"გაერთიანებული დემოკრატიული მოძრაობის“ ლიდერი რამდენიმე დღის წინ, ევროპარლამენტის მიერ საქართველო-ევროკავშირის ასოცირების შეთანხმების რატიფიცირებისას მომხდარ ფაქტს, როდესაც სხდომას ძებნილი ექსპრეზიდენტი მიხეილ სააკაშვილი ესწრებოდა, _ საქართველოს უახლეს ისტორიაში კიდევ ერთ სამარცხვინო ფურცლად აფასებს.
მისი თქმით, ეს ფაქტი ადასტურებს იმას, რომ საქართველო, როგორც სუვერენული სახელმწიფო, როგორც ჩანს ევროპისთვის აღარ არსებობს.
"რამდენიმე დღის წინ ყველანი, სრულიად სამარცხვინო სურათის მოწმენი გავხდით, რომელიც საქართველოს უახლეს ისტორიაში კიდევ ერთ სამარცხვინო ფურცლად ჩაიწერება. მხედველობაში მაქვს ვითარება, როდესაც მნიშვნელოვანი დოკუმენტის რატიფიცირება მოხდა, ოღონდ ამ რატიფიცირებას საქართველოს ხელისუფლების გარდა ყოფილი პრეზიდენტი, ძებნილი მიხეილ სააკაშვილიც ესწრებოდა.
ის ფაქტი, რომ უმნიშვნელოვანესი დოკუმენტის რატიფიცირება, რომელსაც საქართველოს ხელისუფლება კვალიფიკაციას ერთხმად აძლევდა, როგორც ისტორიული მოვლენისა, მოხდა იმ ვითარებაში, როდესაც პირველ რიგში იჯდა ძებნილი პრეზიდენტი, ხოლო უკან, ქანდარაზე, მოქმედი პრეზიდენტი, რომელსაც სიტყვით გამოსვლის საშუალებაც კი არ მიეცა. ეს ფაქტი ძალიან ნათლად ადასტურებს იმას, რომ საქართველო, როგორც სუვერენული სახელმწიფო, როგორც ჩანს ევროპისთვის აღარ არსებობს და ადასტურებს იმას, რომ ჩვენ ვართ მხოლოდ და მხოლოდ ტერიტორია, რომელიც საინტერესოა ჩვენი დასავლელი პარტნიორებისათვის“, _ განაცხადა ბურჯანაძემ.
"გაერთიანებული დემოკრატიული მოძრაობის“ ლიდერი მიიჩნევს, რომ ეს ფაქტი ერთის მხრივ ხელისუფლების აბსოლუტური უუნარობის და არაკომპეტენტურობის კლასიკური მაგალითია, იმიტომ რომ ხელისუფლებამ ელემენტარულად ვერ შეძლო პირობების დაყენება და ხმის მიტანა ევროკავშირამდე, რომ არ შეიძლება ძებნილი პრეზიდენტი მოქმედი ხელისუფლების გვერდზე ყოფილიყო.
"მეორეს მხრივ, ჩემდა სამწუხაროდ, ეს ევროპული სტრუქტურების მიერ საქართველოს ხელისუფლებისათვის აშკარად გაწნული სილაა, როდესაც ნათლად დადასტურდა, რომ არავითარი მნიშვნელობა არ აქვს რა პოზიცია აქვს საქართველოს ხელისუფლებას, ევროპული სტრუქტურები მოქმედებენ მხოლოდ ისე, როგორც თავად მიაჩნიათ საჭიროდ.
ეს არ არის პარტნიორთან დამოკიდებულების ფორმა და ეს არ არის მეგობარი სახელმწიფოს მეგობარ ხელისუფლებასთან ურთიერთობის ფორმა. ეს სილის გაწვნაა, რომელიც, არ ვიცი ხელისუფლებამ იგრძნო თუ არა, მაგრამ ყველა იმ ადამიანმა, რომელთაც გვესმის პოლიტიკა, დიპლომატია და ვისაც გული შეგვტკივა ჩვენი ქვეყნის სუვერენიტეტზე, – ეს ნამდვილად ძალიან კარგად ვიგრძენით.
საქართველოს ხელისუფლებამ საქართველოს მოსახლეობის უმთავრესი მოთხოვნის განხორციელება ვერ შეძლო და დღეს ადამიანი, რომელიც ძებნილია, ევროპის უმაღლესი ტრიბუნების სტუმარია და ამას ხელისუფლება ვერაფერს ვერ უხერხებს“, _ განაცხადა ბურჯანაძემ.
მისივე თქმით, სამწუხაროა, რომ საქართველოს ხელისუფლება, რომელსაც საკუთარი იმიჯისთვისაც ვერ მიუხედია და საკუთარი პატივისცემა ვერ მოუპოვებია, ვერც ქვეყნის შიგნით და ვერც მის გარეთ, საქართველოს მოსახლეობის ინტერესების დაცვას და პრობლემების მოგვარებას ნამდვილად ვერ მოახერხებს.
"ევროპასთან ვერ მიუტანიათ ჩვენი პოზიცია და რუსეთთან როგორ უნდა დაალაგონ ამათ ურთიერთობები?!“_ განაცხადა ბურჯანაძემ.
