ელენე ჯიბლაძე 3 წლისაა. ქერათმიან, ლამაზთვალება გოგონას გაკეთებული აქვს ტრახიოსტომა (ხელოვნური ნახვრეტი ყელში, რომელშიც ჩადგმულია სპეციალური მილი). ვერ ლაპარაკობს _ როცა რამე უნდა ოჯახის წევრებს მიმიკებით უხსნის. პატარას ტირილიც არ შეუძლია.
ელენეს შესახებ ინფორმაცია "გურია ნიუსს" #1 საჯარო სკოლის მოსწავლემ ნინო სიხარულიძემ მოაწოდა.
ჯიბლაძეების ოჯახში მისულებს საკმაოდ მძიმე სურათი დაგვხდა _ ავარიული სახლის გამო, ხუთსულიანი ოჯახი ერთ პატარა ქოხსაა შეკედლებული, სადაც იატაკიც კი არ არის. არადა, პატარა ელენესთვის გაციება არ შეიძლება.
_ მცირე გაციებაზეც კი ცუდად ხდება. ორჯერ, ამის გამო კატასტროფის ბრიგადით მოგვიხდა მისი თბილისში გადაყვანა. როცა იცინის, ცელქობს ან უბრალოდ აქტიურობს, ცუდად ხდება, _ ამბობს ჩვენთან საუბრისას ელენეს მამა რომან ჯიბლაძე.
როგორც გვითხრეს, ელენეს ამ დრომდე ხუთი ოპერაცია აქვს გაკეთებული:
_ დაბადებიდან მეორე დღეს გავუკეთეთ გული ოპერაცია. თითქოს ყველაფერმა კარგად ჩაიარა, მაგრამ როგორც აღმოჩნდა, ექიმს შეცდომა მოუვიდა და ტრახიოსტომის მილი დაზიანდა, რის შედეგებსაც ახლა ვიმკით. გულზე პრობლემა მოიხსნა, მაგრამ ახლა მილის პრობლემა აქვს. საქართველოში ერთადერთი ადამიანი აკეთებდა ამ ოპერაციას, რომელიც ცოტა ხნის წინ გარდაიცვალა. ახლა კი ხელს ვერავინ კიდებს. საზღვარგარეთ მის ოპერაციას და სრულ გამოჯანმრთელებას კი 8 ათასი ევრო სჭირდება. ჯანდაცვის სამინისტროში გვითხრეს, მიგვეტანა დასკვნა, რომელიც დაადასტურებდა, რომ მსგავსი ოპერაცია საქართველოში არ კეთდება, თუმცა, ამ დასკვნასაც ვერავინ გვიწერს. აღარ ვიცით, როგორ მოვიქცეთ, ვის მივმართოთ, _ გვიყვება რომან ჯიბლაძე.
ოჯახს ელენეს ოპერაციისთვის საჭირო თანხა არ გააჩნია. ჯიბლაძეების შემოსავალი სოციალური დახმარება და ოჯახის დიასახლისის პენსიაა.
_ სამ თვეში ერთხელ ექოსკოპია სჭირდება. მიკროავტობუსით ვერ მიგვყავს, გაციება არ შეიძლება. მანქანითაც არ მოგვყვებიან და ხშირად ტაქსით გვიწევს წაყვანა. ერთი ბანკიდან სესხს ვიღებ, იმის გასასტუმრებლად მეორეს ვაკითხავ და ასე ვარ. გამგეობა ორჯერ დაგვეხმარა ას-ასი ლარით. დაზღვევა გაქვს, თუმცა, ელენეს მკურნალობის თანხის მოგროვებას ვერ ვახერხებთ. ექოსკოპია 300 ლარი ღირს. აქედან 60 ლარს ჩვენ ვიხდით, დანარჩენს სახელმწიფო ანაზღაურებს. ეს კი სამ თვეში ერთხელ ხდება, _ ამბობს ახალგაზრდა მამა, რომელმაც ბევრი მცდელობის მიუხედავად სამსახურის დაწყება ვერ შეძლო.
ჯიბლაძეების ოჯახის ერთადერთი ნატვრა პატარა ელენეს გამოჯანმრთელებაა:
_ ელენეს ჯანმრთელობის მეტი არაფერი გვინდა. საშინელებაა, როცა მის უხმო ტირილს ვუყურებთ. ვხედავთ, როგორც წვალობს. როცა ყელიდან ნახველი აქვს ამოსაღები და სუნთქვა უჭირს დედასთან მივა, მორჩილად დადგება და აპარატს თავისი ხელით იმაგრებს. აპარატის გარეშე დიდხანს ვერ ჩერდება. ღამეც ხშირად სჭირდება. ძალიან გონიერი ბავშვია, _ ამბობენ ჯიბლაძეები, რომლებსაც მხოლოდ კეთილი ადამიანების დახმარების იმედი აქვთ.
პატარა ელენე
(ფოტო ქვეყნდება მშობლების თხოვნით)
