ადგილობრივი თვითმმართველობის მოხელეთა შესარჩევი კონკურსის მესამე ეტაპი _ გასაუბრება უკვე დაიწყო.
ქალაქ ოზურგეთის მერიაში გასაუბრება 19 დეკემბერს დაიწყო. როგორც გვითხრეს, საკონკურსო კომისიის გადაწყვეტილება ამ კვირაში გახდება ცნობილი.
კონკურსანტები, რომლებსაც მერიის და ქალაქ ოზურგეთის საკრებულოს მიერ გამოცხადებულ ვაკანსიებზე სურთ დასაქმება, ჩვენთან საუბრისას ამბობენ, რომ გასაუბრებამ კარგად ჩაირა:
_ ყველაფერმა ნორმალურად ჩაიარა, ჩემი გადასახედიდან ყველაფერი კარგად წარიმართა, ძირითადად, კითხვები იყო იმასთან დაკავშირებით, თუ რა გამოცდილებას ვფლობ, 5 ვაკანსიაზე მაქვს შეტანილი განაცხადი, _ გვითხრა ნანა ჯაფარიძემ.
გასაუბრებით კმაყოფილი იყო ეთერ ყავრელიშვილიც:
_ კმაყოფილი გამოვედი გასაუბრებიდან და ველოდები კარგ შედეგს, მიმაჩნია, რომ დადებითად გავეცი პასუხები. კომისია ვფიქრობ, ობიექტური იყო, _ თქვა ყავრელიშვილმა.
ქალაქ ოზურგეთის მერიამ გასაუბრების ეტაპზე "გურია ნიუსს" დაკვირვების და გადაღების უფლება არ მისცა.
_ "თქვენი განცხადების პასუხად გაცნობებთ, რომ კონკურსის ის ეტაპი, რომელზე თქვენ გსურთ დასწრება, ყველაზე რთულია კონკურსანტებისთვის ფსიქოლოგიური თვალსაზრისით. კონკურსანტთა ინტერესების დაცვის უზრუნველსაყოფად, კომისია არ მიიჩნევს მიზანშეწონილად გასაუბრებაზე გარეშე პირთა დასწრებას. კომისია დაკომპლექტებულია კომპეტენტური წარმომადგენლებით, რომლებიც მიუკერძოებლად და სამართლიანად მიიღებენ გადაწყვეტილებებს.
აქვე გაცნობებთ, რომ აღნიშნული კონკურსის გასაუბრების ეტაპის ჩატარება მოიცავს "პერსონალურ მონაცემთა დაცვის შესახებ" საქართველოს კანონის მე-2 მუხლის "ა" ქვეპუნქტის გათვალისწინებული პერსონალური ინფორმაციის განხილვას", _ აღნიშნულია "გურია ნიუსისთვის" მერიიდან გამოგზავნილ წერილში, რომელსაც ხელს ვიცე მერი ალეკო ბურჭულაძე აწერს.
გასაუბრების ეტაპზე დაკვირვების უფლება ვერც ოზურგეთის მუნიციპალიტეტის საკონკურსო კომისიიდან მივიღეთ:
"2014 წლის 18 დეკემბრის თქვენი განცხადების პასუხად გაცნობებთ, რომ ოზურგეთის მუნიციპალიტეტის საჯარო მოხელეთა მუდმივმოქმედი საკონკურსო/საატესტაციო კომისია შეიქმნა 2014 წლის 18 სექტემბერს, რომელმაც თავისი უფლებამოსილების ფარგლებში, ჩაატარა კონკურსის ერთი ეტაპი (განცხადებების შერჩევა-გადარჩევა) და უნდა უზრუნველყოს მესამე ეტაპის (გასაუბრება) ჩატარება. გამომდინარე იქედან, რომ აღნიშნული კონკურსის მესამე ეტაპის (გასაუბრება) ჩატარება მოიცავს "პერსონალურ მონაცემთა დაცვის შესახებ" საქართველოს კანონის მე-2 მუხლის "ა" ქვეპუნქტით გათვალისწინებული პერსონალური ინფორმაციის განხილვას, კომისიას მიზანშეუწონლად მიაჩნია დამკვირვებლის სტატუსით გარეშე პირის დაშვება”, _ მოგვწერა ოზურგეთის მუნიციპალიტეტის გამგებლის მოადგილემ არჩილ ყაზაიშვილმა.
რაც შეეხება კონკურსის მესამე ეტაპს _ ოზურგეთის მუნიციპალიტეტში გასაუბრება დღეს დაიწყო და 6 დღის განმავლობაში _ 28 დეკემბრამდე გაგრძელდება.
ოზურგეთის მუნიციპალიტეტის გამგეობასა და საკრებულოს აპარატში 137 ვაკანტური ადგილის დასაკავებლად განაცხადი 488 კანდიდატმა შეიტანა. მათ შორის: გამგეობის 123 ვაკანსიაზე 416-მა კანდიდატმა, ხოლო საკრებულოს 14 ვაკანსიაზე 72-მა კანდიდატმა.
ოზურგეთის მუნიციპალიტეტის გამგებლის, საკონკურსო/საატესტაციო კომისიის თავმჯდომარის, მერაბ ჭანუყვაძის ინფორმაციით, 392-მა აპლიკანტმა სრულად დააკმაყოფილა საკვალიფიკაციო მოთხოვნები და გადავიდა ტესტირების ეტაპზე, ხოლო 98 კანდიდატს მიეცა ორი სამუშაო დღის ვადა ხარვეზების აღმოსაფხვრელად.
_ 18-მა აპლიკანტმა აღმოფხვრა ხარვეზი და, საერთო ჯამში, კონკურსის ტესტირების ეტაპზე 410 კანდიდატი გადავიდა. შეფასებისა და გამოცდების ეროვნული ცენტრის მიერ ორგანიზებულ 2014 წლის 13-14 დეკემბერს ტესტურ გამოცდებში მონაწილეობა 368 კანდიდატმა მიიღო. გამოცდაზე არ გამოცხადდა 42 კანდიდატი. ბარიერი გადალახა და გასაუბრების ეტაპზე გადავიდა 309 კანდიდატი. გასაუბრების ეტაპზე ვერ გადავიდა 59 კანდიდატი, _ აღნიშნა ჭანუყვაძემ.
მისივე ინფორმაციით, გასაუბრების დროის, ადგილისა და თარიღის შესახებ აპლიკანტებს სატელეფონო შეტყობინების საშუალებით ეცნობათ. საკონკურსო/საატესტაციო კომისია საბოლოო გადაწყვეტილებას 29 დეკემბერს მიიღებს.
დღეს იწყება გასაუბრების ეტაპი ჩოხატაურშიც, რომელიც საკონკურსო/საატესტაციო კომისიის თავმჯდომარის, მინდია ჟღერიას ინფორმაციით 24 დეკემბერს დასრულდება.
ოზურგეთისგან განსხვავებით, ჩოხატაურის კომისიამ ჩვენს მედიასახლს გასაუბრებაზე დასწრების და ფოტო /ვიდეო გადაღების უფლება მისცა, თუმცა, იმ შემთხვევაში, თუკი ამის შესახებ კონკურსანტი კომისიას წერილობით აცნობებდა.
"გასაუბრების ეტაპზე საკონკურსო-საატესტაციო კომისიის მიერ, მედიასახლ "გურია ნიუსიდან" წარმომადგენლები და ფოტო/ვიდეო გადაღება დაშვებული იქნება მხოლოდ კონკურსანტის წერილობითი მოთხოვნის საფუძველზე.განცხადება წარდგენილი უნდა იქნას ჩოხატაურის მუნიციპალიტეტის ადგილობრივი თვითმმართველობის მოხელეთა მუდმივმოქმედ საკონკურსო-საატესტაციო კომისიაში 2014 წლის 19 დეკემბრის 18:00 საათამდე", _ აღნიშნულია კომისიის მიერ მიღებულ გადაწყვეტილებაში.
სამწუხაროდ, ეს პასუხი ჩვენ მიერ 10 დეკემბერს შეტანილ განცხადებაზე, კომისიამ 17 დეკემბრის საღამოს, მას შემდეგ გამოგვიგზავნა, როცა გაზეთის მეასე ნომერი სტამბაში დასაბეჭდად იყო გაგზავნილი. შესაბამისად, ვერ შევძელით დაინტერესებული პირებისთვის საკონკურსო/საატესტაციო კომისიის გადაწყვეტილება გაზეთის საშულებით გაგვეცნო.
მინდია ჟღერიას თქმით, კომისიის გადაწყვეტილება მიღებისთანავე გამოგვიგზავნა:
_ პასუხი თქვენც გამოგიგზავნეთ და ვებგვერდზეც ავტვირთეთ. მართალია, განცხადებით 10 დეკემბერს მოგვმართეთ, მაგრამ კომისია 17 დეკემბრამდე არ შეკრებილა, _ გვითხრა ჟღერიამ, რომელსაც კითხვაზე _ აქვს თუ არა მონაცემები, თუ რამდენი ადამიანი სარგებლობს ჩოხატაურში ინტერნეტით, პასუხი არა აქვს.
_ ნამდვილად არ ვიცი. ყოველ შემთხვევაში, კონკურსანტებმა განცხადებები ინტერნეტის საშუალებით ატვირთეს და, შესაბამისად, ისინი ამ განცხადების წაკითხვასაც შეძლებენ ალბათ, _ დაგვიზუსტა ჟღერიამ.
ჩოხატაურში 220 მოქალაქე გავიდა ტესტირებაზე, აქედან ზღვარი, რომელიც 33 ქულას შეადგენდა, გადალახა 137-მა, 19 არ გამოცხადდა, დანარჩენებმა კი საჭირო ქულები ვერ დააგროვეს. მინდია ჟღერიას თქმით, ჩაიჭრა გამგებლის 9 წარმომადგენელი, განყოფილების 4 უფროსი, ორი_ სამხედრო კომისარიატში, ერთი _ ადმინისტრაციულ სამსახურში, ერთი კი _ სოციალურ სამსახურში. ჩაჭრილებიდან 15 გამგეობის და საკრებულოს მოქმედი სპეციალისტები არიან.
ჯერჯერობით უცნობია, როდის დაიწყება გასაუბრების ეტაპი ლანჩხუთის მუნიციპალიტეტში. საკრებულოს და გამგეობის კომისიები ოფიციალურ შედეგებს ელოდებიან:
_ დღეს უნდა მოგვივიდეს ოფიციალური შედეგები. ჯერჯერობით, არ ვიცით, ვინ გადავიდა, ვინ გაასაჩივრა. როგორც კი ეს მონაცემები გვექნება, შეიკრიბება კომისია და გასაუბრების თარიღსაც დავნიშნავთ, _ აღნიშნა ჩვენთან საუბრისას ლანჩხუთის მუნიციპალიტეტის გამგებელმა, გამგეობის საკონკურსო/საატესტაციო კომისიის თავმჯდომარემ ზაზა ურუშაძემ.
ტესტირების ოფიციალურ პასუხებს ელოდებიან ლანჩხუთის მუნიციპალიტეტის საკრებულოშიც, სადაც 5 ვაკანსიაა გამოცხადებული და ამისთვის ცალკე კომისიაა შექმნილი, რომელსაც საკრებულოს თავმჯდომარის მოადგილე გელა კილაძე ხელმძღვანელობს.
