2013 წლის 17 ოქტომბერს, ოზურგეთის ალექსანდრე წუწუნავას სახელობის სახელმწიფო თეატრის Facebook-ის ოფიციალურ გვერდზე დაიწერა, რომ მალე ფონდი "ქართუ" შენობის სრულ რეაბილიტაციას დაიწყებდა.
"2013 წლის საპრეზიდენტო არჩევნებამდე რამდენიმე დღით ადრე, ფონდ "ქართუს" წარმომადგენლები ოზურგეთის თეატრს ესტუმრნენ.
ჩემი აზრით, თეატრის დაარსების დღიდან სულ რამდენიმე ვიზიტი თუ იქნება ასეთი მნიშვნელობის: სტუმრებმა შენობა საძირკვლიდან სახურავამდე შეისწავლეს და შენობის სრული რეაბილიტაცია დაიწყება!
დიდი მადლობა ბიძინა ივანიშვილს!
ასეთი ოპერატიული რეაგირება ჩვენს თხოვნაზე, რაღაც 3 კვირის განმავლობაში, აღმაფრენამდე გამაოგნებელია!
მადლობა თეატრის და მთელი გურიის სახელით", _ წერია სოციალურ ქსელში გავრცელებულ ინფორმაციაში.
რა ხდება დღეს და შესრულდება თუ არა დანაპირები?
თეატრის სამხატვრო ხელმძღვანელი ვასილ ჩიგოგიძე ჩვენთან საუბრის დროს ამბობს, რომ ამ ეტაპზე ამ კითხვაზე პასუხი არ აქვს:
_ სამწუხაროდ, წლებია, სინესტე არ მოშორებია თეატრის კედლებს. 2013 წელს, საქართველოს პრეზიდენტის არჩევნების დროს, იყვნენ თეატრში ბატონი გიორგი მარგველაშვილი და ბატონი ბიძინა ივანიშვილი, შეხვედრა ჰქონდათ მოსახლეობასთან. როდესაც ღონისძიება დასრულდა და გამოვიდა დარბაზიდან ბატონი ბიძინა ივანიშვილი, როგორც თეატრის სამხატვრო ხელმძღვანელს, მკითხა _ რა დღეშია თქვენი თეატრიო? ყველაფერი ვუთხარი იმ პრობლემის შესახებ, რაც თეატრს აქვს. ასევე, მოვახსენე, რომ ამის შესახებ წერილი უკვე თქვენი დაცვის უფროსს გადავეცი,-მეთქი. დაახლოებით, 2-3 წუთი ვისაუბრეთ და მითხრა, გაგახარებთ, ისეთ მდგომარეობაში მოვიყვან ამ თეატრსო.
"ქართუ" ფონდიდან ერთი თვის განმავლობაში მოდიოდნენ, ყველა საკითხს სწავლობდნენ და გადაწყდა თეატრის რეაბილიტაციის საკითხი.
146-ე თეატრალურ სეზონს ვხსნიდით, ეს ინფორმაცია რომ გავიგეთ და ყველანი გახარებულები ვიყავით. ასევე, გავიგეთ, რომ "ქართუს" 2014 წლის ბიუჯეტში უნდა შესულიყო ოზურგეთის თეატრის სარემონტო სამუშაოების ერთი ნაწილი. რა თქმა უნდა, წვდომა პროექტთან არ მქონდა, მაგრამ გავიგე, რომ სრული სამუშაოებისთვის 13 მილიონი იყო საჭირო. ყველა მიკავშირდებოდა (მათ შორის, კულტურის მაშინდელი მინისტრი გურამ ოდიშარია) და გვილოცავდა. 2014 წლის იანვარში კი ვიგებთ, რომ ფონდმა სამსახურიდან გაათავისუფლა ყველა თანამშრომელი, ვინც დაკავებული იყო მსგავსი სამუშაოების შესწავლით. რეორგანიზაცია მომხდარა. მეტი არაფერი ვიცი, _ გვითხრა ვასილ ჩიგოგიძემ.
"გურია ნიუსი" რამდენჯერმე დაუკავშირდა "ქართუს", მაგრამ თეატრის სარემონტო სამუშაოებთან დაკავშირებით კომენტარი ამ დრომდე არავის გაუკეთებია.
კულტურის სამინისტროს პრესსამსახურში გვითხრეს, რომ ისინი არანაირ ინფორმაციას არ ფლობენ თეატრში სარემონტო სამუშაოების ჩატარებასთან დაკავშირებით.
ქალაქ ოზურგეთის მერიის პრესსამსახურის უფროსმა იზა დარჩიამ ამ საკითხთან დაკავშირებით შემდეგი სახის კომენტარი მოგვაწოდა:
"მიუხედავად დიდი სურვილისა და განწყობისა, თეატრი იყოს რეაბილიტირებული, გამთბარი და ყველა პირობა შეიქმნას დასისა და მაყურებლისათვის, ადგილობრივი ბიუჯეტით შეუძლებელია აღნიშნულის მოგვარება, თუმცა, ჩვენი შესაძლებლობის ფარგლებში, ყველანაირად ვცდილობთ, გვერდით დავუდგეთ თეატრს, რომელიც ძალიან დიდ როლს თამაშობს საზოგადოებრივი ცხოვრებისა და ცნობიერების განვითარებაში.
რაც შეეხება სხვა წყაროდან დაფინანსების მოპოვებას, ჩვენ ამის შესახებ არ ვფლობთ არანაირ ინფორმაციას".
