეხბურთელი “გურიის” მაისურს რომ არ აფასებს. ამიტომ იყო, სეზონის მიმდინარეობისას მივიღეთ უაღრესად სარისკო გადაწყვეტილება _ წამყვანი ფეხბურთელები კლუბის ინტერესების არაჯეროვნად დაცვის გამო გავათავისუფლეთ. რისკი დიდი იყო, მაგრამ, როგორც ხედავთ, ამის შემდეგ კლუბი კიდევ უფრო ათამაშდა.
_ ჩვენი ინფორმაციით, როცა კლუბს პირველი ჩავარდნა ჰქონდა, “გურიის” საწვრთნელ პროცესსაც თქვენ მართავდით და მოუგებელი სერია წაუგებელმა შეცვალა…
_ მოდით, ეს კითხვა უკომენტაროდ დავტოვოთ.
_ შარშანაც წარმატებული სამწვრთნელო სერია გქონდათ, წელსაც _ ადასტურებთ თუ არა, რომ თქვენს სახელთანაა დაკავშირებული კლუბის წარმატება? მწვრთნელობაზე არ გიფიქრიათ?
_ არასოდეს არ უნდა თქვა _ არასდროს, მაგრამ ამას გამოვრიცხავ. ყოველთვის ვისურვებდი “გურიას” ძლიერი მწვრთნელი ჰყავდეს.
_ არადა, ბევრისგან მომისმენია _ გასულ წელს სფფ-ს არჩევნებში კენჭი რომ არ გეყარათ, “გურიისთვის” უკეთესი იქნებოდა _ გუნდს უმაღლესში გადაიყვანდაო…
_ სამწუხაროდ, გამორიცხულია იმ კლუბის უმაღლეს ლიგაში გადასვლა, რომელსაც სეზონის დაწყების წინ მყარი ფინანსური გარანტია არ ექნება. ასე რომ, ჩემი მწვრთნელობა არ იყო გადამწყვეტი.
_ ანუ რისი თქმა გინდათ _ “გურიას” ამ სეზონში შანსი არ აქვს?
_ ფული ყველაფერს არ ნიშნავს. მთავარია გუნდში ერთსულოვნება, დაბალანსებული ურთიერთობები, საქმისადმი პასუხისმგებლობის გრძნობა და მხოლოდ ამის შემდეგ ფინანსები…
_ რა იმედს აძლევთ “გურიის” ქომაგებს?
_ ერთ რამეს ვპირდები მათ _ “გურია” ყოველთვის იქნება ანგარიშგასაწევი ძალა. რა თქმა უნდა, ვიბრძოლებთ უმაღლეს ლიგაში გადასასვლელად!
