"დიქტატორი არა! მაგრამ, მარგველაშვილივით, ალალი კაცი ვიქნები“, _ ამბობს 7 წლის მსახიობი დაჩი ორველაშვილი, რომელიც "გურია ნიუსს“ თავის ოცნებებზე, სამომავლო გეგმებზე და ფილმ "პრეზიდენტის“ წარმატებაზე ესაუბრა.
1 დეკემბერს, თბილისში, ირანელი რეჟისორის მოჰსენ მახმალბაფის ფილმის "პრეზიდენტი“-ს ჩვენება გაიმართა, სადაც 7 წლის დაჩი ორველაშვილი ერთ-ერთ მთავარ როლს თამაშობს.
"ფილმი არის დიქტატორ პრეზიდენტზე, რომელიც ჯარისკაცებს უბრძანებს და ისინი ქუჩაში კლავენ ხალხს. იგი ქვეყნიდან გაიქცევა. ხალხი მას ეძებს, ბოლოს მოკლავენ“, _ ამბობს "გურია ნიუსთან“ დაჩი.
ასევე ამბობს, რომ გაუჭირდა და განიცდიდა სიცილისა და ტირილის როლის მორგებას, ეთამაშა ისე, რომ ეს ნამდვილი ყოფილიყო. მიუხედავად იმისა, რომ ფილმში პირველად ითამაშა, არც რეჟისორთან და არც მსახიობებთან ურთიერთობა არ გაჭირვებია.
თბილისში ფილმის პრემიერაზე, როგორც დაჩი ამბობს, ქართველ მაყურებელის ნაწილმა ტაში არ დაუკრა და ფილმის ტიტრების დასრულებამდე დარბაზი დატოვა.
მაყურებლის ასეთი ქმედებით განაწყენებულმა ვარსკლავ-ბიჭუნამ ქართველი მაყურებლის ეს ქმედება, უკულტურობას დააბრალა.
"ვენეციში რომ ვიყავით, ყველა ტაშს უკრავდა. თბილისის კინოფესტივალზე კი დარბაზში, ვინც წინ იჯდა, კარი როგორც კი გააღეს, წამებში გავიდნენ. მხოლოდ ის ხალხი უკრავდა ტაშს, ვინც დარბაზში ზევით იჯდა. პრემიერაზე მხოლოდ კულტურულმა ხალხმა დაუკრა ტაში“.
დაჩი ამბობს, რომ კარგად სწავლობს და სკოლაში თანაკლასელებისაგან არაფრით გამოირჩევა. იგი ყველას უყვარს და ყველაზე ადრე მიდის სკოლაშიც.
"პრომეთე“-ს სკოლაში ვსწავლობ. კლასი ყოველთვის კარგად მხვდება. ყველას გაუხარდა, ჩემი წარმატება. მიყვარს ჩემი დაწყებითის მასწავლებელი, რომელიც ქართულს, მათემატიკასა და ბუნებას ასწავლის. იცით, სკოლაში ბიბლიოთეკა გავაკეთეთ და იქ კლასგარეშე ლიტერატურას ვკითხულობთ.“
ვარსკვლავ-ბუჭუნამ ისიც კი გაგვიმხილა, რომ შეყვარებულიც ჰყავს.
"ამერიკელი მსახიობი ემი როუსმანი მიყვარს. რომელსაც უკვე 2-ჯერ მივწერე წერილი.“
_ დაჩი, შენ მიწერე წერილი?
_ არა. სანამ ინგლისურს ვისწავლი ჩემი და, ნათია მეხმარება. ჟურნალისტია, მან (ტვ. "იმედის“ ჟურნალისტი ნათია ორველაშვილია. ავტ) მისწერა წერილი.
_ შენც ხომ არ აპირებ ჟურნალისტი გახდე?
_ მე გავხდები ჟურნალისტების უფროსი. იცით, აი, ომში რომ მიდიან ან ცუნამს რომ იღებენ, ჯერ ეს ყველაფერი უნდა გააკეთო, ამის შემდეგ კი, გახდები ჟურნალისტების უფროსი.
_ როცა გაიზრდები, შეიძლება შენ გახდე საქართველოს პრეზიდენტი. როგორი პრეზიდენტი იქნები?
_ დიქტატორი არა! მაგრამ, მარგველაშვილივით, ალალი კაცი ვიქნები. ცოტა დაცვა მეყოლება. სააკაშვილი პრეზიდენტი რომ იყო, იმ პერიოდში, ერთხელ, დედაჩემი მიდიოდა გზაზე, დაინახა ავტომატგამოშვერილი კაცები, რომლებიც არ უშვებდნენ. იძახდნენ მანქანა გადააყენეთო და ესკორტი წამოვიდა. მე თვითონ ვნახე მარგველაშვილი ურეკში, თუ არ ვცდები, 4 დაცვა ჰყავს. აი, "ოცნებამ“ რომ თქვა, 100 ქარხანა უნდა აშენდესო და არ ააშენეს, ასეთი კაცი არ ვიქნები. ტელევიზორში ყველგან გამოაჩინეს, რომ "ოცნება“ არ მუშაობსო.
იცით, ვენეციაში არსად ნაგავი არ ყრია. ხალხი ქუჩაში არ ხმაურობს. კულტურული ხალხია. იქ მანქანები ბოლს არ უშვებენ და ცუდ სუნს არ გრძნობ. აქ კი, არ მომწონს ქუჩაში ნაგავი რომ ყრია. ხეებს რომ ჭრიან. არ მომწონს "ქრონიკა“ და "რუსთავი 2“-ზე სულ მკვლელობებს რომ აჩვენებენ.
ვარსკვლავ-ბიჭუნამ თბილისში ფილმის პრემიერაზე თანაკლასელები ვერ დაპატაჟა, რადგან მხოლოდ სამი მოსაწვევი ჰქონდათ. თუმცა, ძალიან უნდოდა ფილმი მათაც ენახა.
"ძალიან მინდოდა ფილმის პრემიერაზე თანაკლასელები ყოფილიყვნენ, ენახათ, როგორ ვთამაშობ ფილმში. ჩვენ, ძლივს ვიშოვეთ სამი მოსაწვევი“, _ ამბობს დაჩი.
