ოზურგეთის მუნიციპალიტეტის 2015 წლის ბიუჯეტი 7 მილიონ 14 ათასი ლარია

საკრებულოს მიერ მუნიციპალიტეტის მთავარ საფინანსო დოკუმენტში ცვლილებებისა და დამატებების შეტანის შემდეგ ადგილობრივი ბიუჯეტი  7 მილიონ 14 ათასი ლარით განისაზღვრა.

2015 წლის ბიუჯეტის პროექტი დღეს მუნიციპალიტეტის საკრებულოს დეპუტატებმა დაბა ურეკის კულტურის სახლში რიგგარეშე სხდომაზე დაამტკიცეს.

პროექტის პრეზენტაციას, რომელიც გამჭვირვალობის პრინციპით, სლაიდ ფორმატით მუნიციპალიტეტის ისტორიაში პირველად მოეწყო, გურიის გუბერნატორის მოვალეობის შემსრულებელი, ქეთი მოისწრაფეშვილი, მუნიციპალიტეტის გამგებელი, მერაბ ჭანუყვაძე, აღმასრულებელი რგოლის წარმომადგენლები და ადგილობრივი მოსახლეობა დაესწრო.

ოზურგეთის მუნიციპალიტეტის გამგეობის საფინანსო სამსახურის ხელმძღვანელმა, გია მამაკაიშვილიმა მუნიციპალიტეტის ძირითადი პრიორიტეტებისა და მიმართულებების შესახებ დეტალური მიმოხილვა წარმოადგინა. როგორც პრეზენტატორმა აღნიშნა მუნიციპალიტეტის ეკონომიკური განვითარებისთვის აუცილებელ პირობას ინფრასტუქტურული პროექტების განხორციელება წარმოადგენს, ამიტომ 2015 წლის ბიუჯეტის პირობებში მუნიციპალიტეტის სტრატეგია  ადგილობრივი ინფრასტრუქტურის განვითარებას, მოსახლეობის სოციალური პირობების გაუმჯობესებას, საზოგადოებრივი უსაფრთხოების უზრუნველყოფას, ჯანსაღი ცხოვრების წესის დანერგვას და სკოლამდელი განათლების ხელშეწყობას მოიცავს.

მომავალი წლის ბიუჯეტში ინფრასტრუქტურულ პროექტებზე  1 177,5 ათასი ლარი დაიხარჯება.  იგეგმება მერია-კონჭკათის ადგილობრივი მნიშვნელობის გზის რეაბილიტაცია. (მე-2 ეტაპი. გარდამავალი პროექტი), სილაურის ადმინისტრაციული შენობის რემონტი. ოზურგეთი-შემოქმედი-გომისმთის გზის მშენებლობა,დვაბზუ-ცხემლისხიდი-ვაკიჯვრის ადგილობრივი მნიშვნელობის გზის რეაბილიტაცია, მერიის ადმინისტრაციულ ერთეულში მდებარე მრავალსართულიანი საცხოვრებელი ბინის რემონტი უსახლკაროთა განთავსებისთვის,სოფელ ოზურგეთი-მელექერდური -დვაბზუს საავტომობილო გზის რეაბილიტაცია (მე-3 ეტაპი), სოფელ ჯუმათში სასმელი წყლის სისტემის მშენებლობა-მოწყობა. (I-ლი ეტაპი), ცხემლისხიდის, ბახვისა და ჭანიეთის ადმინისტრაციულ ერთეულებში ახალი საბავშვო ბაღების მშენებლობა,  კურორტ გომისმთის წყალმომარაგების სისტემის მშენებლობა პროექტირების ჩათვლით, დაბა ურეკში, წვერმაღალის ტერიტორიაზე ხელოვნურსაფარიანი სტადიონის მოწყობა,  კურორტ გომისმთის განაშენიანების გენ-გეგმის შექმნა.

საგზაო ინფრასტრუქტურის მშენებლობა-რეაბილიტაცია და მოვლა-შენახვაზე 115  ათასი, დასუფთავების ღონისძიებებზე – 390 000, კომუნალურ მომსახურებაზე – 320 ათასი, კეთილმოწყობის სამუშაოებზე – 50 ათასი, გარე განათების მოწყობაზე – 120 ათასი, ხოლო   ფერმერული მეურნეობის განვითარების ცენტრის შექმნაზე  – 182,5 ათასი ლარია გათვალისწინებული.

მამაკაიშვილის განმარტებით, მთავარ პრიორიტეტებში მოხვდა ზოგადი განათლებისა და სკოლამდელი განათლების ხელშეწყობა. პროგრამის მიზანი საბავშვო ბაღებში სრულფასოვანი სააღმზრდელო გარემოს შექმნა და მატერიალურ-ტექნიკური პირობების გაუმჯობესებაა. რაც შეეხება ზოგად განათლებას,  ადგილობრივი ბიუჯეტის ფარგლებში მინიციპალიტეტის საგანმანათლებლო დაწესებულებების რეაბილიტაციაზე ჯამში 41 000 ლარი დაიხარჯება. იგეგმება წარმატებული მოსწავლეების სწავლის დაფინანსებაც. ასევე, სტიქიური მოვლენების შედეგად დაზარალებული მოსახლეობის დახმარება,მრავალშვილიანი ოჯახების ხელშეწყობა, ვეტერანების და დაღუპულ მეომართა ოჯახების სოციალური მდგომარეობის გაუმჯობესება, იძულებით გადაადგილებულ პირთათვის საცხოვრებელი პირობების უზრუნველყოფა, სპორტისა და ტურიზმის განვითარება, ტურისტებისათვის ხელსაყრელი  გარემოს შექმნა.

სოფლის მეურნეობის მიმართულებით: ჩაის კულტურის რეაბილიტაციისა და სასოფლო-სამეურნეო დანიშნულების მიწების სამელიორაციო სამუშაოების განხორციელება; მეცხოველეობის განვითარების ხელშეწყობა,ეკოლოგიურად სუფთა პროდუქტების წარმოება,ხილსაცავების მოწყობა,სასათბურე მეურნეობების განვითარება იგეგმება.

მუნიციპალიტეტის გამგებლის, მერაბ ჭანუყვაძის განცხადებით წარმოდგენილი ბიუჯეტის პროექტი იდეალურისგან შორსაა, თუმცა გამგეობისა და საკრებულოს კომპლექსური მუშაობის შედეგად მომავალ წელს გაცილებით მეტი საინტერესო და მოსახლეობისთვის აუცილებელი სოციალური პროექტი განხორციელდება.

პრეზენტაციის დასასრულს დაბა ურეკის კულტურის სახლში ადგილობრივი ქორეოგრაფიული ანსამბლის კონცერტი გაიმართა. ანსამბლის წევრებს მუნიციპალიტეტის გამგეობისგან წინასაახალწლო სასაჩუქრე პაკეტები გადაეცათ.