გასულ კვირას საქართველოს საფეხბურთო ჩემპიონატის პირველი წრე დასრულდა და გაზაფხულამდე შესვენებაც გამოცხადდა. ლანჩხუთის „გურიამ“ წრე 4 მოგებით, ამდენივე წაგებით და 7 ფრით მეათე ადგილზე დაასრულა და გასავარდ ზონას ხუთი ქულით დაშორდა.
„დინამოსთან“ სენსაციური გასვლითი მატჩის მოგების შემდეგ, ბევრს მიაჩნდა კვირას ბოლნისის „სიონიც“ იგივე ხვედრს რომ გაიზიარებდა. თუმცა, გურულებმა სამი ქულის მოპოვება ვერ მოახერხეს და ეს კი არა, ქულა რომ შერჩათ, იღბალს უნდა უმადლოდენ.
არადა, მოსაგები თამაში იყო, „გურიას“ უპირატესობა საკმაო გახლდათ, განსაკუთრებით პირველ ტაიმში და ბოძებული უამრავი საგოლე შანსიც, ამას მეტყველებდა. ძლიერი ქარის ბრალიც იყო სტუმრები გაშვებულ გოლს რომ გადაურჩნენ და მთლიანობაში ბუნების ამ მოვლენამ გარკვეული კორექტივები შეიტანა თამაშის მიმდინარეობაში.
ქარმა კინაღამ 3 ქულა გაიყოლა ბოლნისისკენ. თამაშის დასრულებას წუთები უკლდა, საჯარიმოში ჩაწოდებულ ბურთს მასპინძელი ხარაბაძე რომ ჩაუწვა, რომელმაც ბურთის ტრაექტორია ვერ გათვალა და ხელით გააჩერა. პენალტი აშკარა იყო და რომ არა ცხადაიას უხეირო დარტყმა, „გურია“ უსათუოდ მარცხს იწნევდა.
არადა, უსამართლობა იქნებოდა, ასე რომ მომხდარიყო, რადგან მასპინძლებს ჯერ კიდევ შესვენებამდე მართებდათ თამაშის ბედის გადაწყვეტა. გატანის რეალური შანსი შალამბერიძეს, მეგრელიშვილს და ორჯერ კოშკაძეს მიეცათ, მაგრამ ბოლნისელთა გამოცდილი მეკარე მირზა მერლანი შეუვალი ჩანდა. ტაიმის ბოლოსკენ გაბრიჩიძემ საოცარი შანსი გაანიავა, როცა შალამბერიძის ჩაწოდებულ ბურთს ვარდნაში დარტყმული შეაგება და ოდნავ ააცილა მიზანს.
მეორე ტაიმში სტუმრებს გააქტიურება დაეტყოთ და ამაში ქარიც დაეხმარათ, თუმცა, ხიფათი თავდაპირველად მაინც გურულებმა შექმნეს, თანაც რეალური. შალამბერიძემ მარცხნიდან იაქტიურა და ბურთი უცნაური ტრაექტორიით ისევ კოშკაძეს მიუვიდა. მას, ფაქტობრივად, ცარიელ კარში მოუწია დარტყმა, მაგრამ იმდენად უხეიროდ მოიქნია ფეხი, მეტი რომ არ იქნება.
ამასობაში „სიონი“ უფრო მიეძალა მეტოქის კარს და კინაღამ გახსნა ანგარიში. კუთხურიდან ჩაწოდებულ ბურთს გოგობერიშვილი თავით გზავნიდა კარში, მაგრამ თანაგუნდელს მოარტყა, თორემ გურულთა კარის დარაჯს, მისი მოგერიება გაუჭირდებოდა უსათუოდ.პენალტამდე სტუმრებს გადაღლილი მეტოქის გამწარება კიდევ შეეძლოთ, მაგრამ მეკარე და დაცვა შეუვალი ჩანდა. ერთხელ კი შეცდნენ ლორიას შეგირდები, მაგრამ ზემოთ უკვე მოგახსენეთ ცხადაიამ რომ ვერ ივარგა პენალტის ნიშნულიდან.
ასე იყო თუ ისე, მატჩი უგოლოდ მორჩა და „გურიამ“ მეტოქესთან ზედიზედ მეექვსე თამაში ვერ მოიგო. წინა სეზონში ბოლნისელებმა ოთხივე მატჩი მოიგეს და კვირას კინაღამ იგივე გაიმეორეს.
„გურიამ“ პირველი წრის ბოლო შეხვედრა ასეთი შემადგენლობით ჩაატარა: გოგუაძე, ჭეიშვილი, ე. კილაძე, ხარაბაძე, მეგრელიშვილი, ჯოჯუა (კვერენჩხილაძე _ 86), გაბრიჩიძე, შალამბერიძე, კოშკაძე, მიქაბერიძე, ს. ლომია.
მწვრთნელი: თემურ ლორია.
