ჩოხატაური-სურების საავტომობილო გზა (ამ გზით ხუთი სოფლის _ ბუკისციხის, იანეულის, დიდივანის, შუა სურების და ზემო სურების მოსახლეობა სარგებლობს), სოფელ ბუკისციხეში ორ კვირაზე მეტია, დაზიანებულია _ მეწყერის შედეგად გზის თითქმის მთლიანი ნაწილი ჩამოშლილია. მოსახლეობა გზის დაუყონებლივ შეკეთებას ითხოვს.
_ რამდენიმე დღეა, გზა ასეთ მდგომარეობაშია. გავლა, პრაქტიკულად, შეუძლებელია. მაინდამაინც აქცია უნდა მოვაწყოთ, რომ გზა გააკეთონ? ხუთი სოფელია ამ გზაზე დამოკიდებული. თავადაც ხედავთ, რა დღეშია _ დიდი მანქანა საერთოდ ვერ დადის. მთავრობა იმისთვის ავირჩიეთ, რომ ხალხს მოხედონ და ხალხის თხოვნა გაითვალისწინონ. როგორაა გათვალისწინებული, ეს ფაქტიც ადასტურებს, _ აღნიშნეს ჩვენთან საუბრისას ბუკისციხელებმა.
_ სურები რომ არავის ახსოვს, ეს კი ვიცით, მაგრამ ქვემოთ მდებარე სოფლებიც თუ დაავიწყდებოდათ, არ გვეგონა. ამდენი ხანია, ეს გზა ავარიულია. ბოლო 6 კილომეტრი იყო ნორმალური გზა და ისიც გაფუჭდა, გამკეთებელი კი არავინაა, _ გვითხრეს სურებლებმა, რომლებიც არ გამორიცხავენ რომ გზის შეუკეთებლობის შემთხვევაში, გამგეობასთან აქციები გამართონ.
_ სასწრაფო სამედიცინოდახმარების მანქანასაც კი უჭირს გავლა, აღარაფერს ვამბობთ დიდ მანქანებზე _ შემოვლითი გზით ამოდიან სოფელში. _ დასძენენ დიდივანელები.
ჩოხატაურის მუნიციპალიტეტის გამგებლის ირაკლი კუჭავას ინფორმაციით, აღნიშნული მონაკვეთის რეაბილიტაცია ამ კვირაში დაიწყება:
_ ჩოხატაური-სურების საავტომობილო გზის ბუკისციხის მონაკვეთზე, მეწყერით დაზიანებული ადგილის შესაკეთებლად, თანხები უკვე გამოიყო, ხელშეკრულებას ხელი მოეწერა და ამ კვირიდან აღდგენითი სამუშაოები დაიწყება. მოხდება ჩავარდნილ ნაწილზე დაზიანებული ასფალტის ფენის მოხსნა და ინერტული მასალით შევსება. რაც შეეხება ასფალტის ახალი ფენის გადაკვრას, დავაკვირდებით, როგორ განვითარდება აღნიშნულ მონაკვეთზე გეოლოგიური პროცესები და მდგრადობის მიღწევის შემდეგ მოხდება ასფალტის საფარის გადაგება, _ აღნიშნა ჩვენთან საუბრისას კუჭავამ.
P.S. სტატია უკვე მომზადებული იყო, როცა გზის შეკეთების სამუშაოები დაიწყო _ შაბათ დილით, ბუკისციხეში, გზის დაზიანებულ ადგილზე შესაბამისი ტექნიკა მუშაობდა. ადგილზე იმყოფებოდნენ ჩოხატაურის საკრებულოს დეპუტატი გოჩა ჯიქია და "ჩოხატაურის აგროსერვისცენტრის" ხელმძღვანელი ერეკლე მრელაშვილი.
