ფინანსთა მინისტრმა ნოდარ ხადურმა, ფინანსთა სამინისტროს სსიპ შემოსავლების სამსახურის უფროსის თანამდებობაზე დასამტკიცებლად პრემიერ-მინისტრ ირაკლი ღარიბაშვილს, გიორგი თაბუაშვილის კანდიდატურა წარუდგინა, რომელიც ამავე დროს, კვლავ გააგრძელებს მინისტრის პირველი მოადგილის უფლებამოსილების შესრულებას.
შემოსავლების სამსახურის ახალი ხელმძღვანელი ფინანსთა მინისტრმა სამინისტროს სათათბირო საბჭოს წევრებს დღეს გამართულ სხდომაზე წარუდგინა.
"გიორგი თაბუაშვილს ფინანსთა მინისტრის პირველი მოადგილის თანამდებობა 2013 წლის იანვრიდან უკავია. მიღებული აქვს ეკონომიკურ მეცნიერებათა მაგისტრის ხარისხი ილინოისის უნივერსიტეტში, აგრეთვე პროექტების მართვის მაგისტრის სერტიფიკატი ჯორჯ ვაშინგტონის უნივერსიტეტში. სხვადასხვა წლებში მუშაობდა როგორც სახელმწიფო, ისე კერძო სექტორსა და საერთაშორისო საფინანსო ორგანიზაციებში. ფინანსთა სამინისტროს სსიპ შემოსავლების სამსახურის ყოფილი უფროსი ირაკლი გვარამაძე, რომელსაც აღნიშნული პოსტი მიმდინარე წლის თებერვლიდან ეკავა, მუშაობას სამინისტროს ცენტრალურ აპარატში გააგრძელებს", _ აცხადებენ ფინანსთა სამინისტროში.
რაც შეხება შემოსავლების სამსახურის უფროსობის კანდიდატის და ნოდარ ხადურის პირველი მოადგილის, გიორგის თაბუაშვილის ქონებრივ მდგომარეობას, 2013 წლის 28 დეკემბერს შევსებული მისი ქონებრივი დეკლარაციიდან ირკვევა, რომ ის, ვაჟა-ფშაველას გამზირი #78ა, ფლობს 132.10 კვ.მ ფართობის ბინას და 23.80 კვ.მ ფართობის ავტოფარეხს. გიორგი თაბუაშვილი სოფელი წავკისში ფლობს ასევე 800.00 კვ.მ ფართობის მიწის ნაკვეთს, დუშეთის რაიონი, სოფელი ახატანი, 120.00 კვ.მ ფართობის საცხოვრებელ სახლს და ამავე სოფელში 600.00 კვ.მ ფართობის მიწის ნაკვეთს.
ფინანსთა მინისტრის პირველ მოადგილეს ჰყავს მეუღლე ნატო ორმოცაძე და 3 შვილი: ანა, ელენე და ანდრია თაბუაშვილები.
დეკლარაციის გრაფაში, სადაც აღნიშნულია თანამდებობის პირის, ან მისი ოჯახის წევრის საკუთრებაში არსებული მოძრავი ქონება, რომელთაგან თითოეულის ღირებულება აღემატება 10 000 ლარს, გიორგი თაბუაშვილს მითითებული აქვს, რომ ფლობს Toyota Camry 2004 და Mitsubishi Pajero, 2003 მსუბუქ ავტომანქანებს.
გიორგი თაბუაშვილი ასევე "საქართველოს სახალხო ბანკის" აქციონერია. მას ერიცხება "თი–ბი–სი" ბანკში 2909.00 GEL კრედიტი(+)
ხელფასი. მის დეპოზიტზე ამავე ბანკში ფიქსირდება, 2013 წლის 28 დეკემბერის მდგომარეობით, 18400.00 GEL კრედიტი(+), 32048.00 USD კრედიტი(+), 10042.00 EUR კრედიტი(+) და საკრედიტო – 312.00 GEL დებეტი(-). მეუღლეს, ნატო ორმოცაძეს "საქართველოს ბანკში" 467.00 GEL რაოდენობის ხელფასი ერიცხება.
დეკლარაციის გრაფაში, სადაც აღნიშნულია თანამდებობის პირის, ან მისი ოჯახის წევრის საკუთრებაში არსებული ნაღდი ფულადი თანხა, რომლის ოდენობა აღემატება 4 000 ლარს, გიორგი თაბუაშვილს მითითებული აქვს, რომ ფლობს 20000.00 ლარს, ხოლო მისი მეუღლე – 5000.00 ლარს.
გიორგი თაბუაშვილს შპს "მარაბდა-კარწახის რკინიგზის" საფინანსო-ეკონომიკური ჯგუფის კოორდინატორობის დროს წინა წლის პირველი იანვრიდან 31 დეკემბრის ჩათვლით (დეკლარაცია შევსებულია 28/12/2013) მიღებული აქვს 7035.00 GEL ღირებულების შემოსავალი. შპს "პოლიტიკის და მართვის კონსალტინგ ჯგუფის" აღმასრულებელი დირექტორობის დროს იმავე ვადაში 3000 ლარი, ააიპ "პი ემ სი" კვლევით ცენტრში ექსპერტად მუშაობის დროს 13 895 ლარი, საქართველოს ფინანსთა სამინისტროში მინისტრის მოადგილეობისას 20 897 ლარი, "ფაიზერ ლუქსემბურგ სარლ-ისწარმომადგენლობა საქართველოშის" ფინანსური მენეჯერობისას 39 375 ლარი.
მეუღლეს, ნატო ორმოცაძეს საქართველოს გარემოს დაცვის და ბუნებრივი რესურსების სამინისტროში საგარეო ურთიერთობების დეპარტამენტის უფროსი სპეციალისტად მუშაობისას მიღებული აქვს 18 916 ლარის შემოსავალი.
