G-News TV-ის ყოველკვირეულ გადაცემაში "კვირის თემა", რომელიც ყოველ ორშაბათს გადის ეთერში, საუბარი იყო გასული კვირის ყველაზე მნიშვნელოვან თემებზე.
"გურია ნიუსმა" შაბათს, საინფორმაციო მომსახურების შესახებ ქალაქ ოზურგეთის მერიასთან გაფორმებული ხელშეკრულება შეწყვიტა. ამის მიზეზი ქალაქ ოზურგეთის მერის, ბეგლარ სიორიძის მიერ "გურია ნიუსის" ჟურნალისტის ჟანა მეგრელიშვილის სიტყვიერი შეურაცხყოფა გახდა _ ხალხის რჩეულმა ჟურნალისტის დასმულ შეკითხვას ლანძღვა-გინებით უპასუხა (ამ თემაზე მომზადებული სტატია წაიკითხეთ აქ).
გასულ კვირას ქვეყნის პოლიტიკურ არენაზე დიდი საკადრო ცვლილებები გახორციელდა _ ზუსტად ერთ საღამოს, ირაკლი ღარიბაშვილის თანაგუნდელების ნაწილს თანამდებობიდან წასვლა მოუნდა და ყველამ ერთდროულად დაწერა განცხადება გადადგომის შესახებ. მათ შორი იყო გურიის გუბერნატორი გიორგი ჩხაიძეც. წასვლის მიზეზებზე ჩხაიძეს ამ დრომდე არ უსაუბრია _ "გურია ნიუსისთვის" მიცემულ კომენტარში მან მხოლოდ ის განმარტა, რომ განცხადება საკუთარი სურვილი დაწერა და ბიზნესში ბრუნდებოდა. ჩხაიძემ უარყო გავრცელებული ინფორმაცია, თითქოს, თანამდებობიდან წასვლის გადაწყვეტილება შიდა დაპირისპირების შედეგად მიიღო.
ჯერჯერობით, უცნობია, ვინ იქნება გურიის ახალი გუბერნატორი. რამდენიმე კანდიდატურა ჩხაიძის გადადგომიდან მალევე დასახელდა, თუმცა, ჩვენ მიერ ინფორმაციის გადამოწმების შემდეგ, არც ერთი მათგანი არ დადასტურდა.
ჩვენი წყაროს თქმით, ამ პოსტზე დანიშვნის ყველაზე დიდი შანსი ოზურგეთის მუნიციპალიტეტის სოფელ ნატანების მაჟორიტარ დეპუტატს, დავით სიხარულიძეს აქვს, რომელიც, სხვადასხვა წყაროს ინფორმაციით, ბიძინა ივანიშვილთან დაახლოებული პირია. არჩევნების შემდეგ ვრცელდებოდა ინფორმაცია, რომ სიხარულიძე ოზურგეთის მუნიციპალიტეტის საკრებულოს თავმჯდომარე გახდებოდა, თუცა, ამ პოსტზე ივანიშვილის თანაკურსელი დავით დარჩია დაინიშნა. ერთი სიტყვით, გურულები ახალი გუბერნატორის მოლოდინში არიან.
"კვირის თემა" დაინტერესდა რას ფიქრობენ ჩინოვნიკები გიორგი ჩხაიძის გადაწყვეტილების შესახებ და როგორ აფასებენ მის ერთწლიან მოღვაწეობას. ჩვენმა კორესპონდენტებმა ჟანა მეგრელიშვილმა და გიორგი გირკელიძემ ამ კითხვით ოზურგეთის მუნიციპალიტეტის გამგებელს მერაბ ჭანუყვაძეს, ოზურგეთის მუნიციპალიტეტის საკრებულოს თავმჯდომარის მოადგილეს დიმიტრი კვერღელიძეს, ჩოხატაურის მუნიციპალიტეტის საკრებულოს თავმჯდომარეს ზაალ მამალაძეს, ჩოხატაურის მუნიციპალიტეტის გამგებელს ირაკლი კუჭავას და მოსახლეობას მიმართეს _ მათ, ძირითადად, უჭირთ ყოფილი გუბერნატორის მუშაობის შეფასება, რადგან, ფიქრობენ, რომ ჩხაიძე მოკლე პერიოდში ასრულებდა გუბერნატორის მოვალეობას.
გარდა პოლიტიკისა, გასულ კვირას აქტუალური იყო ეკონომიკა _ ლარის კურსის გაუფასურებამ მოსახლეობა შეაშფოთა. მით უმეტეს, რომ პროდუქტების უმრავლესობაზე ფასები უკვე მომატებულია: ერთი კილოგრამი შაქარი 1 ლარი და 30-ის ნაცვლად 1 ლარი და 50 თეთრი ღირს; ერთი ლიტრი ზეთის ფასი 15 თეთრითაა მომატებული; ფასების ზრდა დაფიქსირდა წიწიბურაზე, ბრინჯზე, ტომატზე.
მოსახლეობა ნერვიულობს, მთავრობაში კი ვერ გვპასუხობენ, გამყარდება თუ არა ლარის კურსი. სანამ ხელისუფლებას კონკრეტული პასუხი ეცოდინება, მანამდე "კვირის თემამ" გადაწყვიტა გაეგო მოსახლეობის აზრი გაუფასურებული ლარის და გაძვირებული ცხოვრების შესახებ და ლანჩხუთში, ჩოხატაურსა და ოზურგეთში მოქალაქეები გამოკითხა.
_ ყველაფერი გაძვირდა; მთავრობა ხალხზე სულ არ ფიქრობს; დოლარი მატულობს; ლარი უფასურდება, ხალხს კი შემოსავალი იგივე რჩება, რა თქმა უნდა ვისაც აქვს, _ ასეთი იყო ჩვენ მიერ ჩატარებული გამოკითხვის შედეგად მიღებული ძირითადი პასუხები.
ეს იმ დროს, როცა ჩვენი ქვეყნის უმრავლესობა უმუშევარია და გამონაკლისი არც გურიაა, სადაც სტატისტიკური მონაცემებით ყველაზე მეტი უმუშევარი და სოციალურად დაუცველი ცხოვრობს. რა იქნება მომავალ წელს, არის თუ არა ხალხზე მორგებული მუნიციპალიტეტების ბიუჯეტი, ამ კითხვაზე კონკრეტული პასუხი ვერ მივიღეთ.
ამ თემაზე სასაუბროდ გადაცემაში არც ერთი მუნიციპალიტეტის წარმომადგენელი არ მოვიდა და მიზეზად ის დაასახელეს, რომ ბიუჯეტზე მუშაობა ახლა მიმდინარეობს და კვირის ბოლოს დეტალები გარკვეული იქნება.
კონკრეტულ პრიორიტეტებს ხელისუფლება არ აკონკრეტებს თუმცა, რა სჭირდება საზოგადოებას, ეს ყველაზე უკეთ სწორედ ხალხმა იცის, რომლებიც ჩვენმა კორესპონდენტებმა გამოკითხეს:
_ განათლება და სოციალური სფერო _ ასეთია გამოკითხვის შედეგები ბიუჯეტის პრიორიტეტებთან დაკავშირებით.
რაც შეეხება ხელისუფლების აზრს და გადაწყვეტილებას, ამ ეტაპზე ცნობილი მხოლოდ ის არის, რომ ბიუჯეტის პროექტის თანახმად, ოზურგეთის მუნიციპალიტეტისთვის პრიორიტეტი სოციალური სფეროა. იგივე ტენდენცია იკვეთება ჩოხატაურში. ქალაქ ოზურგეთში ამ მონაცემებით სოციალურ სფეროზე მეტად პრიორიტეტს სპორტსა და კულტურას ანიჭებენ.
რაც შეეხება ლანჩხუთს, სოციალურ სფეროზე აქაც ნაკლები თანხაა გამოყოფილი. სამაგიეროდ, საფეხბურთო კლუბ "გურიას" მილიონ ორასი ათასი ლარს აძლევენ, რაც ოპოზიციის პროტესტს იწვევს. თუმცა, ეს ყველაფერი პროექტის დონეზეა.
