ორი წლის წინ, 17 აგვისტოს, ოზურგეთის იმდროინდელი პროკურორის, ილია ჯალაღანიას შვილმა, 21 წლის ლევან ჯალაღანიამ 30 წლის ვალერი ტემირხანოვი დაჭრა. ინციდენტი შეკვეთილში, ჯალაღანიების კუთვნილ აგარაკთან ახლოს მოხდა. დაჭრილი, ჯალაღანიების კუთვნილი აგარაკის წინ მდებარე სახლში მებაღედ მუშაობდა. ჩხუბის მიზეზად კვადროციკლი დასახელდა, რომელიც ტემირხანოვმა გასარეცხად წაიყვანა და უკან მიყვანა დააგვიანა. როგორც წყარომ გვითხრა, სწორედ ამის გამო მოხდა შელაპარაკება. დაჭრილი ქობულეთის საავადმყოფოში მიიყვანეს, თუმცა, დაზიანების სირთულიდან გამომდინარე, ბათუმის რესპუბლიკურ საავადმყოფოში გადაიყვანეს, სადაც მას სასწრაფო ოპერაცია ჩაუტარდა.
აღნიშნული საქმის კურსში გურიის სამხარეო პოლიციის მთავარი სამმართველოს ხელმძღვანელობაც იყო, თუმცა იმის გამო, რომ ინციდენტში მთავარი მოქმედი პირი პროკურორის ვაჟი იყო, სისხლის სამართლის საქმე არ აღძრულა. დაჭრილმა ყველაფერი საკუთარ თავზე აიღო და ჭრილობა ხიდან ჩამოვარდნას დააბრალა.
ლოგიკურად, როცა საქმე ყველას დახურული ეგონა, “გურია ნიუსის” საგაზეთო მასალების შემდგომ, აღნიშნული ფაქტით საქართველოს პროკურატურის გენერალური ინსპექცია დაინტერესდა. უფრო მეტიც, გენინსპექციის თანამშრომლები, ოზურგეთშიც იმყოფებოდნენ და შეკვეთილსაც სტუმრობდნენ. საქმეზე გამოძიებაც დაიწყო, თუმცა, ამის იქით საქმე არ წასულა.
ამ ინფორმაციასთან ერთად, მაშინ ჩვენმა გაზეთმა შეძლო ინფორმაციის მოპოვება, რომ ლევან ჯალაღანიასთან ერთად ჩხუბში 3 ახალგაზრდა მონაწილეობდა, აქედან ორი, მაღალი თანამდებობის პირების შვილები იყვნენ. მაშინ ამ ახალგაზრდების ვინაობა არ დასახელებულა, თუმცა ითქვა, რომ ისინი ქუთაისელი ჩინოვნიკების შვილები იყვნენ.
როგორც აღვნიშნეთ, ეს საქმე პროკურატურის შიდა მოკვლევის იქით არ წასულა და ინციდენტიც “ჰეფი ენდით” დასრულდა, თუმცა როგორც გავიგეთ, ორი წლის წინანდელი “ჰეფი ენდი”, დღეს ბიძინა ივანიშვილის წინააღმდეგ შემოატრიალეს.
საკმაოდ სარწმუნო წყაროს ცნობით, ცენტრიდან მიღებული დავალებით, გურული სამართალდამცავები, ბათუმელი კოლეგების ხელმძღვანელობით, თაროებზე შემოდებულ საქმეებს ქექავენ, განსაკუთრებით კი ურეკსა და შეკვეთილში მომხდარ დანაშაულებებს. მოტივი ერთია _ ბიძინა ივანიშვილის ძმის და ძმისშვილის შესაძლო “დანაშაულებები”, რომლებიც დღემდე ყველასთვის უცნობი იყო.
როგორც მოვიკვლიეთ, ამ ეტაპზე სამართალდამცავებმა ჯალაღანიას საქმე განაახლეს. თუ გავითვალისწინებთ იმას, რომ ილია ჯალაღანია პროკურორი აღარ არის და არც მისი უახლოესი მეგობარი, მიხეილ ჩოგოვაძეა მაღალ თანამდებობაზე, ადვილი სავარაუდოდ, რომ ორი წლის წინანდელი საქმის ხელახალი გამოძიება დღეს პრობლემას აღარავისთვის იყოს. ჩვენი წყარო ამტკიცებს, რომ არსებობს ფოტოები, რომლებიც ლევან ჯალაღანიას და ივანიშვილის ძმისშვილის მეგობრობას ადასტურებს, შესაბამისად არ გამორიცხავენ, რომ ამ დაჭრაში მონაწილე ერთ-ერთი პირი სწორედ ივანიშვილის 30 წლის ძმისშვილი “აღმოჩნდეს”!
წყაროს ინფორმაციით, სწორედ ამ თემას უკავშირდებოდა ოზურგეთის პოლიციის ყოფილი უფროსის, გია ურიდიას ბათუმის მთავარ პროკურატურაში დაბარება. ჩვენი წყაროს ცნობით, ურიდია რამდენიმე დღის წინ ისევ დაიბარეს პროკურატურაში, საიდანაც გირაოთი გამოუშვეს და როგორც ჩვენი წყარო ამბობს, მისი სასამართლო პროცესი დანაშულებების დაფარვის გამო რამდენიმე დღეში გაიმართება. ამ ინფორმაციას ჭორს უწოდებს ურიდიას მამა, რომელიც ჩოხატაურის საკრებულოს წევრია და ამბობს, რომ ეს ყველაფერი ბოროტი ადამიანების გავრცელებული უსაფუძვლო ხმებია. თავად გია ურიდია ჩვენს სატელეფონო ზარებს არ პასუხობს. კომენტარის გაკეთებისგან თავს იკავებს ადიკო ივანიშვილიც.
დაუდასტურებელი ინფორმაციით, არ არის გამორიცხული ივანიშვილების გურიაში მოღვაწეობასთან დაკავშირებით ოზურგეთის მუნიციპალიტეტის ყოფილი გამგებელი, ქრთამის აღების ბრალდებით დაკავებული გია ტაკიძეც დაკითხონ, რომელიც, როგორც ცნობილია ადიკო ივანიშვილთან მეგობრობდა, ხოლო დასუფთავების სამსახურს, რომლის ლობირებაშიც ტაკიძეს ბრალს დებენ, წლების განმავლობაში ბიძინა ივანიშვილი აფინანსებდა.
“გურია ნიუსი” რამდენიმე დღის წინ წერდა, რომ ივანიშვილის ვილას პოლიცია უთვალთვალებდა, თუმცა ეს ინფორმაცია ადიკო ივანიშვილმა მაშინ ჩვენთან საუბრისას არ დაადასტურა.
აღსანიშნავია, რომ ჩვენი ინფორმაციით, ამ ეტაპზე შეკვეთილში, ივანიშვილის ვილის ახლომდებარე ყველა სასტუმრო და აგარაკი “ტურისტებით” არის სავსე. თუმცა, როგორც ჩვენი წყარო ამბობს, ე.წ. “ტურისტები” საიდუმლო დავალებათა სამსახურის თანამშრომლები არიან.
ბიძინა ივანიშვილის პრესსამდივნო ამ თემაზე ჯერჯერობით კომენტარს არ აკეთებს.
როგორც გავარკვიეთ, ივანიშვილის მომხრეებს საქართველოს სხვა რაიონებშიც სდევნიან. ახმეტის საკრებულოს წევრის, რესპუბლიკური პარტიის ახმეტის ორგანიზაციის თავმჯდომარის, ზაქარია ქინქლაძის თქმით, მისი ოჯახის მიმართ ზეწოლა ივანიშვილის მხარდაჭერას უკავშირდება:
_ ჩემთან 50-მდე ახმეტელი მოვიდა და მთხოვეს ინტერნეტით მათი პოზიცია გამომეხატა, რომელიც ივანიშვილის მხარდაჭერას გულისხმობდა. განცხადების ტექსტი, ხელმოწერებით ინტერნეტით გავავრცელე. მეორე დღეს, ჩემთან მოვიდა ახმეტის საპატრულო პოლიციის თანამშრომელი, რომლის დედიდანაც სავაჭრო ფართი მაქვს დაქირავებული და მაღაზიის სასწრაფოდ დაცლა მომთხოვა ყოველგვარი ახსნა-განმარტების გარეშე. სამშაბათს, ჩემი შვილი, რომელიც სოციალური მომსახურების სააგენტოს თანამშრომელია, სამსახურში დიაბარეს და გათავისუფლების თაობაზე განცხადება დააწერინეს. ისეთ სიტუაციაში ვართ, რომ მთელი ოჯახი სახლიდან ვერ გამოვდივართ. ამ საქართველოში არ იცხოვრება, რადგან აქ აზრის გამოხატვის გამო, ყველას სასტიკი მეთოდებით უსწორდებიან, _ აღნიშნა “გურია ნიუსთან” საუბრისას ქინქლაძემ.
საჩხერის საკრებულოს რესპუბლიკელი წევრი ინგა ზამბახიძე მედიასთან საუბრისას აცხადებს, რომ საჩხერეში ტოტალური შეტევა ხორციელდება პედაგოგებზე და სკოლის დირექტორებზე, რომლებსაც ივანიშვილი წლების მანძილზე, ყოველთვიურად 300-ლარიან ხელფასს უხდიდა. დაფინანსებაზე უარის თქმას აძალებენ ფეხბურთო გუნდს, რომლის სპონსორიც ისაა, ხოლო კლუბის მფლობელებს საუკეთესო ბაზასა და სტადიონის დათმობას “ურჩევენ”.
“გურია ნიუსი” შეეცადა ამ თემაზე კომენტარი შინაგან საქმეთა სამინისტროდანაც მიეღო, თუმცა, ზურაბ გვენეტაძემ ჩვენს სატელეფონო ზარს ამჯერადაც არ უპასუხა.
