ცნობილ ამერიკელ მსახიობ ანჯელინა ჯოლის ფრანგული ფესვები გააჩნია. მისი დედა ნახევრად ფრანკო-კანადელი გახლდათ. ანჯელინა ბავშვობიდან ფრანგულ ყაიდაზე იზრდებოდა და ამ ქვეყნის ენა შესანიშნავად შეისწავლა.
რამდენიმე დღის წინ ბრედ პიტის (ჯერჯერობით, რადგან წყვილი თურმე დაშორებას აპირებს) მეუღლემ გამოცემა “Focus”-ს ინტერვიუ მისცა და აღიარა, რომ რომელიმე ფრანგულ კინოსურათში გადაღებაზე ოცნებობს.
“უახლოეს წლებში უთუოდ გავივლი სინჯებს რომელიმე ფრანგული ფილმისთვის. ბოლო დროს ევროპაში შესანიშნავ სურათებს იღებენ და მათში მონაწილეობით დაინტერესებული გახლავართ”. – განაცხადა ქალბატონმა ანჯელინამ.
კითხვაზე დღემდე რატომ არ გიმუშავია საფრანგეთშიო, მსახიობმა ჟურნალის თანამშრომელს პირდაპირ უპასუხა: “იმიტომ რომ, ჯერ არავის შემოუთავაზებია!”
ანჯელინა ჯოლიმ ერთი პირადი საიდუმლოც გაამხილა. თურმე ის კინოფილმებს ძალიან იშვიათად უყურებს.
“ჩემთვის ძნელია ორი საათი გაუნძრევლად ჯდომა. მირჩევნია ეს დრო რაიმე ახლის შესწავლასა ან მოგზაურობას დავუთმო. ჩემგან განსხვავებით ბრედი საოჯახო კინოს დიდი თაყვანისმცემელია.როდესაც რომელიმე კინოსურათს ერთად ვუყურებთ, მე როგორც წესი ყოველთვის მეძინება, ან ოთახიდან გავდივარ და დროს ბავშვებთან ვატარებ”.
